¹ Nifwata one, ngaja na yune shini nikimufwata Ukristo. ² Ino nikivasufya kwa kiva mukinikumbukha ku majowo gona. Nikivasufya kwa kiva mwagakhata amaposhelo ngaja shini nagaletaga kunyenyu. ³ Ino nisakula mumanye kija Ukristo yu mtwe gwa shila mugosi, numwene umugosi ni mtwe gwa mudala, na ya kija Unguluvi yu mtwe gwa Kristo. ⁴ Shila umugosi mwini ilomba au mwini ihumye uukuvamalago kuno agubishe umtwe akiguaibisa umtwe gwakwe. ⁵ Lakini shila mugosi alombe au kihumya uukuvamalago kuno umtwe gwakwe guli mwasi akiguabia umtwe gwakwe. Kwa kiva ni sawa sawa na ngaja akhasile. ⁶ Nda umudala asikhagubikha umtwe gwakwe, na akhaswe inyele sakwe sive nfupi. Maana nda yive nsoni umudala kidumula inyele sakwe au kikhasa, ino agubishe umtwe gwakwe. ⁷ Kwanshi yisikimufwaya umugosi kigubikha umtwe gwakwe, kwa kiva umwene yu mfani wa utukufu wa Nguluvi. Lakini umudala ni utukufu wa mugosi. ⁸ Kwa kiva umugosi asikhahumene nu mudala. Ila umudala wahumaga kwa mugosi. ⁹ Wala umugosi asikhawumbilwekwa ajili ya mudala. Ila umudala wawumbwagwa kwa ajili ya mugoi. ¹⁰ Iyi ndio sababu umudala ipaswa kiva ni ihara ya mamlakha kushanya ya mtwe gwakwe, kwa sababu ya malaikha. ¹¹ Hata ndeno, kishilila Umtwa, umudala asili mwene duguli bila mugosi, au umugosi bila mudala. ¹² Maana ngaja shishila umudala wahumaga kwa mugosi, shishila wope umugosi wahumaga kwa mudala. Ni finu fyona fihuma kwa Nguluvi. ¹³ Hiji yumwe: Wuli! lwiva unofu umudala amulombe Unguluvi kuno umtwe gwakwe guli mwasi? ¹⁴ Wuli hata iasili yene duguli yisikivafundisa kija umugosi nda ave ni nyele inali yiva nsoni kunyakwe? ¹⁵ Wuli iasili yisikivafundia kija umudala nda ave ni nyele inali yiva utukufu kunyakwe? Kwa kiva apelilwe sila inyele nali ngaja mwenda kunyakwe. ¹⁶ Lakini nda umunu yeyona isakula kibishanya kihusu ili, ose tisina inamna iyinji, wala amatembe ga Nguluvi. ¹⁷ Ku maagiso gini gifwata, one nisikivasufya. Kwa kiva pini mukunganiya sio kwa faida ila kwa hasara. ¹⁸ Kwa kiva tangusina, nipulikha ya kija pini mutangana mumatembe, kuna kibagukhana kati yenyu, na kwa sehemu niyamini. ¹⁹ Kwa kiva lasima kuve kukwali kikuvana khati yenyu, ili kija vala vini vayitishwe vamanyishe kunyenyu. ²⁰ Kwa kiva pini mwitangana, shini mwilya shishili shakilya sha Mtwa. ²¹ Pini mwilya, shila yumo ilya ilya ishakilya shakwe yumwene kuno avanji bado vasinalye. hata uyu ana njala, na uyu agalile. ²² Wuli musina inyumba ya kililila na king'welela? Wuli mukilisala ilitembe lya Nguluvi kivasugumisa vini vasina Shinu? Nilogole shishi kunyenyu? Nivasufye? Nisikivasufya ku ili! ²³ Kwa kiva naposhelaga kihuma kwa Mtwa shila shini navapela omwe kija Umtwa Uyesu, ishilo shila pini wasetukhwagwa, watolaga umukhate. ²⁴ Baada ya kihonjesa, wagudenyaga na kija, ''Ugu ndio mvili gwangu, wini uli kwa ajili yenyu. Gahi ndeni kwa kunikumbukha one.'' ²⁵ Na shisho watolaga ishikhombe baada ya kilya, na kija, Ishikhombe ihi liva liagano klipya kishilila idanda yangu.Gahi ndeni mara nyinshi pini mung'ela, kwa kunikumbukha one.'' ²⁶ Kwa shila muda pini mwilya umukhate ugu na kushigwelela ishikhombe, mukiitangasa imauti ya Mtwa mpakha pini ambi iyinsa. ²⁷ Ino, shila mwini ilya umukhate au kushing'wela ishikhombe isho sha Mtwa shini yisifwaya, ambi iva waipatila ihatia ya muvili ni danda ya Mtwa. ²⁸ Umunu aipoe yumwene tangusina, na bahene alye umukhate, na kushing'welela ishikhombe. ²⁹ Kwa kiva mwini ilya na king'wela bila kugulelela umuvili , ilya na kingwela uuhigo wakwe yumwene. ³⁰ Iyi ni kwa sababu avanu vinji kunyenyu vali vatamu na vabofu, na vamonga venyu vafwile. ³¹ Lakini tiilolele yuse tisikhahigwa. ³² Ila pini tihigwa nu Mtwa, titinilwa, ili tisikhayinsaga tihijwe bahamo ni nyii. ³³ Ino, vakaka na vadada vangu, pini mutangana kwa ajili ya kilya, hepelesaniyi. ³⁴ Umunu pini ana njala, na alye kukhaya yakwe, ili kija pini mwitangana bahamo yisikhavesaga kwa uhigo. Na kihusu amajowo aganji gini muyandishe, nikhavawulanisa pini nikhayinsa.