¹ Pwiya aahomwiirela Moises npaani monthukumano moothakoni wooSinai, nihuku nowanthera womweeri wonayeeli mahuku ooteene womwaakha wonayeeli atthu owiisrael waakhumalyaaya elapo yowiiGipitu. ² Otthenkatje elumpani waatthu ooteene owiisrael, wakhuta nihimo toko amutji an'nathumwanaya. Owaalikele matjinaaya, wakhula nlopwana. ³ Wayaale ooteene arina eyaakha ssiriini woorwaa ntjulu, oophwanela owana toko anakhotto wiisrael. We ni Abrao onaahala wantikha alopwana wonpwhinko ootthonkomanihiya. ⁴ Nlopwana n'motja wakhula nloko, n'hooleli onihimo, haana okhala ninhu toko n'hooleli onlokoninhu. Khula ntthu n'hala waahoolela alopwana an'hala owana mwaha wonlokonaya. ⁵ Ala matjina omahooleli an'hala owana ninhu: Nloko na Ruben, Elizur, mwaana aSedeur. ⁶ Nloko na Simeao, Selumiel, mwaana Zurisadai. ⁷ Nloko na Juda,Nasom, mwaana Aminadabe. ⁸ Nloko na Issacar, Netanel, mwaana Zuar. ⁹ Nloko na Zebulom, Eliabe, mwaana Helom. ¹⁰ Nloko na Efraim, mwaana Jose, Elisama, mwaana Amiude, nloko na Manasses, Gamaliel, mwaana Pedazur. ¹¹ Nloko na Benjamim, Abida, mwaana Gideoni. ¹² Nloko na Da, Aiezer, mwaana Amisadai. ¹³ Nloko na Aser, Pagiel, mwaana Ocra. ¹⁴ Nloko na Gade, Eliasafe, mwaana Deuel. ¹⁵ Ni nloko na Nftali, Aira, mwaana Ena. ¹⁶ Ala yaari alopwana yaathanliye naatthu. Ayenatja yaahohoolela maloko aatthwaaya okhalayi. Ayenatja yaari ahooleli omahimo Wiisrael. ¹⁷ Moises ni Arao yaahaalattula athhwaala, yiihanatjiye matjinaaya. ¹⁸ Ni wamotja naayenatja, yaahaathukuaniha alopwana oteene owiisrael, nihuku nowantjera womweeri onayeeli. Ohoolowaya, khula nlopwana oyaakha ssiriini woorwaa ntjulu aahaatjuwelela atthwaawe okhalayi, khula ntthu ahimyatjaka nlokonawe ni amutji omunlokoni waatthwaawe okhalayi. ¹⁹ Vano, Moises aahowantikhatja moothakoni wooSinai, toko Pwiya tjaahimyalyaawe. ²⁰ Anamanloko aRubem, owantjera wiisrael, yaahaalikelatjiya matjina aalopwana ooteene oyaakha ssiriini woorwaa ntjulu wiira arwee okhottoni, tjowantikhiya nimalokwaaya naamutji. ²¹ Yaahaalikeliya alopwana ekonto arupayini nasita niilufu nloko na Ruben. ²² Anamanloko aSimeao, yaahaalikeliya matjinaaya ooteene wakhula nlopwana oyaakha ssiriini woorwaa ntjulu wiira arwee okhottoni, tjowantikhiya nimahimo aamutji aatthwaawe okhalayi. ²³ Yaahaalikeliya alopwana ekonto hanssiini nakhentta niimiya tthaaru nloko na Simeao. ²⁴ Anamanloko aGade, yaahaalikeliya matjina waalopwana ooteene yaarina myaakha ssiriini woorwaa ntjulu wiira arwee okhottoni, tjowantikhiya nimahimo okhalayi naamutji. ²⁵ Yaahaalikelatjiya alopwana ekonto arupayini nathanu ni hanssiini nloko na Gade. ²⁶ Anamanloko aJuda, yaahaalikeliya, yaahaalikeliya matjinaaya aalopwana ooteene yaarina myaakha ssiriini woorwa ntjulu wiira arwee okhottoni, tjowantikhiya nimahimwaaya okalayi naamutji. ²⁷ Yaahaalikeliya alopwana ekonto talaathiini natjesse nloko naJuda. ²⁸ Anamanloko aIssacar, yaahaalikeliya alopwana ooteene yaarina myaakha ssiriini woorwaa ntjulu wiira arwee okhottoni, tjowantikhiya nimahimo okhalayi naamutji. ²⁹ Yaahaalikeliya alopwana ekonto hanssiini natjesse nloko naIssacar. ³⁰ Anamanloko aZebulom, yaahaalikeliya matjina