¹ Pwiya aahomwiirela Moises moothakoni wooSinai, mweeri wowantjera womwaakha wonayeeli, owakathi waakhumalyaaya elapo wowiigiipitu. Yena aahiira: ² Waahiye atthu owiisrael antthapenle Paaskoa owakathi puuwakathi womwaakha. ³ Nihuku nonakhuumi neetjesse womweeri yoola, yootjootjilo, n'naahala ontthapenla Paaskoa. N'naahala ossunkatja, ottharenla ekettelo tjooteene ni wiiwenla moolumo ooteene. ⁴ Vano, Moises aahowiirela atthu owiisrael wiira yaahaana atthapenlaka essukuhuulu ya Paaskoa. ⁵ Vano, ayenatja yaahontthapenlatja Paaskoa mweeri wowantjera, nihuku nonakhuumi namatjesse, yootjootjilo, moothakoni wooSinai. Atthu owiisrael yaahiiwenla tjooteene Pwiya tjaamwiirelalyaawe Moises. ⁶ Yaahaavo atthu yaari oohiloka, mwaha wonkwanha ntthu ookhwa. Ayenatja khayaaphwanela ontthapenla Paaskoa. Vano, ayenatja yaahorwaa wa Moises ni Arao nihuku nen'ne. ⁷ Atthwaale yaahomwiirela Moises: Khanilokalokale mwaha wonkwanha ntthu ookhwa. Mun'naateeliherani ovaha okuttho waPwiya owakathi phuuwakathi womwaakha eriyari waatthu owiisrael? ⁸ Moises aahowiirelatja: Nkanrihe kiviriyane en'halaawe Pwiya okintthutjiha mwaha wanhuuvaatja. ⁹ Pwiya aahomwiirela Moises: ¹⁰ Owiirele atthu owiisrael. Akhala ntthu eriyariinhu wala makhotweenhu phukhala oohiphwanela, mwaha wookwanha nrutthu, wala n'nari niikwaha, muntthapenle Paaskoa waPwiya. ¹¹ Ayenatja anaahala onssunkatja Paaskoa, mweeri wonayeeli, mahuku yeettaka khuumi namatjesse, yootjootjilo. Ayenatja anaahala okhuuratja ephaawu yoohimiropo nimathapa owaawa. ¹² Ayenatja khiivo en'halaaya ohiyenra wonihuku nikhwaawe wala anaahala opwessa nikhuva nonama. Ayenatja ahaana ossunka ekettelo tjooteene tjopaaskoa. ¹³ Massi, akhala ntthu nkumi ni hirina ekwaha, woohintthapenla Paaskoa, oyo ntthuuyo naafutthiya moomutjiniwawe, kontha yena khavahale okuttho Pwiya onkhanhenraawe khula mwaakha. Yooyo ntthuuyo haana oteesa etnpyaawe. ¹⁴ Akhala nan'mwa akhalaka ninhu ni phuntthapenla Paaskoa wonttittimiha Pwiya, yena haana apankaka tjooteene tjin'himyaawe, assunkaka ekettelo tjopaaskoa, wiiwenlaka malamulo. Mun'hala okhalana malamulo mamotjaaru ni nan'mwa ni wayoole oteene yareliye nlaponin'mo. ¹⁵ Nihuku naatekiyaaya enupa yamuluku, nihutte naahokhuneela enupa yamuluku, eyo phiiyo, heeme wonthukumano. Yootjotjilo, nihutte naakhuneela enupa yamuluku ni naakhala toko mooro npaka owitjissu. ¹⁶ Phiinan'na naakhalaaya. Nihutte naakhuneela ohiyu, naakhala toko mooro. ¹⁷ Nihutten'no khula owakathi weettelaaya nphantte woheema, atthu owiisrael yaakulela ekwahaaya. Nihutte neemelaka, atthu phaakhalaaya. ¹⁸ Womweettihero wa Pwiya, atthu owiisrael yeera yeettaka ni, womweettiherwaawe phaakhalatjaaya. Nihutte neemelaka wanupani yamuluku, ayenatja yaakhala mwaamakatjalyaaya. ¹⁹ Nihutte nakhala mahuku mentji, atthu owiisrael yaaniiwenla tjaahimyaawe Pwiya ni khayeetta. ²⁰ Mahuku makhwaawe, nihutte naakhala mahuku vakaani. Tjitjon'mo yaaninwentja Pwiya tjaahimyaawe yaanohokolyaa ekwahatjaya ni yeetta mwaha woyena. ²¹ Mahuku makhwaawe, nihutte naakhala wamakatjaaya okhuma otjootjilo npaka ossa. Nihutte navenhaka nphantte woowitjissu yaaneettatja. Naakulelaka othana wala ohiyu, nihutte navenhaka pheettaaya. ²² Nihutten'no nakhala mahuku meeli wanupani yamuluku, mweeri n;motja wala mwaakha, atthu owiisrael yaakhala mwaakhalaaya ni khayeeta. Massi, khula owakathi nihutte weenheenhaaya, ayenatja pheettaaya. ²³ Ayenatja yaakhala mwaha waPwiya ni yeetta mwaha waPwiya. Ayenatja yaaniiwenla tjaahimyaawe Pwiya, tjaavahiyaaya eriyari ya Moises.