¹ Ino nikivakumbusa, vakaka na vadada, kihusu imola yini nikivahubilila, yini mwaiposhelaga na kuyima kwa iyo. ² Na kishilila imola iyi mwakulusiwa, nda mulikhate kwa ukhangafu iliswi lini navajovela omwe, isipokiva muliyamini bure. ³ Ngaja pamwaandi shini naiposhelaga kwa umuhimu nailetaga kunyenyu ngaja shini yishwali: kija kihumana na maandikho, Ukristo wafwisaga kwa ajili sa sambi sesu, ⁴ kihumana na maandikho wasilwagwa, na kija vafyukhaga ulusiku lwautatu. ⁵ Na kija wamuhumyaga Ukefa, bahene kwa vala kumi na vavili. ⁶ Bahene wavapolelaga kwa luhavi lumo avakaka na vadada saidi ya mia tano. Vinji vanave bado vali vasima, lakini baasi yanave vagonile utulo. ⁷ Bahene wamupolelaga Uyakobo, bahene avanandeje wona. ⁸ Umwisho gwa gona, wanipolelaga one, ngaja ndenela kwa mwanishe mwini asiwilwe ku muda gwini gusili sahihi. ⁹ Kwa kiva one nili munang'ana ku vanandeje. Nisifwaya kishemelwa mwanandeje, kwa kiva nalilafyaga ilitembe lya Nguluvi. ¹⁰ Lakini kwa neema ya Nguluvi nili ngaja shini nishwali, ni neema yakwe kunyangu yisikhandi shihi. Badala yakwe, nasengaga ibidii kishila wona, Lakini yisikhandi one, ila ineema ya Nguluvi yini yili mukhati yangu. ¹¹ Ino nda yune au avene, tihubiri ndeno na tiyamini ndeno. ¹² Ino nda ukristo wahubilwagwa ngaja mwini afyushile kw vini vafwile, yiva wuli avamonga venyu vija kusina uufufuwo wa vini vafwile? ¹³ Lakini nda kusina uufufuwo wa vini vafwile, basi hata yu Kristo wope asikhafyushile. ¹⁴ Na nda Ukristo asikhafyushile, ino amahubiri gesu giva gangaya faida , nilihuvi lyenyu lingaya faida. ¹⁵ Na takhatwa kina mashahidi va udehi kimuhusu Unguluvi, kwa kiva tamushuhudilaga Unguluvi shinyume, kija wamufufulaga Ukristo, kumbe asikhamufufule. ¹⁶ Nda yive kija vini vafwile vafifufulwa, Uyesu wapo asikhafufulwe. ¹⁷ Na nda Ukristo asikhafufulwe, ilihuvi lyenyu liva bure na bado muli ku sambi senyu. ¹⁸ Ino hata vala vini vafwisaga kwa nsila ya Kristo wope vayaga. ¹⁹ Nda yive kwa maisha aga gene duguli tina ukhangadu kwa luhavi lwini luyinsa mukhati ya Kristo, avanu wona, ose ni va kiwonelwa ulusungu mandu kishila avanu wona. ²⁰ Lakini isalisi Ukristo wafyukha kihuma kwa vini vafwile, amatunda ga kwansa ga vala vini vafwile. ²¹ Kwa kiva infwa yayinsaga kishilila umwanadamu, khanji kishilila umwanadamu uufufuwo wa vini vafwile. ²² Kwa kiva nda kwa kishilila Uadamu wona vifwa, ino khanji kishilila Ukristo wona ambi viva vasima. ²³ Lakini shila yumo ku mupango gwakwe: Ukristo, matunda ga kwansa, na bahene vala vini vakwali kwa Kristo ambi viva vasima uluhavi lwa kuyinsa kunyakwe. ²⁴ Bahene gukhava mwisho, pala Ukristo pini akhatawula uufalme kwa Nguluvi Wihesu. Iyi ni pala pini akhakomesa uutavala wona na mamlakha gona ni ngufu. ²⁵ Kwa kiva lasima atavale mpakha pini ambi akivavikha amaadui vakwe pansi ya nsayo sakwe. ²⁶ Uadui wa mwisho kinangwa yi nfwaa. ²⁷ Kwa kiva ''wavikha shila shinu pansi ya nsayo sakwe.'' Lakini pini yija ''wavikha shila shinu,'' yili mwasi kija iyi yisihusisha vala vini vavishile shila shinu pansi yakwe, umwene. ²⁸ Pini ifinu fyona fikhava fivishilwe pansi yakwe, bahene Umwana yumwene ambu ivikhwa pansi kunyakwe Umwene mwini wafivikhaga ifinu fyona pansi yakwe. Iyi yikhapolela ili kija Unguluvi Wihesu ave gona ku fyona. ²⁹ Au khanji vigaha wuli vala vini vabatisiwe kwa ajili ya vini vafwile? Nda vini vafwile vasiluhusiwa khabisa, kwanshii khanji vibatisa kwa ajili yanave? ³⁰ Na kwanshii tili kuhatari shila lisala? ³¹ Vakaka na vadada