¹ Ukarata wa hali nashisimvile, Theofilo, nayanzile zyonti Uyesu zyeamanzite kubhomba nukusambilizya, ² paka insiku zye wuyo aposhelilwe kumwanya. Ino zyamile lwebhafumwa inkomelezyo kujendela Umupepo Umufinjile kwa mupositili weamamile amasebhilwe. ³ Lwe namayimba gakwe, Wuyo ahaloleha kukwabho amali mulanzi wope nuvisimishizyo ivwinji vihasimishizyaga. Kunsiku amashumi gane ahayilolesya kukwabho, pe ahayanga izya bhumwene bhwa Mulungu. ⁴ Pe amamile ahahomanaga poka nabhope, ahabalajizya bhatehepe Yerusalemu, loli bhahagulilila panongwa ya lufingwi lwa Tata, lwe, ahayanga, "Muhivwa kufuma kukwane ⁵ ukuti Yohani ahozyaga nzila kuminzi, loli muliyozelwa kwa Mupepo Umufinjile munsiku izi inyinsi." ⁶ Lwe bhamile bhabhunjine poka bhahamubhuzilizya, "Mwene, kwekuti iha he habhalilizyo heulibhagalushizya Iziraeli ubhumwene?" ⁷ Uwene ahati, "Te nalyoli kukwinyu kumanya ahabhalilizyo pamo amaha ge Utata apanzile na bhahabhizya bhakwe wuyo." ⁸ Loli muliposhela amaha, lwe Umupepo Umufinjile ayinza papinyu, nimwe mulibha mwebha simishizi bhane mwonti mu Yerusalemu na Bhayahudi bhonti na Musamaliya paka kubhumalilizyo bhwa nsi." ⁹ Mwene Uyesu lwe amala kuyanga izi, lwe bhamile bhakumwenya pamwanya, Uwene ahanyatulwa kumwanya, ni bhingu lihamuzijila bhatahamwenya kuminso gabho. ¹⁰ Pe bhakwenyelezya kumwanya ku njele akubhala, lubhilolubhilo, abhantu bhabhili bhahimilila pakasi yabho bhazwaye inzwalo inzelu. ¹¹ Bhahati, "Imwe mwe bhantu bha Galilayi, shoni she mwimiliye apa mukwenyelezya kumwanya?" Uno Uyesu weanyatulwa kumwanya aligaluha muhabhele hehala inzavwe mwamwenya akubhala kumwanya. ¹² Pe bhahagaluha Muyerusalemu kufuma kwi gamba lya mabhula, lwe uko papipi ni Yerusalemu, lujendo lwa sinku zisano na zibhili Sabato. ¹³ Lwe bhafiha bhahajenda kunyumba ya kwigulu kwebhahatendamaga. Bhope bhamile Peteri, Yohani, Yakobho, Andrea, Filipo, Thomaso, Batholomayo, Matayi, Yakobho mwana wa Alfayo, Simoni Zelote nu Yuda Umwana wa Yakobho. ¹⁴ Bhonti bhahasangana inzavwe umuntu woka, mukujimbilila bhahajendelela mumputo. Poka nabho bhalipo abhantanda, Mariamu Umayi wakwe Uyesu, na bhayemba bhakwe. ¹⁵ Munsiku zila Peteri ahimilila pakasi ya bhajenzi, Inzavwe abhantu 120, ahati, ¹⁶ Bhajenzi, zyamile nyinza kuti inkomelezyo zikwilane, pe hali Umupepo Umufinjile ahati kwilomo lya Daudi ni zya Bhayuda, zye amabhabhuzizye bhala bhebhamulemile Uyesu. ¹⁷ Pe uwene amali poka niswe uwene pe ahaposhela ishigabho shakwe mu mbombo ino.'' ¹⁸ (Isalizi umuntu uno ahakala umugunda kushila sheahaposhela ku mbibhi zyakwe na panapo ahagwa nukulongolezya itwe, umubhili wuhatumbuha na mulwanda lwakwe lwonti mwali nubhwazi bhuhagwanga. ¹⁹ Bhonti bhebhatendime Muyerusalemu bhahivwa zyonti izi, ubhwo ulubhazu ulwo bhahalwitizya ku njango yabho ''akeldama'' uyo we ''mugunda wi bhanda.'') ²⁰ Pe mwakalata wa nyimbo lisimvilwe, 'Gulilila umugunda wakwe wubhe litongo pe wutahitishizwe na woka kutendama pala nu, 'kwitishizwa umuntu uwunji anyetule ubhuzilo bhwakwe ubhwa bhulongozi,' ²¹ Ilyo lya maha, pe ubhwo, woka wa bhanavuli bhe bhali poka niswe ahabhalilo Umwene Uyesu lwe afuma na kwinjila pakasi yitu, ²² Kufumila ku lwozyo lwa yohani mpaka pi siku lila lye ahanyatulwa pa mwanya , yikwanzibhwa abhe lusimishizyo ulwa luzyuho poka niswe. ²³ ''Bhahabhiha pilongolela abhanavuli bhabhili, Uyosefu wahitizwaga Barnaba, we wope ahitizwaga wu Yusto nu Mathia. ²⁴ Abhene bhahaputa bhahati, ''Iwe, Tata, wukumanya amoyo ga bhantu bhonti, ubhwo bhiha pabhuzeru alikwiyi pakasi ya bhabhili ibha we umusebhile ²⁵ kunyetula ubhuzilo mu mbombo nu bhutumwa, pe Uyuda ahabhomba imbibhi na kubhala ulubhazu lwakwe.'' ²⁶ Bhahiliha ishili shabho, pe ishili shihamugwila u Mathia we ahabhazwa poka na bhala abhantumi kumi na woka.