¹ Waviralyaaya tjitthun'nha, aahowa ntthu ni aahomwiirela Jose: Athumwanaa anaaweren'nha. Vano, yena aahaakussa asaanaawe eeli, Manasses ni Efraim. ² Wahimeeriyaawe Jaco wiira howa mwaamwanaa npheela owoona, Israel aahiilipiha ni aahookoma wakorihi. ³ Jaco aahomwiirela Jose: Nluku oowerya tjooteene aahokikhumenla opooma yowaarya, elapo yooCanaa. Yena aahokireeriha ⁴ ni aahokiirela: Kinaahala owoolweeha noowintjiviha. Kinaahala wookhaliha atthu entji ni kinaahala woovaha maloko oohimala. ⁵ Vano asaana ooyeeli, ayariye wiigiipitu kihinaaya woophwanha, ayenatja awaka. Efraim ni Manasses an'hala okhala awaka tjitjon'mo phanka Ruben ni Simeao. ⁶ Assaana an'hala waayara waahiya ayo an'hala okhala awaa; ni mwantjina waasun'naa anaahala waakhela yoohalana. ⁷ Kontha wawaalyaaka oPada, otjukulatjawaka, Raquel khwale ninttala elapo yooCanaa, wahaleelaaya vakaani opheela ophiya oEfrata. Kaahonssikha ninttala wooEfrata, oBelem. ⁸ Israel waawehalyaawe asaana aJose: Aahokoha phan'napanyaala? ⁹ Jose aahaakhula: Asaanaaka, Nluku akivahalyaawe. Israel aahomwiirela: Okiwiihere kaareerihe. ¹⁰ Meetho aIsrael khayoonatho mwaha wowuuluvala, phimaana khaawehatja. Jose aahaarweeha asaana npaka waryaawe, aahaasalaamiha. ¹¹ Israel aahomwiirela Jose: Akaawehenra wiira kaanaawoonatho, massi Nluku hokitthuniha wiira kiwoone asaanaa. ¹² Jose aahaakumiha ottuliwawe Israel, vano, aahokokhora. ¹³ Jose aahaakussa ooyeeli, Efraim moonuwaawe nlopwana arwaaka moono nthiyana wa Israel, ni Manasses moonuwaawe nthiyana arwaaka moono nlopwana wa Israel, ni aahaawiihatjera vaaryaawe. ¹⁴ Israel aahomweessenra ntatanawe nolopwana vamuru wa Efraim, omuulupale, ni ntatanawe neethiyana aahomweessenra Manasses, phaakumaanihaawe matataayo, kontha Manasses aari owantjeriya. ¹⁵ Israel aahonreeriha Jose, iiraka: Nluku yoole nkhala nan'nathumwanaka Abraao ni Isaque, Nluku nkikhavihera npaka nihuku olelo, ¹⁶ nlaikha ninkikhavihera tjowoopiha tjooteene, mwaareerihe assilopwanaala. Ni ntjinanaka nitjuwanye, nintjina nan'nathumwanaka, Abraao ni Isaque. Ni yintjivihanatje nlaponi. ¹⁷ Jose wawehalyaawe moon nlopwana waathumwaane vamuru wa Efraim, khawantjivenle. Vano, yena aahokumiha ntata naathumwaane ni aahokumiha vamuru wa Efraim arweehaka wa Manasses. ¹⁸ Jose aahowiirela athumwaane: Tjon'mo mena, paapa, kontha yena muulupale. Nmweesenr ntataninhu vamuruwawe. ¹⁹ Athumwanawe yaahokhotta ni yaahiira: Kinaatjuwela, mwaamwanaka. Ni yena n'hala okhala ntthu, ni yena n'hala okhala muulupale. Massi mwaamun'na n'hala okhala muulupale wonvikana yena, ni nlokonawe nin'hala okhala naatthu entji onlaponi. ²⁰ Israel aahaareeriha nihukun'ne naala moolumwaala: Atthu aIsrael an'hala oreerihiya nimatjineenhu, yiiraka: Nluku ookhaliheni phanka Efraim ni Manasses. Weenan'na yeeyo, Israel aahomweessa Efraim ohoolo wa Manasses. ²¹ Israel aahomwiirela Jose: Kinaakhwa phiyaaru, kontha Nluku naahala okhala nimi, ni Yena nawoohokolossesra elapo yan'nathumwana. ²² Phanka ntthu ookhala vatjulu waassihimaa, kinawoovaha mwaako okussalyaaka wan'naamorreu okhottoni.