¹ Haluse mwe nkande zilavigwe mwe matukulu chimanya kugamba suwe chose china umanyi, umanyi waleta wefenyi mna ungi wazenga. ² Uneva mntu yoyose afanyana kugamba kamanya mbuli yoyose mntu uyo hanati kumanya ivyo vikumunga amanye. ³ Mna uneva yumwenga anamunga Chohile mntu uyo amanyigwa ni yeye. ⁴ Ivyo namna ya kudya nkande zilavigwe lavyo kwa matukulu chimanya kugamba matukulu siyo chintu mwe isi ino na kugamba hakuna Chohile mna yumwenga du. ⁵ Elo hakuna walozize wakwitangwa milungu hegu ni kwe isi hegu mwe isi enga viya weli miuungu ya Zumbe walozize. ⁶ Hta ivyo kwetu kuna Chohile yumwenga du uyo ni tate ywa vintu vyose vilawa kwakwe na suwe chikala kwakwe na Zumbe yumwenga Yesu Kulisito uyo kwakwe vintu vyose vyendga viyaho naho kwa yeye suwe chiyaho. ⁷ Kwa ivyo umanyi uno haumuli mndani mwa chila yumwenga mna awatuhu wazwela kutongela, kuvikila matukulu ayo aho kale naho hata vino haluse wadya nkande zino enga kugamba ni chintu chilavigwe lavyo kwa matukulu fanyanyi zawo ziwadntiliza kwaviya wahwa. ⁸ Mna nkande haikudaha kuchisogeza suwe kwa Chohile suwe siyo waihiye mno hata hachinadile hegu wedi mno uneva chinadya. ⁹ Mna msinyise kugamba ulekelwa wenyu usekutenda mbuli ya yudya ahwele mo kuzumila. ¹⁰ Hebu fanyanya kugamba mntu anakuwona weye wili na umanyi wadya nkande mwe nyumba za kuvikila matukulu fanyanyi yakwe mntu uyo haimwingize uleke naye adye vintu lavyo kwa matukulu. ¹¹ Ivyo kwachausa cha umanyi wako wa chindedi mwa matukulu mkulu hegu lumbu dyako ahwele mna Kulisito kabnika kwachausa chakwe na balangwe. ¹² Ivyo ukadamanya masa ya mkulu na lumbu dyako niyo wazilumiza izifanyanyi zawo zihwele mwadamanya masa mwa Kulisito. ¹³ Uneva nkande yaleta ulemanyi mwa mlulu hegu lumbu sanidye nyama ng'o vinasekuletela mkulu hegu lumbu dyangu kugwa.