¹ Vano mwene Dario aahorumiha wiira tjawehawehiye tjowantikhatjiya enupa yooBabilonia. ² Epooma yoolipihatjiya ya Ecbatana, epooma ya Media, aahophwanhiya ntthu n'motja, niyoola phaatjuwelatja. ³ Mwaakha woopatjera wa mwene Ciro, aahokumiha nlamulo mwaha wonupa yaNluku oJerusalem: Wiira enupeyo etekiye phanka nipuro noovahiya okuttho, yantjere otekiya, orekamawaya ekhale emeeturu ssithwiini, ni wuunuwawaya, emeeturu ssithwiini, ⁴ niiliinha tthaaru tjomaluku moolupale niiliinha emotja tjothaapwa, ni tjoolanliya yalive amwene. ⁵ Vano, wahokolosse tjitthu tjowooru niiparatha tjonpaani mwaNluku, tjen'nho Nabucodonosor tjikussalyaawe npaani oJerusalem arweehaka oBabilonia. Ohokolossere oJerusalem ni ossunke npaani mwaNluku. ⁶ Vano, Tatenai, nkhulupale oopooma ohiya omuro, Setar-Bozenai naahooleliinhu ari opooma oiya emuro Eufrates, nkhumatje nipuron'no! ⁷ Wowiira hikhale niikelakeliha muntekoni mwonupa yaNluku, wowiira nkhulupale nimahumwaawe ateke enupa yaNluku nipuronaya. ⁸ Kinaahimyatja enpheeleenhu ovara nimahumu omajudeu anteka enupa yaNluku: tjookumihatjiya tjaakhenliye opooma ohiya emuro Eufrates, yaalivatje atthu ooteene, wowiira ntkooyo ohemelele. ⁹ En'hala okhala yooteene: wakhula enan'na yonama tjoopheela ovahiya okuttho waNluku owiirimu; etthaka, maakha, nipha wala makhura, wonayeeli moolumo aanankuttho oJerusalem, mwaavahatje yaayo, mahuku ooteene, woohihaleela. ¹⁰ Npankatje tjitjon'mo wowiira akusse tjoovahiya tjooreerela waNluku owiirimu ni nkivekelele, mwene, naassaanaaka. ¹¹ Kinaahimyatja, yoole n'hala ohittharenla nlamulo, nipottonawe nonupa naahala ohaleela. Enupaawe enaahala okwanhuwatja mwaha woyeeyo. ¹² Nluku khalihale ntjinanawe, anmorisse khula mwene wala ntthu n'hala ovussa moono woopheela ohonona ekettelo wala woopheela okwanhula enupa yaNluku oJerusalem. Mi Dario, kihokumiha nlamulon'na, nivaressessiye nin'nema! ¹³ Vano, wanavirale owakathi wonlamulo naaveleelihiye ni mwene Dario, Tatenai, nkhulupale oopooma okhuma nphantte womuro Eufrates, Setar-Bozenai naahoolelyaawe yaahopanka tjooteene mwene Dario tjaahimyalyaawe. ¹⁴ Mahumu aajudeu yaahoteka phanka Ageu ni Zacarias tjaahimeeryalyaawe nttorani. Ayenatja yaatekatjale wonayeeli ninlamulo naNluku owiisrael niikettelo tja Ciro, tja Dario ni tja Artaxerxes, mamwene oPersia. ¹⁵ Enupeeyo yaamalihiye nihuku noneeraru womweeri naAdar, mwaakha wonasita ohoolela wamwene Dario. ¹⁶ Atthu owiisrael, anankuttho, ni yaahanle ootthukeliya yaahotthaba nuutteeliya otthukuliya wonupa yaNluku. ¹⁷ Ayenatja yaahovahatja tjoovaha, enama emiya piili niipwittipwitthi emiya piili waatthukuliya enupa yaNluku. Myaapu khuumi namiili tjaahovahiya hanka tjoovahiya tjotanpi wa Israel ooteene, emotja wakhula nihimo nowiisrael. ¹⁸ Naayenatja yaahathanlatja anankuttho mookawanyaatjaniwaya naalevita muntekoni mwaNluku oJerusalem, phanka tjantikhiyaaya nliivuruni mwa Moises. ¹⁹ Vano yaale yaarivo yaahottapela essukuhulu nihuku nonakhuumi namatjesse womweeri woopatjera. ²⁰ Anankuttho naalevita yaahoreerihanatja ni yaahopankatja okuttho wossukuhuulu wayaale ooteene yaarivo, yiitakaniheraka. ²¹ Atthu owiisrael yaalyale wassukuhuuluni yaari yaale yaahokolyaale, yaakhumale mootakhalani mwaatthu ni yaapheelatjaka Apwiya, Nluku owiisrael. ²² Yaahotthapela nootteeliya essukuhuulu yophaawu tjoohimiropo, mahuku saapa, kontha Apwiya yaahaawaanela ohakalala ni yaahorukunussa nrima wamwene oAssiria mwaha waayenatja, wowiira yaalipiheratje nteko wonupaaya, enupa yaNluku owiisrael.