¹ Apwiya yaahomwiirela Moises, yiiraka: ² Owiirele atthu owiisrael anthoonhera ekopo, emotja wakhula nloko waatthwaaya okhalayi. Okusse ekopo khuumi napiili, wakhula n'hooleli oothanliya wakhula nloko. Wakhula ntthu wantikhe ntjinanawe wakoponi. ³ Onaahala wantikha ntjina naArao ekopo ya Levi. En'hala okhala ekopo emotja wakhula n'hooleli nonlokonawe waatthu okhalayi. ⁴ Onaahala ohela ekopon'nho n'heemani wonthukumano ohoolo womalamulo owaataana, on'haleehu okhala nkhayi. Ekopo yantthu nthanlalyaaka, enaahala wuunuwa. ⁵ Kinaahala weemessa ottokutta waatthu owiisrael, yaayo yaari niwe. ⁶ Vano, Moises ahowiirela atthu owiisrael. Ahooleli ooteene omaloko yaahovahiya ekopo, ekopo emotja wakhula n'hooleli, yaathanliye wakhula nloko naatthu okhalyi, ekopo khuumi napiili. ⁷ Ni Moises aaheessa ekopo eriyari waaPwiya n'heemani womalamulo owaataana. ⁸ Nihuku nikhwaawe, Moises aahokela n'heemani womalamulo owaataana, ni aahoona wiira ekopo ya Arao nonloko naLevi yaahaana ethutu. Tjaahiima mihokorokho tjoottokottha! ⁹ Moises aahowaana ekopo tjooteene ohoolo waaPwiya waatthu ooteene owiisrael ni wakhula ntthu aahokussa ekopwaawe. ¹⁰ Apwiya yaahomwiirela Moises: Weese ekopo yaArao ohoolo womalamulo owaataana. Ni ohiye phanka nthoonhero waatthu owiimananiha, wowiira omalihe okittokuttawaya, wala ankookhwatja. ¹¹ Moises aahopanka toko aPwiya tjaahimyalyaaya. ¹² Atthu owiisrael yaahomwiirela Moises, ni yaahomwiirela: Hi ninaahala okhwelava. ¹³ Wakhula ntthu n'hala owa, aattamenlaka enupa yanluku naahala okhwa. Ooteene ninaahala okhwa.