¹ Israel aahokhuma ni tjitthu tjooteene tjaarinaawe ni aahorwaa oBerseba. Waphiyalyaawe aahovaha okuttho waNluku waathumwanawe Isaque. ² Nluku aahuuluma ni Israel nttorani ohiyu, iiraka: Jaco, Jaco. ³ Yena aahaakhula: Kiriiva. Nluku aahiira: MikiNluku, Nluku aathumwanaa. Ohoove orwaa wiigiipitu, kontha kinaahala wookhaliha nikhoto nuulupale. ⁴ Nin'hala okhala nkhayi, ni weekhweeli kinaahala woohokolossa. Ni Jose naahala otthuka meethwaa nimatataawe. ⁵ Vano, Jaco aahokhuma oBerseba; ni asaana aIsrael yaahonkussa Jaco athumwanaya, asaanaaya naasaaraya, nmikukuttani Farao tjaarumihalyaawe wiira akussiye. ⁶ Ayenatja yaahokussatja enamatjaya nitjitthutjaya tjaathukumanihalyaaya elapo yooCanaa. Jaco naassimutjaawe yaahowa wiigiipitu. ⁷ Aahaakussa asaanaawe naasaana aasaanaawe naasimutjaawe ooteene. ⁸ Ala phamatjina aasaana aIsrael yaarwaale wiigiipitu: Jaco naasaanaawe: Ruben, mwaana owantjeriya ni Jaco, ⁹ asaana aRuben: Hanoque, Palu, Hezrom ni Carmil. ¹⁰ Asaana aSimeao: Jemuel, Jamim, Oade, Jaquim, Zoar ni Saul, mwaana anthiyana aakhala oCanaa. ¹¹ Asaana aLevi: Gerson Coate ni Merari. ¹² Ni asaana aJuda: Er, Ona, Sela, Perez ni Zera, vano Er ni Ona yaakhwale elapo yooCanaa. Asaana aPirez yaari Hezrom ni Hamul; ¹³ Asaana aIssacar: Tola, Puva, Lobe ni Sinrom. ¹⁴ Asaana aZebulom: Serede, Elom ni Jaleel. ¹⁵ Ala asaana aLeia yaayaran'nyaawe Jaco oPada-Ara, on'hiya mwaamwanawe Dina. Asaanaawe ooteene yaari talaathiini. ¹⁶ Asaana aGade: Zifiom, Hagui, Suni, Ezbom, Eri, Arodi ni Areli. ¹⁷ Ni asaana aAser: Imna, Isva, Isvi niBeria, ni Sera, mwanrokoratjaya; ni asaana aBeria: Heber ni Malqiel. ¹⁸ Ala phaasaana aZilpa, Labao an'yaranalyaawe Leia; ni yaala aayarale ni Jaco, ooteene yaari khuumi nasita. ¹⁹ Asaana aRaquel, amwaara Jaco: Jose ni Benjamim. ²⁰ Ni yaahon'yaratja Jose, elapo yowiigiipitu: Manasses ni Efraim, yaayo yaayaralyaawe ni Asenate, mwaana Potifera nankuttho oOm. ²¹ Asaana aBenjamim: Bela, Bequer, Asbel, Gera, Naama, Ei, Ros, Mupim ni Arde. ²² Ala phaasaana aRaquel, yaayaralyaawe ni Jaco, ooteene yaari khuumi natjesse. ²³ Mwaana aDa: Husim. ²⁴ Asaana aNaftali: Jazeel, Guni, Jezer ni Silem. ²⁵ Ala phaasaana aBila, Labao yaavahalyaawe mwaamwanawe Raquel; ni yena yanvahale Jaco, ooteene yaari saapa. ²⁶ Atthu ooteene yaarwaale ni Jaco wiigiipitu, yaari assimutjaawe, woohiwaalikela asaara aasaanaawe, ooteene, yaari atthu suthwiini nasita. ²⁷ Asaana aJose yaayareliye wiigiipitu yaari eeli. Atthu ooteene yaakhala waJaco yaarwaale wiigiipitu yaari sapiini. ²⁸ Jaco aahonveleeliha Juda ohoolo wonthukumano waJose, wowiira yoola akusse nttala wooGosen; ni yaahophiya elapo yooGosen. ²⁹ Jose aahotthonkomaniha nkukutthaawe arwaaka omoonan'na Israel, athumwaane, oGosen. Yena aahowoona, aahaakapatta ni aahunla owakathi mwintji. ³⁰ Israel aahomwiirela Jose: Vano ohophiya owakathyaaka wookhwa, kontha kihoona ekhovyaa, nanlelo ohaavo. ³¹ Jose aahowiirela assihimaawe niitthoko yaathumwaane: Kinaahala orwaa ni wuulumatja waFarao kiiraka: Assihimaaka nitthoko yaathumwanaka, yaari elapo yooCanaa, ahokiphwanha. ³² Alopwana ahakheli, kontha ayenatja anaakhalenla enama. Ni yaahowaana enamatjaya, nitjitthu tjooteene tjaarinaaya. ³³ Vano, Farao awiihanani ni ookohani: N'novara rittani? ³⁴ Mwaakhuleke: Anantekweenhu yaari ahakheli ekhumelo yeenamwane npaka n'nava, hiivano nan'nathumwanihu. Mwapanke yeeyo, vano, n'nohala okhala elapo yooGosen, kontha n'hakheli ooteene onama oophwanela owiigiipitu.