Ekapitulo 10
1
Vano miyano kahiweha nlaikha nikina nowerya nikhuruwaka wirimu. Nlo naari n'hina mwa meku, ni nahikhalana ekhwayi otjulu wa muru aya. Owitho waya walikana ni ntjuwa ni manyawu aya ntoko moro.
2
Nlo nahikhalana m'matatani mwaya etthu yotthukiyha etjikhini yotthukuliya, ni nahiphweha n'nyawu naya nolopwana n'hina mwa matji ni n'nyawu naya nothiyana vatthayani,
3
Ni nahikhuwela ni ntju nulupale ntoko okhuwela wa kharamu. Ni, okathi nlo nakhuwelalyaya, itari thanu napili tjahilavula.
4
Numala olavula itari thanu napili, miyano kahala olepa, numala kahinwa ntju wirimu, nihimya: ''Mpwehe vovitheya itthu in'ya itari tjihimyalaya, ni n'hilepe''.
5
Numala eyo, nlaikha kawehalyhaka m'matjini ni vatthayani nahivenxerya ntata naya nolopwana wirimu
6
ni nahinlaphela Ole onkhala vohimala, ole opattunxe erimu ni tjotene tjinkhalamo, etthaya ni tjotene tjinkhalamo, matji ni tjotene tjinkhalamo: ''Vano khonrowa opitja,
7
vano, nihiku nlaikha nle nethanu napili ninrowaya orumiha mpettaya, vano yovitheya ya Muluku enimonaneya, ntoko ahimenryawe ananteko awe, maprofeta''.
8
Ni ntju kinwalyaka wirimu nahilavula-tho ni miyano, niiraka: ''Nrowe, mwakuxe elivuru yotthukuliya m'matatani mwa nlaikha emenle m'matjini ni vatthayani''.
9
Vano kahirowa naryaya nlaikha, kihimerya wira nikivahe elivuru. Nlo nahikimerya: ''Nkuxeke ni nkhureke; ni eyo enarowa owawa va napwipwini winyu, vano mwano mwinyu enarowa onaya ntoko oravo''.
10
Kahikuxa elivuru m'matatani mwa nlaikha ni kahikhura. Yaari yonaya ntoko oravo mwano mwaka; vano, numala okhura, napwipwi naka nahiwawa.
11
Vano kahihimeriya: ''Van'nirerela wira nlaleye-tho n'hina wa atthu entji, ilapo, mattava ni mamwene''.