¹ Nomala ovira eyo, kahiweha malaikha matjese yemenlene iphantti tjese tja vathi, avaraka epheyo wira eivekhulele elapo, n'nakhala m'matjini, n'nakhala m'mirini. ² Ni kahiweha nlaikha nikina niwelaka oholo wa onkhuma ntjuwa, arinene yotthukiya ya Muluku nkumi. Ni nahikhuwela ni ntju nulupale wa malaikha ale matjese yakhelale owerya wokwakwanyula elapo ya vathi ni matji, niiraka: ³ ''N'hikwakwanyule elapo ya vathi, n'nakhala, matji, n'nakhala miri mpakhala nilepe iyutji tja arum'mwa a Muluku ehu''. ⁴ Miyano kahinwa numuro naale yaalakhanyiye, yari ikonto emiya emotja ni miloko mitjese ni atjese, a maoloko otene a anamwane a Wisarayeli: ⁵ a nloko na Yuda yaalakhanyiye atthu ikonto muloko na enli; a nloko na Ruben, ikonto muloko ni enli; a nloko na Gade, ikonto muloko ni enli; ⁶ a nloko na Aser, ikonto muloko ni enli; a nloko na Naftali, ikonto muloko ni enli; a nloko na Manasses, ikonto muloko ni enli; ⁷ a nloko na Simeoni, ikonto muloko ni enli; a nloko na Levi, ikonto muloko ni enli, a nloko a Issacar, ikonto muloko ni enli; ⁸ a nloko na Zebulom, ikonto muloko ni enli; a nloko na Yosefi, ikonto muloko ni enli; a nloko na Benjamim ikonto muloko ni enli yahalakhanyiya. ⁹ Numala ovira itthu in'ya, kahiwona atthu entji yahaweryaneya walakhinyiya a ilapo tjotene, maloko, atthu ni mattava, yemenlene, oholo wa ehitje ni oholo wa Mwapwittipwitthi, awaralene ikuwo tjottela, ni matakhuro m'matatani mwawe, ¹⁰ ni yanikhuwela ventji, yiiraka: ''Wopowa t'iwa Muluku ehu, okilanthi vehitjeni, ni Mwapwittipwitthi''. ¹¹ Malaikha otene yaari owemela, arukureryaka ehitje, wa manciyawu ni wa in'ye ikumi tjinkhala, ni yanikokhorela vehitjeni, ni yaninttottopela Muluku ¹² yiiraka: ''Amem! Ovuwa, warya, otjuwela, otjareya mahala, nttittimiho, owerya ni oweryaxa t'iwa Muluku ehu, n'hina wa miyakha tjintji, Amem''! ¹³ Ni anciyawu m'motja ahikuxa matju, akihimeryaka: ''Ala, awanre ikuwo tjottela, tipani ni ankhuma vayi?'' ¹⁴ Ni miyano kahira: ''Pwiyaka, nyuwano mun'tjuwela''. Ni owo ahikihimerya: ''Ala tin'yale yahawa ventji ni arapiha ikuwo tjaya akhaliha tjottela mphomeni mwa Mwapwittipwitthi''. ¹⁵ Tivo ari oholo va ehitje ya Muluku ni An'ninrumela othana ni ohiyo mpani Mwawe. Ole akilanthe vehitjeni anowatalela mitjaxa awo. ¹⁶ Khanrowa-tho ovoliya etala, n'nakhala khanvoliya-tho ntthona, n'nakhala khanrowa ophwanyiya ntjuwa, n'nakhala oviha. ¹⁷ Vano Mwapwittipwitthi ori eriyari ya ehitje onwowa okhala nkukhuli aya, ni Owo onarowa owettiha ori maatji a ekumi, ni Muluku onarowa opuputtha manthori otene m'menthoni mwaya''.