¹ N'hina wa ekereja ya Wefesu nlaikha nin'nilepa: 'Ala momulo a Ole oneettiha itheneri thanu napili n'hina wa ntata Nawe nolopwana ni oneetta n'hina wa mithuko thanu napili tja ewero: ² Miyano kotjuwela enire-nyu, nteko enyu woolipa ni ovilela we-nyu ni olipelela. Kotjuwela wira khan'niwerya wavilela atthu ootakhala ni n'hatteha ale anihela okhala arum'mwa, vano khahiyo, ni n'haphwanya aryene owootha. ³ Miyano kotjuwela wira mun'nivilela ni olipelela, mun'nivira mottehiyani mwaha wa ntjina Naka ni khan'nittettheya. ⁴ Vano kotjuwela wira nyuwano mohiya niphento ne-nyu noopatjerya. ⁵ Vano mupuwele m'morale-nyu, mwituhuwe ni mpakeke miteko tjopatjerya. Vohikhala wira n'rimwituthuwa, kinawa wa nyuwano ni kinakumiha wa nyuwano nthuko-enyu vanipuroni waya. ⁶ V'hana, watjotene, mun'ninyokha miteko tja Anikolayita, tjen;yo-tho Miyano kin'nyokhaka. Ole ⁷ arina maru inweke Munepa on'himeryaya ikereja. Ole onrowa oxintta, Miyano kinanvaha orerela olya n'hokorokho wa Mwiri wa Ekumi, ori Oparatiso wa Muluku'''. ⁸ N'hina wa ekereja ya Wesmirna Nlaikha nin'nilepa: 'Ala molumo a Ole ori oopatjerya ni okhitjerya, okhwale ni otthikela okhala: ⁹ Miyano kotjuwela ohawa we-nyu ni ohikhala we-nyu (vano nyuwano mwa thatjiri) ni oveha wa ale anihimya okhala ayuda, vano khahiyo. Awo isinakoka tja axotwani. ¹⁰ N'hove ele nre-nyu ohawa. Xotwani ontthuna wottikhelani akina wa nyuwano nkhatteya, wira nttehiye, ni n'nahawa n'hina wa mahiku muloko. Nkhale ekekhayi mpakha okhwa we-nyu, ni Miyano kinamovahani ekhara ya ekumi'. ¹¹ Ole arina maru inweke ele en'himeryaya munepa ikereja. Ole onkela oxintta khonrowa oweha okhwa wa nenli'''. ¹² ''N'hina wa ekereja ya Operkamu nlaikha nin'himerya: 'Ala molumo a Ole arina ikatana tjothokolowa iphantti pili: ¹³ Miyano kotjuwela nyuwano onkhale-nyu, wira tinwenwe oryaya ehitje ya Xotwani. Tjitjam'mo nlelo, nyuwano mun'nikhala mwekekhayi mwaha wa ntjina Naka. Kotjuwela wira nyuwano khankhottale nroromelo ne-nyu wa Miyano, hata mahiku a Antipa, namona aka ekekhayi, akhwale eriyare-nyu, wenwo onkhala Xotwani. ¹⁴ Vano kokhala itthu n'hina wa nyuwano: Akina antthara ni ekekhayi tjoruma tja Balao, intthutjihalyawe Balaki areyaka mirakho n'hina wa anamwane a Wisarayeli, wira awo ale itthu tjavahiya amuluku a ethiru ni wira araruweke. ¹⁵ Tjitjam'mo-tho, mokhalana-tho akina antthara ni ekekhayi tjinintthutjihaya Anikolaita. ¹⁶ Vano, mwintuthuwe! Vohikhala vo, Miyano kinawa wa nyuwano vohipitja ni n'hina wa yawo kinapaka ekhotto, ni ekatana ya mwano mwaka. ¹⁷ Ole arina maru inwe ele munepa on'himeryaya ekereya. Ole onrowa oxintta Miyano kinanvaha eyolya evithiye ni kinanvaha nluku noottela ni ntjina nsya nlepiyene mem'mo, ntjina nohitjuweliya ni ntthu, vohikhala ole onakhelela'''. ¹⁸ ''Wa nlaikha na ekereja ya Otiyatira nin'nilepa: 'Ala momulo a Mwana a Muluku, orina mentho ntoko moro ni inyawu ntoko ebrontji yowoxiya: ¹⁹ Miyano kotjuwela empake-nyu, niphento-nenyu, nroromelo ne-nyu, miteko tje-nyu ni ovilela we-nyu. Ni kotjuwela miteko tje-nyu tjokhitjerya tjotepa watta ovikana tjopatjerya. ²⁰ Vano kokhala ela n'hina wa nyuwano: Mun'nin'hiya nthiyana Jezabel, onihimya okhala namalaleya matju. Ni tjowintthutjiha tjaya, on'nakuxa awixutti aka wira araruwekeni alyaka iyolya tja amuluku a ethiru. ²¹ Ni kihinvaha okathi wira yituthuwe, vano awo khantthuna wituthuwa oraruwa waya. ²² Vano Miyano kinamwaruhela eretta, tjitjam'mo ntoko ohawa ventji ni oraruwana, vohikhala onkela wituthuwa wa miteko tjaya. ²³ Kinawiva anaya, ni ikereja tjotene tjinatjuwela wira Miyano ka Yole ontjuwela mupuwelo tja atthu. Kinanvaha wakhula ntthu ottharaka ni miteko tjawe. ²⁴ Akina a Otiyatera, akina ale ahintthara tjowintthutjiha tjaya ni ahintjuwela miteko tja Xotwani, Miyano kinohimeryani: 'Nkinovahani-tho muritti woolemela'. ²⁵ Vano nkhale oolipa mpakha Miyano owa. ²⁶ Ole onrowa oxintta ni ophweha miteko tjaka mpakha womalani Miyano kinanvaha owerya wa ilapo. ²⁷ Owo onamwettiherya ni eyuma ni, ntoko mirinki tja oloko, onakwakwanyula miphantti tjovirikana. ²⁸ Ntoko Miyano kinakhelaka owerya wa Atithi Aka, Miyo-tho kinanvaha etheneri ya votjitju. ²⁹ Ole orina maru inwe Munepa on'himeryaya ikereja'''.