¹ Noomala itthu in'ya, miyano kahiweha wirimu kiphwanya nkhora wotthukuwa. Ntju noopatjerya kinwalyaka, ntoko ntju na mpetta olavulaka ni miyano, nahira: ''Nwele va ni kinawoniheryani enrowa wiraneya itthu tjinrowa wiraneya wananano''. ² Vowakuveya, miyano kaari m'munepani ni kahona wira yahikhala ehitje yaari wirimu, ni ntthu akilathalene vavale. ³ Yaakilathale aalikani ni nluku Jaspe ni sardoniyo. Yarukurenrye ehitje, yahikhala ekhwayi naalikana ni esmeralda. ⁴ Yarukurenrye ehitje , tjahikhala ihitje miloko muli ni itjese ni, yakilathale vavo, yahikhala manciyawu miloko mili ni atjese. Awo yawarale ikuwo tjottela ni yahikhalana ikhara tja ewero m'muru mwaya. ⁵ Vehitjeni tjanikhuma itari, etetere ni onyakula wa eteri. Ni, oholo wawe, mithoko thanu napili apahaka, iri Minepa thanu napili tja Muluku. ⁶ Ni, oholo wa ehitje, yahikhala matji ntoko evidru ninlikana ni ekristale. Eriyari ni orukurerya ehitje, tjahikhala tjoopakiya athanu tjinkhala, ootjareya mentho oholo ni ottuli. ⁷ Ookhala m'motjma akhala ntoko kharamu; a enenli aari ntoko bezero; a eneraru arima owitho ntoko ntthu; ni enetjese aari ntoko xawawe avavaka. ⁸ Ookhala ale atjese yarina mapupha mathanu namotja ni yarina oowatta mentho vathi ni otjulu. Othana ni ohiyo, awo khiyaamaala ohimya: ''Owarya, Owarya, Owarya t'Apwiya Muluku owerya tjotene, yaari, ni ari, ni ankela owa.'' ⁹ Ni wakhula okathi ookhala ale yavuwihaya, nttittimiho ni oxukhuru wa ole akilathale vehitjeni, ole oonkhala vohimala, ¹⁰ maniciyawu ale miloko mili ni atjese yaninkokhorela ole akilathale vehitjeni. Awo yaninkokhorela ole oonkhala vohimala ni yanittikhela ikhara tjaya oholo wa ehitje, yiiraka: ¹¹ ''Ekekhayi ti Nyuwano, Apwiye-hu ni Muluku-ehu, wakhela ovuwa ni nttittimiho ni owerya. Mwa Nyuwano itthu tjotene tjopattuxiya ni, ni otthuna Wenyu, tjookhala ni tjopattuxiya''.