¹ Pwiya aahuuluma ni Moises ni Arao. Yena aahiira: ² Mweettihere ntthitto wonikhoto naatthu oCoata waalevita, mwaha wonihimonaya naatthu okhalayi. ³ Mwaalikele atthu ooteene arina eyaakha talaathiini wala hanssiini tjeeyareelo. Yaala atthwaala an´hala ovara nteko n´heemani monthukumano. ⁴ Nikhoto na Coate nin´hala okhikitjera tjitthu tjoottakattifihiya. tjikawanihatjalyaaka, n´heemani monthukumano. ⁵ Yatthonkomanatjaka woopheela okhuma, Arao naassaanaawe anaahala okela n´heemani, anaahala okurussa mwinkittho woomwalaniha nipuro ttakattiifu nottakattiifu, ni anaahala okhuneela nivuku nowaataana. ⁶ Ayenatja anaahala okhuneelatja ninttapala nomope ni anaahala waatalatja ekuwo yoopipila ni anaahala waawariya anela nivuku wiira yaateesse. ⁷ Anaahala waatalatja wameetja ekuwo yoopipila. Vaava anaahala owiihatja eloossa, ni tjitthu tjooreerela tjooteene. Ephaawu tjin´hala okhala wameetja. ⁸ Ayenatja anaahala okhunela niikuwo yoosseerya, tootho ninttapala nomope, anaahala waahelatja anela nmameetja wiira ateesse. ⁹ Anaahala okussa ekuwo yoopipila ni anaahala okhuneela eesaminin´nha, wamotja ni tjowooneelatjaya, anamakussa, ethaalu, nimitiita tjooteene tjomakhura. ¹⁰ Ayenatja an´hala okhuneelatja, tjitthu tjooteene ninttapala nomope, yeessatjaka nipuro nomotja wiira ateesse. ¹¹ Anaahala waatalatja ekuwo yoopipila waaltaare owooru ni anaahala okhuneelatja ninttapala nomope, woottharenlana, ohela ekopo tjoopheela oteesseana. ¹² Anaahala otakanihatja tjitthu tjooteene tjonteko nipuro ttakattiifu ni anaahala weessatja nkuwoni yoopipila, wiira akhuneele ninttapala nomope ni weeessatja opuro nooteessa. ¹³ Anaahala okumihatja ettuura waltaare nookhuneelatja niikuwo. ¹⁴ Anaahala otakanihatja tjitthu tjooteene tjonteko: Anaahala waakhuneelatja altaare ninttapala nomope, vano, ekopo tjoopheela oteessana. ¹⁵ Arao naassaanaawe wakhuneelalyaaya nipuro ttakattiifu nitjitthutjaya tjooteene, ni enupeeyo yavussiya, nloko naCoate nihaana oteessa nipuro ttakattiifu. Ayenatja yakwanhaka thitthu ttakattiifu anaahala okhwatja. Ola phunteko wonloko naCoate, wooteessa tjitthu n´heemani monthukumano. ¹⁶ Eliazar, mwaana anamukuttho Arao, anaahala oteessa makhura oonukhela arweehaka wanthukoni. Yena haana awehawehaka okussiya wolunpani, tjitthu tjoovahiya, makhura ooreerihiya, enupa yooteene yomavekelo ni tjitthu tjooteene tjirinaawe, tjitthu tjooreerihiya ni tjitthu tjooteene. ¹⁷ Pwiya aahomuulumana Moises ni Arao. ¹⁸ Ohitthunihe wiira nloko naaCoatita okumiyiya womalevita. ¹⁹ Mwaassunkatje, wiira akhalatje ni ahikhwatje apankaka yeeyo. Yaattamenlatjaka tjitthu ttakattiifu. ²⁰ Ayenatja khan´hala woonatja nipuro ttakattiifu, wanakhala owakathi phuuwakathi, wala anaahala okhwaa. Arao naasaanaawe phan´hala okela. Yaala phaakawelatjale khula ntthu ooCoatita ntekwaawe. ²¹ Pwiya aahomuulumanatho Moises: ²² Oweettiheretho mwaathanle nikhoto na Gerson, an´hakhalayi aamutji omahimwaaya. ²³ Waalikele ooteene arina eyaakha talaathiini wala hanssiini tjeeyareelo. Waalikele ooteene an´hala okela nteko n´heemani monthukumano. ²⁴ Ola phunteko nonloko nomagersonita, en´halaaya ovara phin´halaaya oteesa. ²⁵ Ayenatja anaahala okussatja minkittho tjonupa yamuluku, heema wonthukumano, ekhuneelo tjomope tjaarinaaya, ni minkittho tjaari onkeliya n´heemani wonthukumano. ²⁶ Ayenatja ahaana okussatja minkittho tjowapuwani, minkittho tjowankrora oomakhumenloni owapuwani, yaattamenlale