¹ Okhuba ndienya mumanye obulwani obwa endi mninabwo khulwanywe, akali eLaodikia, kata yabo bosi abashili okhundolakhwo mumubili. ² Nendiiya mbu emioyo chiabwe chinyale chinyoole amaani, nichinabirwa halala mubuheeli, nende mubuyinda bwo obusubisisie bwobumanyilisi mukhubuula libiso lia, Nyasaye, elili, Kristo. ³ Muye khuli nende libishilo liakoosi akobumanyilisi nende obuchesi. ⁴ Kano emuboolela mbu omundu yesi shalamukatia nende amakhuwa amakhaya tawe. ⁵ Kata nimbulaho mumubili, ne endi ninenywe muroho, ndikhoyanga okhulola obuloosie nende amaani kenywe mubusubili muKristo. ⁶ Shinga olwa mwenjisia Kristo Yesu Omwami, chende muye. ⁷ Mube nende emisi muye, nokhumbakhwa muye, nokhuralisibwa mubusubili, shinga olwammwechesibwa, nimushilananga mukhukhupa orio. ⁸ Bemeso omundu shalamura mububohe naamebalo akobubeyi tawe, olunyuma lwa aketsimbikho nende amechesio keshialo akalali aka Kristo. ⁹ Okhuba muye obwitsulu bwoosi obwa Nyasaye bumumenyele mwo mumubili. ¹⁰ Ne mwamala okhwitsusibwa muye, ouli niye omurwe khubuli oburuchi nende obunyali bwosi. ¹¹ Muye mwesi mwashebwa eshishebo shilali shiemikhono tawe, mukhurusia omibili kwetsimbi mumubili mushishebo shia Kristo. ¹² Mwayabilwa ninaye mukhubatisibwa, mana muye nimubusibwa okhubilila mubusubili mumaani kaNyasaye, owamulamusia ye okhurula mubafu. ¹³ Neenyu olwa mwali nimushili abafu mutsimbi nende obulashebwa bwemibili chienywe yamulamusia halala ninaye, naye nakhubeera ebionono biefwe biosi. ¹⁴ Ye yasiilisia obuhandiche obwali nibwahandikwa khufwirwe neeshiina, obwali nibwakhufukula, nakhuiiniliao nabukhoma khumusalaba. ¹⁵ Namalile okhusasia oburuchi nende obonyali, shingana bili habulafu, yeekhoya shingana aliomuhuli. ¹⁶ Kario, shimuleyama omundu yesi abakhalachile eshiina mukhulia nohomba mukhunywa tawe, kata mumikhoyo nohomba khulwa omwesi omutoro, kata elia inyanga yaIsaabato. ¹⁷ Kano neeshinini khubindu bitsanga, habutswa omubili kwene nokwa Kristo. ¹⁸ Shimuleyama omundu yesi owakhenya okhwititiya nende obwinamili bwa abamalaika okhubayaasia kata okhubarusia khushihaanwa shienywe tawe. Omundu uyo yechinjimilisia mubindu ebiayaalutsi mushifune eshiamapaaro akomumubili. ¹⁹ Kata shiatong'anga khumurwe kwene ta. Nokhurula khumurwe okwa omubirli kwoosi kunyola ebiunjilo nende emisi nikulimana halala nikukhula mubukhuli bwa Nyasaye ahana. ²⁰ Nikakhaba mwafwa halala nende Kristo mubindu ebiaambeli ebiomushialo, shichila shiina mumenye shingana abomushialo, nimuhulila amechesio, ²¹ "Sholalaaba ta; sholatsanzama ta; sholatiila ta"? ²² bino biosi bilawaho olwabikhonyilwa kano shinokhuloonda amalako nende amechesio akabandu. ²³ Ameebalo yako kalolekha shinga akobuchesi, mudini eyabekasilia abeene nobwitutuyi, obusaandi bwomubili, nebutswa kabula inganga eyokhwikalila obwikombi bwomubili.