¹ Khulwo khuba khubodokhanwe nende lilesi likhongo liabaloli, khulekhule obusiro bwosi nende obwonooni buruboyanga mubwangu, khube nobwesimirisi khulwo khwirukha chimbiro chiri imberi wefwe. ² Nikhulingera Yeso ouli muchakisi khandi omumalilisi welisubira liefwe. Owesimirisiria omusalaba khulondana nende isangaalo yaali ninaye, nalekeresia chisoni, namala niyekhala khumukhono musaacha kwe sisala sia Nasaye. ³ khulwesio, paririsiekho oyo owesimirisiria obusuku bukhongo nga obwo okhurula khu bakholi bechiimbi, murola mwajong'a nende okhufwa emioyo. ⁴ Musiri okhwekaya bwonooni khuula khuchukha mabanga: ⁵ khandi mwibirire okhudinyisibwa khwamwanyoola nga abaana, nobolerwa mbwe: ''Mwana wange oralekeresianga okhukololosebwa khwo Omwami, kose mufwe mioyo nimwalabirwa ninaye. ⁶ Okhuba Nasaye akerakanga owayakhera , khandi amala akololosie owicha khuniye.'' ⁷ Abo abafukirira okhukololosibwa , Nasaye ababukulanga nga abaana, naye nomwana sina owasamwana arakololosianga? ⁸ Kario nimukhaya obukololosi obwa buli mwana akhoyeera anyoole , awo muba muli nga baana berwanyi abarali bomunyumba yene. ⁹ Kata kario abebusi bomubiri bakharukololosianga nikhufukirira, sinimuno khu ulia ouli sefwe womwoyo kweimera nende obulamu? ¹⁰ Nibo mubwadieri barusandianga khulwebikha bididi khulwo khukhera khwabwe. Naye khulwo khurukhera yenya khube abalamirwe bobutakatifu. ¹¹ Mubikha bino khubulao okhukololosibwa khubonekhananga khuba okhwokhusangasia, arali khwokhusinyisia nende obuchuni. Ne olunyuma khureranga ebiamo biobulungifu mumulembe khu balia abafukirira. ¹² Kario mukinguule amakhono kajong'ere nende amakhumbo kafwire linakasi. ¹³ Khandi mureresie chingira, khulwa makulu keng'we, mbwe silia sioosi esilema siranyasikha arali siwonesebwe. ¹⁴ Mube ne sinani siokhukonya muleembe nende abaandu boosi halala nende obutakatifu, okhuba arali nibwo abulao ounyala khumubona Omwami. ¹⁵ Mwekenderesienge arabao oyo oulemerwa obukosia bwa Nasaye bikere omusi kweikhinda kusebukhe ,kumale kubakhe abaangi obumaanu, ¹⁶ Arabao omuyeyi kose ouraria Nasaye nga Esau, owakosia esiribwa siokhwibulwa khwaye khulwe siakhulia silala. ¹⁷ Nga olwa omanyire olunyuma niyekomba ikhabi eyo siyamala yainyola , okhuba siyanyola obweyango bwokhwekanira kata nende niyakonya mukhulira amasika. ¹⁸ Khulwo khuba simwichire khulugulu ludirikha khaba, kose olwakha omuliro, kose lilesi liesirima nende obumali nende esifusia. ¹⁹ Nende oluyoka lwa itarumbeta, nende oluyoka lwa makhuwa, oluyoka lwa balia ababulira bekomba barabolerwakho khandi. ²⁰ khuba sibesimirisiria kalia akalakwa, ne kakhabere mbwe kata '' isolo niyekuda khulugulu olwo yakhakhuyirwe nende amakina.'' ²¹ Ne kali akokhurisia kata Musa nabola ari ndirirwe nende oburi buungi nende okhurengerekha. ²² Ne mwichire khulugulu lwa Sayuni elidokho lia Nasaye mulamu , Yerusalemu yomwikulu nende malaika barabalikha. ²³ Mukhung'ano mukhongo kweikanisa yabebulwa baamberi baandikwa mwikulu, , nende Nasaye omukhalaki wa baandu boosi nende emioyo kia baandu balungifu bolerefu ²⁴ Nende Yeso omwambanii welilakano liyaakha, nende amabanga kokhunyukhirisia akolomaloma ebiindu bilayi khukhira aka Abeli. ²⁵ Lingeere muramukhaya ulia alomaloma ,khuba ngolwa baraona abakhaya owalomaloma musialo, fweesi sikhuchia okhuona nikhulekeresia ulia oulomaloma khurula mwikulu. ²⁶ ldoboosi yae yarengia esialo, ne luuno alaka ari, ''Sinjia okhurengia esialo siong'ane, arali kata likulu.'' ²⁷ Kata kario elikhuwa lino khandi , mbwe arusiao biria ebirengeresibwa manu bilia ebireyuya bidong'eo. ²⁸ kario okhuba khunyoola obwami oburadengeywa, mubukosia khukholere Nasaye mungira ifukirirwa mukhweocheresia nende okhuria Nasaye. ²⁹ Okhuba ye nomuliro kumululanga.