¹ Jose aahomwiirela nkhulupale ovapuwaniwawe, iiraka: Waavahatje eyoolya yintji atthwaayo, tjinhalaaya okhwitiri okussa, ni ohele nssurukhu wakhula essaakhwaaya. ² Ohele etthuvwaaka yoparatha, nssaakhonimwayan'mo, ninsurukhu wotjitthutjaya. Ni yena aahopanka phanka Jose tjaahimyalyaawe. ³ Owitjissu, alopwana yaahorwaa niinamatjaya. ⁴ Wakhumatjalyaaya npooma, massi yaari ahinattaliviha, Jose aahomwiirela nkhulupalyaawe: Ovuwe ovire waattharaka atthwaale, ni waaphwanhavale, wiirele: Nkussenreni yooreera nuutakhali? ⁵ Khinakhala etthu envurerya amwenyaaka, ni enwasseranaaya ehako? N'hopankatja yootakhala. epankaleenhwiiyo. ⁶ Nkhulupalyoole aahaaphwanhatja nii aahowaakuleliha moolumwaala. ⁷ Ayenatja yaahomwiirelatja: Amwenyaaka ankowuulumelani moolumwaala? Anantekweenhu khanuuluma tjitthu phankan'nho. ⁸ Nkawehani nssurukhu ophwanhaleehu nmassaakhoniwihu, nihoohokolosseran elapo yooCanaa. Van, naakowin'yerani nntthoko naamweneenhu ewooru wala eparatha? ⁹ Wayoole wanhu nkoophwanhaniya, akhwe, nihi nin'haka okhala epottha tjaamwenyaaka. ¹⁰ Nkhulupale aahiira: Moolumweenhu akhale yaayo. Yoole n'hala ophwanhaniya n'hala okhala epotthaaka, akhwaawaayo khan'hala wiireetthu. ¹¹ Vano, khula ntthu aahohiya nrupaawe vathi, ni khula ntthu aahotthukula nrupaawe. ¹² Nkhulupalyoole antjerale okukhurya nrupa wamuulupale npaka omalihera omwankaani ni aaphwanhaniye omwankaani Benjamim. ¹³ Vano, ayenatja yaahaahulatja ekuwotjaya. Khula ntthu aahokussa enamaawe ni yaahohokoleela opooma. ¹⁴ Juda aahorwaa naassihimaawe owanuwawe Jose. Yena iira nari woowu nanlelo, ni yaahokokhora ohoolowawe. ¹⁵ Jose aahaakohatja: Npankatjaleni? Khan'notjuwela wiira ntthu phanka mi kinaaloha? ¹⁶ Juda aahiira: Nin'hala waahimeeryani apwiyaka? Ninkowiiratjani? Wala nin'hala opankatjani? Nluku hotjuwela tjipankalyaaya anantekweenhu. Nkaweha, nin'hala okhala epottha tjapwiyaka, okhuma hiivano nuule aaphwanhaniye etthuvo. ¹⁷ Jose aahiira: N'hipanketho. Yooyo nlopwana aavaraniyooyo n'hala okhala epotthaaka, massi, akhwaawaayo, nrwee ninrettele waathumwaninhu. ¹⁸ Vano, Juda aahomwaattamenla ni aahomwiirela: Pwiyaaka, munviriyane nantekweenhu enpheelaawe ohimya, wowiira orusiyawinhu ohinphwanhe nantekweenhu, kontha nhu nri phanka Farao. ¹⁹ Apwiyaka yaahaakoha anantekwaaya yiiraka: N;haanatja athumwaninhu wala assihimeenhu? ²⁰ Ni nihowaakhula wiira: Nihaana athumwanihu, owuuluvala nimwaana n'motja. Ni mwaamun'nawe hokhwa, yooyo phihanle paassi, naathumwaane ananfenta. ²¹ Vano, nhu n'howiirela anantekweenhu: Nkiwiihatjre varyaaka kimoone. ²² Waviralyaaya eyo, naahimeerye afuntiihu: Mwaanooyo haahiye athumwaane, kontha athumwaane yaanaakhwa yan'hiyaka. ²³ Vano, mwaahowiirela anantekweenhu: Mwaamun'ninhu eehirwee ninhu, khan'noonatho ekhovyaaka. ²⁴ Warwaaleehu wanantekweenhu, athumwanaka, nihaahimeerya moolumweenhu. ²⁵ Athumwanihu yaahiira: Nrwaatjetho mwathumatje eyoolya. ²⁶ Vano, naahiira: Khaninrwaa, Mwamun'nihu etthyaako akhala nihi, ninaarwaa, massi khanin'hala otthunihiya woona ekhove yanlopwana mwmun'nihu woohikhala nihi. ²⁷ Nantekweenhu, athumwanaka, ahoniirela: N'naatjuwelatja wiira amwaaraka akivahale assaana eeli. ²⁸ N'motja hokitthawa, nimi kaahiira: Weekhweeli hiiviya, ni akimoonaletho. ²⁹ Vano, mwankussakathoola, emwiiraneelaka etthupiitthu, kinaahala okhwa. ³⁰ Vano, kahokoleela wanantekweenhu, athumwanaka, woohimwaanooyo, wanamoonyaa wiira n'nepeenhu n'motja nimwaanooyo. ³¹ Awavale khari niiivano, yena naahala okhwa. Anantekweenhu anaahala okhwa. ³² Nnatekweenhu nkhuluveliya nimwaana athumwanaka, yiiraka: Kaahoowaaneleni, athumwanaka phan'hala okhala nimakoossi oohimala. ³³ Vano, sontte, ntthunihe wiira nantekweenhu akhale nipuro namwaana phanka epottha yaamwenyaaka, ni mun'hiye mwaana arwee naassuulupalyaawe. ³⁴ Vano, kin'hala orwaa tjani waathumwanaka mwaanooyo woohikhala nimiivano? Kinamoova yootakhala yaahala waakhumenla athumwanaka.