¹ Vano kahoweha, ekhumaka vantthiyani, nsena naarina manyaka muloko ni miru thanu napili. M'manyakani mwaya, ikhara muloko, ni, wakhula muru, ntjinana nooveha. ² Nsena nawehalyaka naalikana havara, vano metto tjaya tjakhala mwa ursu, ni iyano tjaya tjaakhala mwa kharamu. Dragao ahonvaha owerya wawe, ehitje awe ni owerya wawe wuntji wowettiherya. ³ Muro m'motja wa nsena wakhala ntoko orina nikhwatta nookhwa, vano nikhwatta nahivona. Ni elapo yotene yahitthapa ni enatthara nsena. ⁴ Ni ahikokhoreliya dragao, vano ahivaha owerya nsena. Ni ahikokhorela nsena, iraka: ''Tipani onlikana ni nsena?'' ni ''Tipani okhanle owanana?'' ⁵ Nsena nahovahiya iyano nawerya olavula matju owikhurutula ni oven'ha. Ahitthuniheriya okhalana owerya n'hina mwa miyeri miloko mitjese ni mili. ⁶ Ni nahitthukula iyano tjaya wira olavule matju ooven'ha Muluku: ntjina Nawe, nipuro Ninkhalawe ni ale ankhala wirimu. ⁷ Nahitthuniheriya nsena owana ni atthu owarya ni waxintta. Ni novahiya owerya n'hina mwa maloko otene, atthu, mattava ni ilapo. ⁸ Nahittottopeliya ni otene ankhala vathi, yawo matjinaya ahilepiya nlivuruni mwa Ekumi ya Mwapwittipwitthi, yowa okhwale. ⁹ Akhala ohavo ntthu orina maru, inwe. ¹⁰ Akhala ntthu onakuxiya ntoko epottha, ntoko epottha onarowa. Akhala ntthu onakhwa ni ekatana, ni ekatana onakhwa. Vahavo va wihaneliya ovilela ni nroromelo wa atthu owarya. ¹¹ Vano kahoweha nsena nikina nikhumaka vathi, naarina manyaka menli ntoko mwapwittipwitthi, ni nalavula ntoko dragao. ¹² Nahikhalana owerya wotene wa nsena noopatjerya oholo waya ni nanipaka wira atthu otene vathi akokhoreleke nsena noopatjerya, nenlo nikhwatta nookhwa navonihiye. ¹³ Ni nanipaka mirirya tjulupale, mpakha okuruxa moro wirimu niwanaka vathi, oholo wa atthu. ¹⁴ Mwaha wa ithonyeryo natthuniheriyaya opaka, nlo nanawoka atthu ankhala vathi, niwirelaka wira apake elatarato nttittimihiyaka nsena naphwatiye ni ekatana, natthikenle-tho okhala. ¹⁵ Nahitthuniheriya wira ovahe iphumu elatarato ya nsena, wira elatarato elavuleke ni ewaneke okhwa otene ale yahakokhorela nsena. ¹⁶ Nlo nahakhanyererya otene, alupale ni atjikhani, athatjiri ni asikhini, otaphuwa ni ipottha, wakhela ethonyero ntata nolopwana wala vayutji, ¹⁷ wira ahikhale ntthu atthuna othuna etthu wala otumiha, vohikhala ole orina ethonyeryo eyo, nri numuru na ntjina nawe. ¹⁸ Va ohavo otjuwela. Ole orina otjuwela ophelatje numuru na nsena, vano numuru na ntthu, ni numuru nawe imiya thanu namotja ni miloko thanu namotja ni thanu namotja.