¹ Phimaana, assun'naka, kinawukhanhenrihani wiira, wo kiriri tja Muluku, nthonhihere eruthutinhu ntoko mukutho nkumi, ttakattifu ni wontivela Muluku, enari okokhorelawinhu wo muiiruthuni. ² N'hitakanihere etuniya yeela, massi mwipithikusse wo wohokoloseriya mupuweleloeen'nhuwo wiira ntuwele eri yoorera, yotiveliha nu thuna worera wa Muluku. ³ Konth, mwaha wo mahala ovahiyaaaka, mi kinawuhimeriani wiira wakuta nthu hitupuwelele vekhaaawe venti tinene yakophela; massi aayo, mupuwele wotuwelela, wonayeli wo wamini wa Muluku owuntenliaaweni. ⁴ Kontha hivano nihaana miphantti tjintji mwee eruthu emotja, massi kahi miphantti tjootene orina nteko m'motja. ⁵ Hata tjoo hi, nirirhu entji, nihokhala eruthu emotja mwa Kristo ni, vekhaaweru, niri mphanttim'motjaaru nitjikinaku. ⁶ Hi nihaana evaheriyo tjivirikana wo mahala avahiyeehu. Wakhala evaheriyo ya nthu ori oloha, okhale ntoko ephimeliyo wo wamini. ⁷ Wakhala evaheriyo nteko, avare, Wakhala evaheriyo osomiha, asomihe. ⁸ Wakhala evaheriyo wolipihera, alipihere. Wakhala evaheriyo otjanka, atjanke wo makhalelo saana. Wakhala evaheriyo ohoolela, ahoolele saana. Wakhala evaheriyo ekiriri, avarele ekiriri wotteliya. ⁹ Nfentooyo okhale weelolo. Nkhottele yootakhala; mwiikusihe eri yoorera. ¹⁰ Wanari nfento yaayoru, nkhale otjukulelana nthu ninkhwaawe. Onari nttittimiho, n'hisimuane yaayoru. ¹¹ Wakhala oreera, n'hikhale ohirattavenla. Nkhale ovihaviheriya mwi n'nepani, mwavarelaka aPwiya. ¹² Ntteliyeke mukhuluvelihani on'halen'nhu okhalana wa hoolo. Nkhale ovilela m'mahuvihoni. Nvekele wohihiyeenra. ¹³ Nkhaliheraneke wa tjopheela tjettakattifu ni nkhale owakhenla aletto. ¹⁴ Mwareerihe anowomolanihani; mwarerihe ni n'haananarihe. ¹⁵ Ntteliyeke ni yaale antteeliya, munle ni yaale anunla. ¹⁶ Nkhalane mupuwelelo m'motjaaru nthu ninkhwaawe. N'hupuwele womanan'na owikukhuliha, massi mwaphaveleathu owiiyeviha. N'hikhale atjuwelatji m'methoniwinhu. ¹⁷ Hikhale nthu noliva yotakhala ni yotakhala. Mpanke eri yoorera wa hoolo wathu oteene. ¹⁸ Yatepender wa nhuuva, nkhalane nrettele naathu oteene. ¹⁹ Assun'naka, n'hivingari vekhen'nhuru, massi nvahe nipuro otjatja wa Muluku. Konthaehantikhiya: "Evingansa eri mphanttiyaaka; Mi kinaahala okawa, ahiira aPwiya". ²⁰ "Massi wakhala nwananiaa akhalanaka etala, onvahe yoolha. Yenani akhalana nthona, onvahe yoovuria. Kontha mwapanka eyo, we on'hala wunkela makhala mooro wamuru wawe". ²¹ N'hihiyenre nthemiyaka nuunhala, massi nthemeke tjoonhala niithu tjoorera.