¹ Yaahomalihiya erimu niitthaya ni tjooteene tjaarivo. ² Nihuku nonasaapa, Nluku aahomaliha tjooteene tjaavaralyaawe, ni nihuku nen'ne, nluku aahomumula. ³ Ni Nluku aahoreeriha nihuku nonasaapa ni aahottakattifiha, kontha aahomalihera miteko tjooteene tjaavaralyaawe. ⁴ Ala phimakhalelo owiirimu ni vathi, owkathi wunpiyaaya. Apwiya Nluku wunpalyaaya erimu niitthaya, ⁵ khayaarivo mataakhuru ni khuuvo nri waaphuwela, kontha aPwiya Nluku yaari ahinakurussa epula ni khaavo ntthu aalima vatthayani. ⁶ Massi okame pwaanaaniha etthaya. ⁷ Vano, Nluku aahomunpa ntthu nintthupi notthaya, aahonpuussera nphulani nonvaha ekumi ni nlopwanoole aahokhala nkumi. ⁸ Nluku aahotthukula ematta, yiihaniya Eden, ni aahomweessa nlopwana aamunpalyaawe. ⁹ Vatthayani, Nluku aahophuwiha khula enan'na yonri tjoophwanela olya. Wootakaneela nri weekumi, waari eriyari ematta, ni nri wootjuweliha yootakhala ni yooreera. ¹⁰ Nro n'motja waakhuma, ni maatjyaayo yaakhuruwela Eden ni yaaniikawanihatja ephantte tjesse tjo muro. ¹¹ Ntjina nowantjera naari Pisom. Yooyo phaarukureerya etthaya yooHavila, waaphwanhanyaa ewooru. ¹² Ewoorwaaya etthayeeyo yomaana. Ni vaava yaanaphwanhanyaa maluku ooreera. ¹³ Ntjina nomuro yonayeeli yihaniya Giom. Eneetta etthaya yooteene yooCoxe. ¹⁴ Ntjina nomuro yoneeraru yiihaniya Tigre. Eneetta nphantte wooAssiria. Emuro yoneetjesse yiihaniya Eufrates. ¹⁵ Nluku aahonkussa nlopwana ni aahomweessa n'hina womatta Eden wiira akhalenle noolima. ¹⁶ Nluku aahomwiirela nlopwana, iiraka: Wakhula nri womatteela, olyeke. ¹⁷ Massi, nri wootjuweliha yootakhala ni yooreera, ohilye, kontha, nihuku nin'hala olya, onaakhwa. ¹⁸ Vano, Nluku aahiira: Khwavareerenle nlopwana okhala veekha. Kinaahala opnka ettheremaawe. ¹⁹ Nluku nunpaleene vatthayani enama tjooteene niinuni tjooteene wiirimu, Yena aahon'waanela tjooteene nlopwanoole wiira avahe matjina. Ni ntjina naahalaawe ovaha nlopwanoole wakhula etthu yoomumula, nen'no phaakookhala ntjinanaya. ²⁰ Nlopwanoole aahovaha matjina enama tjooteene, enuni tjowiirimu, ni tjitthu tjooteene tjon'mattani. Massi nlopwanoole, khaarina amwaarawe. ²¹ Nluku aahonkurussela ekhove tjuulupale nlopwanoole, ni yena aahorupa. Nluku aahomyaa niparari ni aahottiyela niirutthu. ²² Niparari Nluku naakumihalyaawe, yena aahomunpa nthiyana ni aahonrweeha wa Adao. ²³ Ni nlopwana aahiira: N'na nikhuva nomakhuvaaka, erutthu yorutthwaaka. Ayena an'hala wiihaniya nthiyana, kontha yunpiye wanlopwana. ²⁴ Phimaana, nlopwana naahala waahiya anumwanawe naanumwanawe, ni nkookhala naamwaarawe, naayenatja an'hala okhala erutthu emotja. ²⁵ Ooyeeli yaari matamata, nlopwana naamwaarawe, massi khayoonelana ehaaya.