¹ Mwaakha wonasaapa, atthu owiisrael anahokolyaale n'mapoomamwaya, atthu yaahothukumana, phanka ntthu n'motja, oJeruslem. ² Jesua, mwaana Josadaque, naassihimaawe, anankuttho, Zorobabel, mwaana Sealtiel, naassihimaawe yaahaatekatja altaare aNluku owiisrael, waavahatjalyaaya okuttho, phnaka tjaahimiyaaya nketteloni mwa Moises,nlopwana aNluku. ³ Altaaryaayo yaahoweessenratja epulooku, mwaha wowoova waarinaaya naatthu. Aenatja yaahovahatja tjoovaha waaPwiya owitjissu nuutjootjilo. ⁴ Tootho yaahoweheeha essukuhuulu yonupa yaNluku, phanka tjantikhiyaaya, ni yaahovaha tjoovaha, wanssela waniilela, phanka tjaahimiyaaya, khula nihuku. ⁵ Tjitjon'mo tjaahaavo tjoovahiya tjokhula nihuku ni tjoovaha tjossukuhuulu tjaaPwiya, vamotja ni tjoovaha tjowiivahenra. ⁶ Ayenatja yahantja ovahatja tjoovaha waaPwiya, nihuku nowantjera womweeri wonassaapa, tjaanoohikhalaru ekettelon'nho nkapela. ⁷ Yaahaavahatja eparatha atthu yaateka naatthu yaassararya: niiyoolya tjoowuriya ni makhura atthu yaakhala oSidom ni oTiro, wowiira aveleelihe ecedro yo Libano wa Jope, niipahari, phanka tjaatthuiheriyaaya ni Ciro, mwene ooPersia. ⁸ Vano, mweeri wonayeeli womwaakha wonayeeli, anawaatjale npaani mwaNluku, oJerusalem, Zorobabel, mwaana Sealtel, ni Jesua, mwaana Jozadaque, naanankuttho yaahanle, alevita ni yaale yaahokolyaale wootthukiyani oJerusalem wantjeralyaaya nteko. Ayenatja yaahaakussatja a,evita oyaakha ssiriini woorwaa ohoolo wiira akhalele nphantte waatekiyaaya enupa yaaPwiya. ⁹ Vano yaahorwaatja wa Jesua naassaanaawe naassihimaawe, Cadmiel naassaanaawe, ni anonttharenla Hodavias, wiira akhalele nphantte miteko tjonupa yaNluku, tjitjon'mo naassaana aHenadade, assaanaawe naassihimaawe, alevita. ¹⁰ Mafunti ooteka yaahookomatja mwaatekiya enupa yaaPwiya, yaahowa anankuttho niikuwotjaya nimapenkaaya, ni alevita, assaana a Asafe, yaahowiipela Apwiya niitjipo, phanka tjaahimeeryatjiyaaya ni Davi, mwene owiisrael. ¹¹ Ayenatja yaanawiipatja, ni waassukhuru Apwiya: Ayena phooreera, kontha ekiriritjaya khatjin'mala wiisrael. Atthu ooteene yaahowiipela Apwiya nootteeliya tjinene kontha enupa yaaPwiya yaahantjeriya. ¹² Massi anankuttho entji, alevita, ahooleli aamutji, oolupale, yaawehale enupa yantjeriye yaahunlatja tjinene, ohoolowaya, yaahantjera otekiya enupa yaaPwiya. Entji yaakhuwela nootteeliya. ¹³ Weenan'na yowiira ohitjuwanyee wunliya waatthu, kontha atthwaayo yaanakhuwela tjinene, tjooruma tjiiwanyaa ottayi.