¹ Kario obusubiri nibulia obuchwichwisi bwamakhuwa kalindilirwangwa, esimanyiro sia makhuwa karalolekhana khaba. ² Khulwa nibwo abakhulundu befu babolwakho amalayi. ³ Okhubirira mulisubira khusubirira mbwe esialo sialongwa okhubirira mulikhuwa lia Nasaye, mbwe ebiindu bilolekha bialongwa okhurula mubiralolekha. ⁴ Okhubirira mulisubira Abeli yaana khu Nasaye esianwa esilayi okhukhira esia Kaini, khulwa nisio obuloli buboola mbwe yali omukololofu, Nasaye mwene namanyisia ebianwa biaye, ebikera kata niyafwa asiri alomalomanga. ⁵ Mulisubira Enoku yakalukhanisibwa naralola elifwa. ''Ne naralolekhana okhuba Nasaye yamubukula.'' Ne nasiiri okhukalukhanisibwa, kabolwa mbwe yajamisia Nasaye. ⁶ Ne arali lisubira sibinyalikhana okhumujamisia. Khu kario oyo yesi oumwichakho kenyekhana amanyirisie mbwe Nasaye aliwo , ne aberesaningia ebianwa khu abo abamukonya namani. ⁷ Mubusubiri Noa, nabolerwa nende Nasaye okhulondana nende akali kechanga nikasibonekhana, mukhuria nende okhwesika Nasaye, yareresia eliaro khulwo khuonia abeinyumba yaye. Khulino yakhalakira esialo esina, naye niyekhola omulamirwe wobwadieri khubirira mulisubira. ⁸ Mulisubira Ibraimu olwayalangwa okhucha musialo sia yali akhoyere alamirwe lunyuma, yafukirira namala nachia nga akorerwe owali khuchichanga. ⁹ Mulisubira yekhala ebukeni musialo silia esiayalakwa nga orali mwenesio. Niyekhala mumaema alala nende Isaka nende Yakobo, abalaamirwe ninaye abelilakano elio. ¹⁰ Khulwo khuba yali nalindiriranga elidookho eliachakisibwa nende okhumbakhwa nende Nasaye omwene. ¹¹ Mulisubira Sarah, owali niyabiririra emiaka yanyola amani kokhudira inda niyebula omwana, khulwo khuba ulia owamulaka yali omwesikwa. ¹² Kho okhubirira mumuundu mulala owali ngomufu, bebulwa abaandu baangi nge ching'ining'ini chia akulu, khandi nga wakhabona omusenye khulukuku lweinyanja okurabalikha. ¹³ Bano boosi bafwira mulisubira, nibarabwene akalakwa. Arali bakaboonera ale, nibajamisibwa nende okhukafukirira, ne nibaboola bari nabakeni khandi babira_ngira musialo. ¹⁴ Abo ababolanga ako bekesianga abulafu mbu bakonyanga obumenyo. ¹⁵ Ne mubwadieri baaba nende amapaaro kesialo sia barulamo, bakhekombere okhukalukhayo. ¹⁶ Arali bulano bekombanga esialo silayi esiomwikulu. kario, Nasaye sialola echisoni okhulangwa Nasaye wabwe, khulwo khubeera yamala okhubakasiria elidookho. ¹⁷ Mulisubira Ibraimu ngolwa yatemwa yarusia Isaka ngesisakhiro. Naberesania ulia omwana muderwa yeng'ene owa yali naberesebwe mumasubisio. ¹⁸ Muye kali kabolekha mbwe ,'Isaka olwibulo lwaye lulimanyikhana.'' ¹⁹ Kabalwa mbwe Nasaye yaali nobunyali bwo khumulamusia khurula mu bafu, ewayali namurusisie mufwaani. ²⁰ Mulisubira Isaka yaanira chikhabi Yakobo nende Esau khulwamakhuwa kali imberi. ²¹ Mulisubira Yakobo, nafwichanga, yalaamira abaana ba Yusufu, nga alaama naguname khumudiro kwaye. ²² Mulisubira Yusufu nafwichanga, yarumbula okhurula khwa baana ba Isiraili, nalakirisia okhulondana nende amakumba kaye. ²³ Mulisubira Musa niyakhebulwa, yakisibwa nabebusi baye emiosi kidaru, khulwo khuba bajamisibwa ninaye, nibararia akomuruki yabisia. ²⁴ Mulisubira Musa, ngolwa yali nakhulire, yakhaya khulangwa omwana womukhana womuruki Farao. ²⁵ Nalobola okhusanda halala nabaandu ba Nasaye, okhukhira okhuchiririra okhwesangaasia nende ako bwonooni akebikha bimbikiri. ²⁶ Nabukula okhusanda khwa Kiristo khuba okhwobukhonyi buungi khukhira emiandu kia Misiri, okhuba yadeba muno omurungo kulimo. ²⁷ Mulisubira yarula Misiri oburaria oburima bwomuruki, okhuba yali nalindiriranga ulia ouralolekha. ²⁸ Mulisubira yoseresia pasika nende okhwanywakho amabanga, mbwe ulia omusasi wa baana bokhurangirira arabadirakho. ²⁹ Mulisubira bambukha inyanja injakhanyu eyumire. Naye aba Misiri nibamirwa namachi. ³⁰ Mulisubira eliida lia Yeriko liarimulukha niliakhabodokhanwa echindaalo saba. ³¹ Mulisubira omudamba Rahabu siyafwa alala nende abarasubirira, okhuba yali nakisire balia abeecha okhulambula esialo mumulembe. ³² Mbole sina khandi? Ebikha bifukirire ndakhabolere khu Gidioni ,nende Baraki, Samusoni , Yefutani, Daudi, Samueli, nende abanabii boosi. ³³ Abeene abo khubirira mulisubira bakwisia abaruki, nibakhola akobulungifu, nibanyoola akalakwa nende okhwikala eminwa ekie chidalang'i, ³⁴ basimia obukhakafu bwomuliro, nibaona obwoki bwoluganga, mubudekhere nibaba abamaani mumaye, ne niberusia abasuku bamayie. ³⁵ Abakhasi banyoola abaandu babwe khubusibwa mubafu, naye abaandi nibasandisibwa oburafukirira okhununulwa, mbwe, bamale banyole obulamukhi bulayi khukhirao. ³⁶ Naye abaandi babirira mukhutemwa khudinyu nende khusandisibwa, kata okhula khurebwakho eminyororo nende mubiboye. ³⁷ Nibalaswa namakina. Nibarandulwamo khabiri, nibatemwa, abaandi berwa noluganga. Nibakendakenda mubiefwalo bia amasero kamakondi halala nechimbusi. Nibanyolekhana abaderwa mumusando mungi. ³⁸ Bali nga baradakhikhana musialo. Bakendana muluumirira, nende muchingulu, halala nende ameena nende maulukhu komusialo. ³⁹ Ne bano boosi, nibamalire okhuboolwakho amalaayi khubirira mulisubira, sibanyoola esisubisio. ⁴⁰ Nasaye yali yamala okhurupangira esiindu silayi, mbwe kario arali efwe, khasi bakhosirisibwe