¹ Miria ni Arao yaahomuulumana Moises, mwaha wonthiyana anthelalyaawe. ² Ni yaahiiratja: Pwiya uulumale ni Moises paassi? Yena khanuulumanale? Vano, Pwiya aahiiwa yuulumatjalyaaya. ³ Moises aari nlopwana owiiyeviha, owiiyeviha tjinene weelapo yooteene. ⁴ Wowaakuvyaatja, Pwiya aahuuluma ni Moises, Arao ni Miria: Ooraaruwinhu nrwaatje n'heemani wonthukumano. Vano, ooraaru yaahokhumatja. ⁵ Pwiya, aahokhuruwa n'nihutteni. Akhumenlaka onkhorani woheema, aahomwiihana Arao ni Miria ni yaahowaatja ohoolowawe. ⁶ Pwiya aahiira: Vano, mwiiwatje moolumwaaka. Nrumeyaaka akhala ninhu, kinaahala omoonihera tjowooniya nkhoveni. ⁷ Nrumeyaaka Moises kahi toko alatja. Yena mwaamini weenupaaka yooteene. ⁸ Kinawuuluma tjo ni tjo ni Moises, wohikhala mowooniheriya. Yena nawoona ekhalelwaaka. Vano, essiyani ohoovaka wuuluma ninrumeyaaka, Moises? ⁹ Orussiya wa Pwiya waahopharela ni, vano, yena aahaahiyatja. ¹⁰ Nihitte naahon'hiya heema, ni, Miria aahohala nimakuttula ootteela. Arao warukunuwalyaawe an'wehaka Miria, aahoona wiira yena aahaana makuttula. ¹¹ Arao aahomwiirela Moises: Funtyaaka, kinawoolepela ohinihiyere atanpiila. Ninawuuluma pufya ni ninaakossa. ¹² Sontte, n'hin'hiye akhalaka toko mwaana ookwa, kontha erutthwaaya eholiya nphantte waakhumaaya nmirimani mwaanumwaane. ¹³ Vano, Moises aahokhuwela waPwiya. Iiraka: Sontte, Nkulu, munvonihe Miria, sontte! ¹⁴ Pwiya aahomwiirela Moises: Athumwana ananssuwenle owiitho, yaakookhala oohitafitiya mahuku saapa. On'hiye mwanrokora ota wonupa yanluku mahuku saapa. Vano, wan'hokolosseke. ¹⁵ Vano, Miria aahokumihiya npaani wanluku mahuku saapa. Atthu khayaakhumale npaka Miria wahokoleelalyaawe npaani wanluku. ¹⁶ Waviralyaaya eyo, atthu yaaheetta ekwahaaya arwaaka Hazerote ni yookomatjale moothakoni wooPara.