¹ Vano, Jose aahorwaa owiitho waathumwaane, unlaka ni aahaavaha etjwaatjwa. ² Jose aahowiirela anantekwaawe wiira assikhiye athumwaane. Vano, atjuwelatji yaahonssikha Israel. ³ Ayenatja yaahovira mahuku arupayini, kontha phamahuku oomalela woossikha. Meegiipitu yaahomunlela mahuku sapiini. ⁴ Waviralyaaya mahuku owunliya, Jose aahowiirela akhulupale aFarao, iiraka: Wakhala wiira kihaana mahala nmeethoniwinhu, sontte, mun'himeerye Farao: ⁵ Athumwanaka ahokilaphiha, yiiraka: Kihanle okhwa. Kissikhiye ekhapure ethipalyaaka elapo yooCanaa. Kassikhiye won'wo. Vano, nkihiye kaassikhe athumwanaka, vano kihokolyeeke. ⁶ Farao aahaakhula: Orweeke waassikheke athumwana, phanka tjoolaphihalyaaya. ⁷ Jose aahorwaa waassikha athumwaane. Yena aahorwaa naakhulupale aFarao ooteene, atthu ooteene ovapuwaniwawe, naahooleli olapo oweegiipitu. ⁸ Naatthu ooteene aJose naassun'nawe, niinupa yaathumwaane. Massi ayenatja yaahaahiya asaanaaya, mihuwo niinamatjaya, niinama tjolapo yoGosen. ⁹ Yaahorwaa niicaarotjaya, naatthu entji. ¹⁰ Waphiyatjalyaaya wa Atade, nphantte womuro Jordao, ayenatja yaahotjukulatja ventji niwunla. Jose aahovira mahuku saapa awunlelaka athumwaane. ¹¹ Owakathi wooniyaawe naatthu wiira aanawunla wa Atade, ayenatja yaahiiratja: Ola owakathi wootjukulatja waatthu owiigiipitu. Weenan'na yeeyo nipuron'ne niihaniye Abel-Mizraim waattaman'na Jordao. ¹² Vano, asaana aJaco yaahopanka phanka tjaahimeeriyaawe. ¹³ Yaahonteessatja npaka elapo yooCanaa ni aahossikhiya n'nikhukuni, oMacpela, waattamenla oManre. Abraao aanoothuma nikhuku noopheela ossikhaniya. Anthuman'nale Efrom. ¹⁴ Wamanlyaawe waassikha athumwanawe, Jose aahohokoleela wiigiipitu, vamotja naassihimaawe, ni yaale ooteene yaan'veleelale wuussikhani waathumwaane. ¹⁵ Assihimaawe Jose woonalyaaya wiira athumwaane ahokhwa, yaahiiratja: Wakhala wiira Jose haana nruukwa mwaha wayootakhala emootheryaleehu? ¹⁶ Vano, ayenatja yaahovahenra hikhanta waJose, yiiraka: Athumwana ahinakhwa yaahonihimeerya etthu, yiiraka: ¹⁷ Mwan'himeerye Jose: Sontte, waalevenle assihimaa ni yootakhala tjoopankalyaaya. Vano, waalevenle ananteko aNluku aathumwanaa. Jose aahunla owakathi woonalyaawenikhantan'ne. ¹⁸ Assihimaawe yaahokokhora ohoolowawe ni yaahiira: Hi naanantekweenhu. ¹⁹ Ni Jose aahowaakhulatja: N'hoovatje. N'nava kiri nipuro naNluku? ²⁰ Ekhweeli n'nakilupatthatja, massi Nluku hoonela okhala yooreera, wiira akhalihe saana ekumi tjaatthu entji, phanka tjinooneenhu olelo. ²¹ Vano, n'hoovatje. Kinaahala woothoonherani naassaaneenhu. Yena aahaalipihera wanrimani. ²² Jose aahokhala wiigiipitu naamutji aathumwaane. Yena aahokhala eyaakha emiya wokhuumi. ²³ Joe aahowoona asaana aEfraim npaka nikhoto noneeraru. Yena tootho aahowoona asaana aMaquir, mwaana aManasses. Ayenatja yaahoyaratja wa Jose. ²⁴ Jose aahowiirela assun'nawe: Kihanle okhwa, massi Nluku naahala wooweelani ni naahala woowelihani elapo yanluphelihalyaawe Abraao, Isaque ni Jaco. ²⁵ Vano, Jose ahaalaphiha atthu owiisrael, yiiraka: Nluku naahala owootolani. Owakathi yooyo n'naahala oteessa makhuvaaka. ²⁶ Vano, Jose aakhwale niiyakha emiya wokhuumi. Vano, ayenatja yaahonssikhatja wiigiipitu.