enupa yamuluku, ni waattamenla waltaare, mikhoyitjaya, ni tjitthu tjooteene tjowantekoni. Anaahala ovarela nteko tjooteene tjohissima watjen´nho tjitthun´nho. ²⁷ Arao naasaanaawe anaahala ohoolelatja nteko wooteene wonikhoto nomagersonita, wotjitthu tjooteene tjin´halaaya olovolatja, ni womitekotjaya tjooteene. Mun´hala waakhavihatjera womitekotjaya tjooteene. ²⁸ Ola phunteko wonihimo omaloko an´nagersonita n´heemani wonthukumano. Itamar, mwaana aArao, namuttho, haana aahoolelaka n´mitekoniwaya. ²⁹ Onaahala waalikela makhoto aMerari mwaha womalokwaaya, ni onaahala weettiheratja amutji aatthwaaya okhalayi, oyaakha talaathiini npaka eyaakha hanssiini tjeeyareelo. ³⁰ Omwaalikele khula n´motja n´hala otakaneela nphwinko on´hala ovara nteko n´heemani wonthukumano. ³¹ N´no ovahatjeriya wontekwaayatja n´heemani wonthukumano. Ayenatja ahaana akhikitjeraka enupa yamuluku, nitjitthutjaya tjooteene. ³² Wootakaniha niikopo tjowapuwani woorukureerya enupa yamuluku, nitjitthu tjooteene. Wantikhe matjina tjotjitthu tjinpheelaaya okussa. ³³ Ola phunteko womahimo aMerari, en´halaaya owiihatja n´heemani wonthukumano, wonphantte wa Itamar, mwaana aArao, namukuttho. ³⁴ Moises, Arao, nimahooleli omunttettheni yaahaalikela makhoto omaCoate, womahimo aatthu okhalayi aamutjaaya. ³⁵ Ayenatja yaawaalikelatjale yaale yaarina eyaakha talaathiini npaka hanssiini tjeeyareelo. Yaahowaalikelatja ooteene yiitakaniherale wiira avare nteko nheemeni wonthukumano. ³⁶ Yaahaalikeliya atthu ekonto piili niimiyasita wohanssiini n´mahimoniwaya. ³⁷ Moises ni Arao yaahowaalikela atthu ooteene nmahimoni naamutji omacoatita yaavara nteko n´heemani wonthukumano. Ayenatja yaahomwiiwelelatja Pwiya, yan´himeeryalyaawe Moises wiira avaratje. ³⁸ Nloko naGerson yaahaalikeliya mahimwaaya, naatthwaaya okhalayi naassimutjaaya. ³⁹ Oyaakha talaathiini npaka hanssiini tjeeyareelo, wiira ooteene yaataane avare nteko n´heemani wonthukumano. ⁴⁰ Atthu ooteene, yaalikeliye munlokoni ni moomutjini mwaatthwaaya okhalayi, watakanihiyaaya yaari ekonto piili, niimiya sita wotalaathiini. ⁴¹ Moises ni Arao yaahaalikelatja mahimo omakhoto aGerson yaahala orwaa ovara nteko n´heemani wonthukumano. Ayenatja yaahiiwelelatja yaahimyalyaawe Pwiya , eriyari ya Moises. ⁴² Nloko naMerari yaahaalikelatjiya n´mahimoniwaya womalokwaaya waatthu okhalayi wakhula n´mutji. ⁴³ Oyaakha talaathiini npaka hanssiini tjeeyareelo, ooteene yaathukumanale wiira avare nteko n´heemani wonthukumano. ⁴⁴ Atthu ooteene , yaalikeliye khula nihimo naatthu okhalayi, yaari ekonto tthaaru niimiya piili. ⁴⁵ Moises ni Arao yaahowaalikela atthu ooteene, nloko naMerari. Ayenatja yaahiiwelelatja, pwiya yaahimyalyaawe, eriyari ya Moises. ⁴⁶ Tjitjon´mo, Moises ni Arao, nimahooleli owiisrael, yaahowaalikelatja malevita ooteene n´mahimoniwaya naamutji aatthwaaya okhalayi. ⁴⁷ Yaarina eyaakha talaathiini npaka hanssiini tjeeyareelo. Ayenatja yaahowaalikelayja ooteene yaahala ovara nteko npaani mwamuluku, ni yaahala oteessa nuukhikitjera tjitthu tjon´heemani wonthukumano. ⁴⁸ Yaahowaalikelatja atthu ekonto naane, niimiya thanu wothamaaniini. ⁴⁹ Toko Pwiya tjaahimyalyaawe, Moises aahomwaalikela khula ntthu, aattharihenlaka wakhula enan´na yonteko khula ntthu yaavaraawe. Yena aahomwaalikela khula ntthu toko woovahatjeriya waahalaawe okhalana. Ni, apankaka yeeyo, ayenatja ahiiwelelatja yuulumalyaawe Pwiya, eriyari ya Moises.