¹ Nobwadieri elilakano eliamberi liali nende amalako akobukholi nende obwaali bwo bunasaaye musialo. ² Okhuba mukhuchaaka inyumba yemekhebwa omwalimo esiemero sieitara, imesa, omugati kwesilorero ebilangwa esimeka esia abuundu andakatifu. ³ Ne inyuma weipasia yokhubiri khuli nende esimeka muliyema esilangwa mbwe andakatifu wobutakatifu. ⁴ Esiali nende siuchisirio sia idakhabu nende elisanduku lie lilakano liafunikhwa nende idakhabu chimbeka chioosi. Mubwene omo mwalimo indamu eya idakhabu niirimo esiakhulia sia manna, indaukhi ya Haruuni eyasebukha, nende amakina kelilakano. ⁵ Akulu wasio amakerubi koluyaali kafunikha esisala siesisa, esiakhuranyala okhulomalomerakho bikha bino muburambi. ⁶ Khu kario ebiindu bino nibiakhamala okhurebwao abakukhaani bengiranga muikhekalu bulilwosi musimeka sieimberi nibosirisia obukholi khu Nasaye. ⁷ Naye muyokhubiri yengirangamo omukukhani mukhongo yeng'ene, lulala khumwaka nali nende amabanga akayamaliranga omusango kwaye halala nende amabi kabaandu baandi. ⁸ Roho Mulafu yekesia mbwe ingira ilia eyokhwingira andakatifu wobutakatifu isiri khwikukha nikaba mbwe ikhekalu ikhale isiiriwo. ⁹ Sino siali esimanyiro khubikha bino, ebiaanwa nende ebisaakhiro bia banasiaalo sibialabiangia ulia orusisie nende okhukhola amaparo kaye okhuba amolerefu. ¹⁰ Bino bialondana sa nende chinyama nebiokhung'wa, nokhwosibwa khukabukhane mumikholo kiesinamundu, ekia badwikhibwa okhuula ebikha bio bwekalukhasi. ¹¹ Naye Yeso ulia mukukhani mukhongo webiindu bilayi bicha, khubirira munyumba ilia ikhongo khandi eyulilire, eirakholwa namakhono komundu, yila iralondana nende esiumbakhe sino. ¹² Arali amabanga kechimbusi nende ebimoosi, abula akaye mwene yengira abuundu andakatifu lulala lwong'ane narunyoolera obununuli buralibwayo. ¹³ Ne nikaba mbwe amabanga kechisurusi nende chimbusi halala nende amakokhe ake imosi kaanywangwa, okhulabia balia abasialabisibwa emibiri, ¹⁴ sinokhukhirao muno amabanga ka Kiristo oweyama omwene khubirira muroho wobulamu yeyana esisakhiro sirali nelikondo khu Nasaye khulwo khulabia, amapaaro khurula mubikhole bifu, bakholere Nasaye omulamu? ¹⁵ Khu liene lino ye nomwaambani owelilakano liyakha, okhubirira mulifwa khulwokhununula abo abaali belilakano lieimberi khurula muchimbi chiabwe, balia abalangwa banyoole esisubisio siobulamirwe burabwaayo. ¹⁶ Owe lilakano lio bulaame liri, khandi bikhooyera abeo oyo oufwira lilakano elio. ¹⁷ Khulwo khuba elilakano liobulamirwe liri namaani khubafu, ne libula amaani khuulia osiri mulamu. ¹⁸ Kata elia rangira liosi liachaakwa nende amabanga. ¹⁹ Olwa Musa yasomera abaandu ebilagiro bilondana nende malako, yabukula amabanga kebimosi, nende chimbusi, nende amachi , nende obwoya bwakhanyu, halala nende Hisopo niyanya khusitabo nende abaandu boosi. ²⁰ Nabola ari, ''Kano namabanga kelilakano lia Nasaye yabambanisiriamo.'' ²¹ Khandi niyaanya amabanga khu liyema lilia halala nende ebiindu bioosi biomukhekalu ebie khonyirwangwa mubukholi. ²² Ambi buli siindu siosibwanga namabanga khulondana nende elako, khulwo khuba obubi sibwakharusibwao abula okhwidikha mabanga. ²³ Khu kario bienyekhana ebilolero biebiindu biomwikulu biosibwe birio, nende ebisakhiro biebisolo. Arali ebiindu bwomwikulu biene biamala bilabisibwe nende ebisakhiro ebili bilayi khukhirao. ²⁴ Kirisito siyengira andakatifu yakasibwa namakhono, esiri sifwanani siadieri, arali mwikulu yene mbwe alolekhe imberi wa Nasaye khulwa efwe fweesi. ²⁵ Sibiri mbwe yerusienge nga esisaakhiro buli sikha, muisambo ngeyabakukhani bakhongo bengiranga andakatifu buli mwaka nende amabanga kesiindu sindi. ²⁶ Biakhabere birio, khwakhabere okhusandisibwa khuungi muno khurula mukhuchaaka khwesialo. Arali yerusia omwene lulala ngesisakhiro khulwo khumalao echimbi chesialo. ²⁷ Khu kario abaandu barerwao okhufwa lulala, nesilondakho nokhukhalakirwa, ²⁸ khu kario Kirisito yarusibwa okhukinga obwonooni bwabaangi, naye khubalia abamusubiriranga alilolekha olwa khabiri abula obwonooni khubalia abamulindiriranga khulwo buonia.