alopwana ooteene yaarina myaakha ssiriini woorwaa ntjulu wiira arwee okhottoni, tjowantikhiya nimahimo okhalayi naamutji. ³¹ Yaahaalikeliya atthu ekonto hanssiini nassaapa nloko naZebulom. ³² Anamanloko aEfraim, mwaana Jose, yaahaalikeliya matjina aalopwana ooteene yaarina myaakha ssiriini woorwaa ntjulu wiira arwee okhottoni, tjowantikhiya nimahimo okhalyi naamutji. ³³ Yaahaalikeliya alopwana ekonto arupayini niimiya thanu nloko naEfraim. ³⁴ Anamanloko aManasses, mwaana Jose, yaahaalikeliya alopwana ooteene yaarina myaakha ssiriini woorwaa ntjulu wiira arwee okhottoni, tjowantikhiya nimahimo okhalayi naamutji. ³⁵ Yaahaalikeliya alopwana ekonto talaathiini neeli nimiya piili nloko naManasses. ³⁶ Anamanloko aBenjamim, yaahaalikeliya alopwana ooteene yaarina myaakha ssiriini woorwaa ntjulu wiira arwee okhottoni, tjowantikhiya nimahimo okhalayi naamutji. ³⁷ Yaahaalikeliya alopwana ekonto talaathiini nathanu niimiya tjesse nloko naBenjamim. ³⁸ Anamanloko aDa, yaahaalikeliya matjina aalopwana ooteene yaarina myaakha ssiriini woorwaa otjulu wiira arwee okhottoni, tjowantikhiya nimahimo okhalayi naamutji. ³⁹ Yaahaalikeliya alopwana ekonto sapiini niimiya saapa nloko naDa. ⁴⁰ Anamanloko aAser, yaahaalikeliya matjina aalopwana ooteene yaarina myaakha ssiriini woorwaa otjulu wiira arwee okhottoni, tjowantikhiya nimahimo okhalayi naamutji. ⁴¹ Yaahaalikeliya alopwana ekonto arupayini namotja niilufu nloko naAser. ⁴² Anamanloko aNaftali, yaahaalikeliya matjina aatthu ooteenne yaarina myaakha ssiriini woorwaa ntjulu wiira arwee okhottoni, tjowantikhiya nimahimo okhalayi naamutji. ⁴³ Yaahaalikeliya alopwana ekonto hanssini natthaaru niimiya tjesse nloko naNaftali. ⁴⁴ Moises ni Arao yaahowaalikelatja alopwana ooteene, wamotja naalpwana khuumi neeli yaahoolela maloko khuumi neeli owiisrael. ⁴⁵ Vano, alopwana ooteene owiisrael oyaakha ssiriini woorwaa ntjulu, ooteene yaarina orwaa okhottoni, yaahaalikelatjiya moomutjiniwaya. ⁴⁶ Yaahaalikelatjiya alopwana ekonto emiya sita natthaaru niimiya thanu wohanssiini. ⁴⁷ Massi atthu yaari nloko na Levi khayaalikeliye. ⁴⁸ Kontha Pwiya aahomwiirela Moises. ⁴⁹ We khun'hala waalikela nloko naLevi, waha khun'hala waavussa assaana owiisrael. ⁵⁰ Ohiyavaa, on'hala waavahatjera malevita wiira akhikitjere nipuro nassaahiti, akhikitjeraka tjitthu tjooteene tjirinaawe. Ayenatja anaahala okumihatja nipuro ninonvekelaaya muluku nitjooreerelatjaya, anaahala okhikitjeratja ni anaahala okhala wonrukureerya. ⁵¹ Enupeeyo yatamihiyaka erweehiyaka nipuro nikhwaawe, malevita anaahala otankulatja. Enupeeyo yakhala yootthonkomanihiya, malevita anaahala opanka tjitjon'mo. Wakhula ntthu oohitjuwanyaa n'hala ophiya wanupani naahala okhwa. ⁵² Atthu owiisrael yaweemessatja aheemaaya, khula nlopwana naahala opanka waattaman'na epantera wiira rinphantte wonphwinko wootthonkomanihiya. ⁵³ Phimaana, malevita anaahala waatteka aheemaaya woorukureerya enupa ya ssaahiti, wowiira orussiyawaka ohaamorele atthu owiisrael. Malevita anaahala ossunka enupa yassaahiti. ⁵⁴ Atthu owiisrael ahopanka tjitthu tjooteene. Ayena apankatjale tjooteene Pwiya tjaamwiirelalyaawe Moises.