¹ Ni kahoweha ni kahinweha Mwapwittipwitthi emenlene omwako Osinayi. Ari ni ale ekonto emiya emotja ni miloko mitjese ni atjese, yalepiye vayutji vaya Ntjina Nawe ni Atithi Awe. ² Kahinwa ntju nimotja wirimu, ntju ntoko onyakula wa matji mentji ni ntoko na etari yulupale. Ni ntju nle nanwelyaka-tho naakhala ntoko anampetta arumihaka kipetta tjaya. ³ Awo yiipa ntjipo nsya oholo wa ehitje, oholo wa ale akumi atjese ni manciyawu. Khuvo intthutja ntjipo nlo, wohikhala ale ikontoko emiya ni miloko mitjese ni atjese athumiye elapo ya vathi. ⁴ Ale tin'yale ahinanarin'he ni athiyana, okhala wira yakhala vohithela. Tin'yale am'mutthara mwapwittipwitthi wakhula nipiro Onrowawe. Ala athum'mwale eriyari ya atthu ntoko nkuttho wa Muluku ni Mwapwittipwitthi. ⁵ N'nakhala wootha khaphwanyaniye n'yanoni mwaya; awo toohikhalana etampi. ⁶ Miyano kahiweha nlaikha nikin a nivavaka eriyari ya erimu, aarina molumo ohimala,ihapari tjorera wira alalerye ale ankhala elapo ya vathi, ilapo tjotene, nloko, mattava ni atthu. ⁷ Owo anikhuwela ventji: ''M'move Muluku Munvuwihe, vano okathi Wolamula Wawe wophiya. Munttottopele Ole opattunxe erimu, elapo ya vathi, matji ni maphattuwelo a matji''. ⁸ Nlaikha na enenli nanitthara, niiraka: ''Omora, omora Babiloniya mulupale, atthunihenrye atthu wira ahapaliyeke ni evinyu awe yohiloka.'' ⁹ Nanatthara-tho nlaikha na eneraru, nikhuwelaka ventji: ''Akhala ntthu onrowa okokhorela nsena ni elatarato aya, ni akhela ethonyeryo vantatani hata vayutji, ¹⁰ ni-tho onarowa owurya onanariya wa Muluku, eyeheriye nkalicini Mwawe vohitakanihiya etthu. Ni-tho onarowa ohaxiya ni moro ni enxofre oholo wa malaikha Awe owarya ni oholo wa Mwapwittipwitthi. ¹¹ Mwixi awe wowereya on'nikhala vohimala; ni khorina omumula, n'nakhala ohiyo n'nakhala othana, ale ankokhorela nsena ni elatarato aya, ni ale otene anakhela ethonyeryo ya ntjina naya. ¹² Ori va ovilela wa ale owarya, wa ale aninwelela tjoruma tja Muluku ni nroromelo wa Yesu''. ¹³ Miyani kahinwa ntju na wiriu niiraka: ''Nlepe: 'Orelihiya taale ankhwa mwa Apwiya''. ''Ayo'', on'nihimya Munepa: ''wira awo amumuleke muntekoni mwaya, okhala wira miteko tjaya tjinimwatthara''. ¹⁴ Kahoweha, ni nahikhala nihutte nottela ni, okilanthene vanihutteni, m'motja oolikana ni mwana a ntthu. Owo ahikhalana ekhara ya ewero vamuru vawe ni etjampeya yowasiya m'matatani mwawe. ¹⁵ Vano nlaika nikina ahikhuma mpani mwa mavekelo akhuwelaka ventji wa ole akilathale vanihutteni: ''Nkuxe etjampeyi-nyu ni mpatjeryeke ohepha, okhala wira okathi wophiya wohepha''. ¹⁶ Vano ole akilathale m'mahutteni ahiviriha etjampeyawe nlaponi, ni elapo khuhephiya. ¹⁷ Nlaikha nikina nahikhuma mpani mwa mavekelo wirimu, awanaka-tho etjampeya yothokolowa. ¹⁸ Ni ahikhuma waltari nlaikha nikina orina owerya wa moro, ni akhuwelaka ni ntju nulupale aarina etjampeya yothokolowa: ''Nkuxe etjampeyi-nyu yothokolowa ni n'hephe mavuru a evinya ntthayani, okhala wira iwuva tjaya tjookhomala''. ¹⁹ Ni nlaikha nahiviriha etjampeyaya vatthayani ni khuhepha iwuva tjapheleyha wira tjihephiye ni khutikhela nipuro noonanariya wa Muluku. ²⁰ Nipuro nlo khuttikheliya ota wa epoma ni vo khukhuma ephome mpakha ophiya mun'heliya iyuma tja ikhavalo, orekama waya wophiyeryaka ekonto ni imiya thanu namotja ikolomo.