¹ Akinonji kicheka kwokey ng'wony mu kandoikwak ak kandoisye kugas it , ak kuchobogis mu boisyo aka togol nyakararan. ² Akumemwa kiy nyangaya akubo chii aka togol, akimologu biich chebo boriot, aku chotoloyeen kuborjine biik togol mutyondi togol. ³ Amu kikiije solwoi akinya keny, ak kimakigese it, kikiberberech keoot makut cho ng'ule ak tienwek, ketebisoot mu yaityo, ak ng'atkong, ak kikii chekiweche, ak kesaskei achega. ⁴ Ako kingitoku tolosietab Jehovah yetindenyo, ak chomnyenyi nyo chame biik, ⁵ ko kima boisinikab imandanyo chekikwai, kibaate riranetab kinyende nyokisorwech, mu kaunetab sigee nyoleel, ak kalelitetab Tamirmirye Nyotilil, ⁶ Nyokuroong'wech mu choong'indo mu Jeso Kristo Yetindenyo. ⁷ si yo kakeityech imanda mu kororindanyi, ke aech kelogu cho neme tuguk kile kamang'unetab sobondab koigeny. ⁸ Bo iman ng'olyondoni, akamache imwaa tuguchwechu mu kimnatee sikunaan kichege che kikuyaan Jehovah, kwai betusyek togol, boisionik chokororonen. Kororon tuguchoche akutorote chii togol. ⁹ Ak iistoegei tebutik cheberberen ak tatutikab abanwek che kikisirto, ak suriosyek ak boriosyek akobo ng'atutye, aku matinye keljin akubo buch. ¹⁰ tai chii nyaibu besiot bani kitikone nyobo tai ak nyobo aeny. ¹¹ Nai anyu chito nyole nyone ku kikiwo taban mu imanda ak kwoye tengek, ak kurwokyinigei kutyo. ¹² Nemi bani kayogu Artema anan Tukiko, igiilgei ichoo Napoli wolo ami ako kaabwat abaisye betusykab katilile. ¹³ Yai kiy aka togol, sion Sena ak Apolo kimng'omutinikab ng'atutik si mararta kiy aka togol mu ichega. ¹⁴ Ako ngunetgei anyu biikyo kwai tuguk chokororonen betusyek togol akubo tukuk che makyinigei, si ma logu che maiyee logoi chokororonen. ¹⁵ Ataach kagotut kubunu biik chekimite togol. Igat kichega cho chemeech mu kayane. Ngutebi myeindo kubotook akwee togol.