vangu, kishilila kuisufya kwangu kwa omwe, yini ninayo kishilila Ukristo Uyesu Umtwa wesu, nitangasa ndeni: nifwa shila lusiku. ³² Yikinifwaya nshii, ku mtazamo gwa vanadamu, nda natovanaga na vanyama vakhali huko Kuefeso, nda vini vafwile vasifufulwa? ''Lekha basi tilye na king'wela, kwa kiva pamulawu tifwa.'' ³³ Musikhadehelwagwa: ''Ifipuga ifivi finanga itabia inofu. ³⁴ ''Muve bi kiasi! mukhale kwa haki! musikhayendelelaga kisenga isambi. Kwa kiva vamonga venyu musina amaarifa ga Nguluvi. Nilogola ndeni kwa nsoni yenyu. ³⁵ Lakini umunu uyunji ambi ija, ''Kwa namna nshii vini vafwile vifufulwa? Navene vakhayinsa ni aina shii ya muvili?'' ³⁶ Owe uli muyasu mandu! Shila shini wavyala shisiwesa kiyansa kikula kuno shifwile ³⁷ Na shila shini wuvyala sio muvili gwini ambi gwikula, ila ni yila imbeyu yini yamela. yiwesa kiva ngano au ishinu shinji. ³⁸ Lakini Unguluvi ambi akiipela umuvili ngaja shini agene, na ku shila mbeyu muvili gwakwe gwene. ³⁹ Amavili gona gasihwanana. isipokiva, kuna muvili gumo gwa vanadamu, nu muvili ugunji gwa vanyama, nu muvili ugunji gwa nyuni, nu gunji kwa ajili ya nswii. ⁴⁰ Khanji kuna mavili ga kushanya na mavili ga panyii. Lakini uutukufu wa mavili ga kushanya ni aina yimo nuutukufu wa panyii wunji. ⁴¹ Kuna utukufu wumo wa lijuva, nuutukufu uwunji wa mwesi, nuutukufu uwunji wa nondwe. Kwa kiva inondwe yimo yisihwanana ni nondwe iyinji ku utukufu. ⁴² Ndeno ndio ushwali wope uufufuwo wa vini vafwile. Shini shivyalwa shinanjikha, na shini shilemba shiinanjikha. ⁴³ Shavyalwa ku matumisi ga kawaida, kimeleswa ku utukufu. ⁴⁴ Shavyalwa kuubofu, shimeleswa kwa ngufu. Shavyalwa kwa muvili gwa asili, shimeleswa kwa muvili gwa shiroho. nda kuna muvili gwa asili, kuna muvili gwa shiroho gope. ⁴⁵ Ino khanji yiyandishwe, ''Umunu wa kwansa Uadamu wagahaga iroho yini yikhala.'' Uadamu wa mwisho wasenjekhaga iliho yini yihumya uusima. ⁴⁶ Lakini wa shiroho asikhayinsile tangusina ila wa asili, na bahene wa shiroho. ⁴⁷ Umunu wa kwansa ni wa dunia, watendwagwa kwa mankhundi. Umunu wa uvili ihuma kushanya. ⁴⁸ Ngaja ndenela yula mwini watendwagwa kwa mankundi, shisho wope vala vini vatendilwe kwa mankundi. Ngaja shini umunu wa kushanya shini ashwali, ino shisho wope vala va kushanya. ⁴⁹ Ngaja shini tisumwile umufano gwa munu wa mankhundi, tikhasumula khanji umufano gwa munu wa kushanya. ⁵⁰ Ino nikivajovela, vakaka na vadada vangu, kija umuvili ni danda fisiwesa kuuhala uufalme wa Nguluvi. Wala wakunanjikha kihala wini wusinanjikha. ⁵¹ Lelela! Nikivajovela omwe isiri yakweli: Tisikhafwa wona, ila wona ambi tisetuswa. ⁵² Ambi tiswetuswa kwa muda, kwa kidinda na kidindula kwa liho, ku tarumbeta ya mwisho. Kwa kiva itarumbeta ambi yikhola, na vini vafwile ambi vifufulwa ni hali yini yisinanjishe, na ambi tisetuswa. ⁵³ Kwa kiva ugu gwa kunanjikha lasima gufwale gwini gusinanjikha, nu ugu gwa kifwa lasima gufwale gwini gusinanjikha ⁵⁴ Lakini pini ugu gwa kunanjikha nda gufwaswe gwini gusinanjikha, na ugu gwa kifwa nda gufwale gwini gukifwa, bahene ambi luyinsa ululogolo lwini luyandishwe, ''Infwa yamilwa kuushindi.'' ⁵⁵ ''Nfwa, uushindi wakho wuli kwii? Nfwa, wuli kwii uushungu wakho?'' ⁵⁶ Uushungu wa nfwa yi smabi, ni ngufu ya sambi yi sheriya. ⁵⁷ Lakini honjesi kwa Nguluvi, mwini akitipela ose uushindi kishilila Umtwa wesu Uyesu Kristo! ⁵⁸ Ino, vagani vakaka na vadada vangu, muve vakhangafu na musikhadegekhaga. Shiluta yisenji insengo ya Mtwa. kwa kiva mumenye kija insengo yenyu kwa Mtwa yisili shishi.