¹ Abon kah aku urakng bebas? Abonkah aku rasul? Abon kah aku udoh mantau Yesus, Tuhant kitoa? Abon kah ikau asel kerojoa ku dalamp Tuhant? ² Jikoa bagi urakng lain aku bukant rasul, paling abon aku rasul bagi kau. Sobab, ikau tanoa kerasul ku dalamp Tuhant. ³ Tuk am pemeloa ku keidok yang akan merikso aku. ⁴ Apai kami bonsik hak untok makan minum? ⁵ Apai kami bonsik hak untok maik bini yang seiman, samoa uboa rasul yang lain, kabant mpaloa Tuhant, temasok Kefas? ⁶ Atau, hanyoa Bernabas dan aku no yang bonsik adoa hak untok abon bekerojo? ⁷ Sapai yang kalok ngabdi jadi tentara dengan biayo kedirik? Sapai yang nanam kobun anggur dan bon makan buoh ah? Atau sapai yang nyago ternak dan abon minum susu ah? ⁸ Apai kah aku modoh hal tuk konak mensioa? Abon kah ukump taurat gam yang modoh hal yang samoa? ⁹ Sobab, adoa tetulis dalamp ukump taurat musa, "Ajum ikau memberengus sapi yang Allah pantau? ¹⁰ Atau, apaikah ioa modoh hal tuk demi kito? Nyam, demi kitoa hal yok tetulish kerenoa yang nunok arush nunok dalamp pengharapan dan yang ngirik arush ngirik dalamp pengharapan untok mulih bagi nirik ah. ¹¹ Jikoa kami nanam bonih rohani diantaro ikau, apai kah belobih kalau kami gam manyi ah hal pemulih dari ikau? ¹² Jikoa urakng lain adoa hak diatas ikau, bukankah kami lobih berhak lagi? Walaupun beyok, kami abon makai hak yok, sebalik ah, kami nanggung semuoa ugek kami abon ngalang bagi injil Kristus. ¹³ Apai ikau abon panai bahwoa idok yang ngerojoa hal kudus yok, makan dari bait Allah? Dan, idok yang ngelayan dialtar napat jatah dari pemorik yok? ¹⁴ Beyok gam, Tuhant merintoh idok yang morik injil untok iduph dari injil. ¹⁵ Tapi, aku abon kalok makai sutik pun dari hak yok. Dan, aku abon nulish hal yok biar dikerojoa agoa aku. Sobab, lobih bagak aku mati dari pado sikuk pun urakng bonsik yang ku ngayoh. ¹⁶ Karenoa, jikoa aku morik injil, aku bonsik alasan untok mongoh karenoa kewajiban yok adoa atasku. Celakoa mat aku, jiko aku abon morik Injil. ¹⁷ Kalau aku morik injil kerenoa konakku kedirik, aku ado upoh. Tapi, kalau yok bukant konakku, tuk am tugas yang dipecayok ke aku. ¹⁸ Kalau beyok, apaikah upohku? Upohku ketikoa aku morik injil, aku panai morik injil tanpoa upoh dan aku nyaloh guno hakku dalamp injil. ¹⁹ Tapi, walaupun aku bebas atas semuoa urakng, aku muloh dirikku hambo bagi semuoa urakng biar aku panai monang lobih banyak lagik. ²⁰ Bagi urakng Yahudi, aku uboa urakng Yahudi biar aku panai monang dalamp urakng Yahudi. Bagi urakng yang iduph dibaboh Ukump Taurat, aku jadi urakng ubo urakng yang iduph dibaboh Ukump Taurat (walaupun aku kedirik abon dibaboh Ukump Taurat) biar aku panai ngemonang idok yang ado dibaboh Ukump Taurat. ²¹ Bagi idok yang abon makai Ukump Taurat, aku jadi uboa abon makai Ukump Taurat (bukant bonsik Ukump Allah, tapi dibaboh Ukump Kristus) biar aku panai ngemonang idok yang bonsik Ukump Taurat. ²² Bagi urakng yang lomoh, aku jadi lomoh biar aku panai ngemonang idok yang lomoh. aku udoh jadi segaloa ah bagi semuoa urakng biar dengan segaloa caroa aku panai nyelamat urakng. ²³ Aku muloh semuoa yok demi injil biar aku panai napat bagian didalamp ah. ²⁴ Abon panaikah ikau bahwoa ikau yang bedodas dalamp pertandingan semuoa ah bedodas, tapi hanya sikuk yang nerimok hadiah? Jadi bedodas am sekuat ah biar ikau panai napat ah! ²⁵ Setiap urakng yang betaning belateh nguasoa nirik dalamp segaloa hal. Idok yang ngelaku yok untok nerimok mahkota yang fana, tapi kitoa untok napat yang abadi. ²⁶ Sobab, aku abon bedodas macam yok bonsik tuju. aku abon numok ubo urakng yang numok angin. ²⁷ Tapi, aku ngelateh tubuhku dengan kuat dan nguasoa ah biar seudoh aku morik injil keurakng lain, aku kedirik panai diterimok.