¹ Onu Raya Paskah dan Onu Raya Roti Kai Buhagi bulansokng du onu agi'k, balo imam kupala'k dan ballo ahli Taurat sedakng mogau cara nya'k dokiap Yesus ngan lakar dan kome'k-Diapm. ² Sobab, balo nyo nyono'k, ''Yo'k sulama onu raya agar yo'k biatn nyo budohuh no'k antara nyo opi'k.'' Yesus Diurapi ngan Minya'k Narwastu ³ Sementara Yesus odiah no'k Betania, no'k homing Simon si kusta, libo sedakng guhu'k no'k meja nya'k dua'k, moni'klah nyo dayua ngan subuah guci ci'k so'k pualam bubih minya'k wangi so'k narwastu di'k murni dan mahal. Diapm mohuah guci han dan ninyibuah kanu somu ba'k Yesus. ⁴ Akan tapi, biatn nyo di'k nyono'k ngan kesal nyi'k ngan di'k laikng, ''Ngoniah kosi'k minyakng wangi mah tia? ⁵ sobab, minyakng tia tau'k ninyual 300 dinar lobiah dan dopit ninyilu'k kanu nyo musiketn.'' Dan, balo nyo pun nohuh dayua han. ⁶ Namun, Yesus nyono'k, ''Adung diapm.Ngoniah mu'k nyusahkan diapm? Diapm jeh hija di'k bai'k bagi-Ku'k. ⁷ sobab, mu'k selalu biatn nyo musiketn busama mu'k, dan nan mu'k lua, mu'k tau'k hija koyuh di'k bai'k bagi balo nyo. Akan tapi, mu'k kai akan sulalu pu'k Ku'k. ⁸ dayua tia jeh hija oniah di'k diapm tau'k. Diapm mengurapi wua-Ku'k lobiah tian nya'k ningubur. ⁹ Ku'k nyono'k kanu mu'k di'k omatn, no'k kiah Ijil dinyono'k no'k sumua dunia, oniah di'k jeh nihija dayua han akan ninyono'k subagai pungingat akan diap.'' Rencana Yudas nya'k Buhianat ¹⁰ Kemudian, Yudas Iskariot, nyi'k so'k du bolas murid, obu kanu balo bak imam nya'k nyerakan Yesus kanu balo nyo han. ¹¹ Libo balo nyo han ngopikng, balo nyo anal wang'i dan bujanyi nyilu'k Yudas duet. Karna han, Yudas mogau kesempatan di'k bai'k nya'k nyerahkan-Diapm. Hidangan Paskah ¹² Libo onu punojih onu Raya Roti Kai Buhagi, libo balo nyo ngurbankan na'k domba Paskah , balo murid Yesus misia'k kangu-Ngi, ''Kokiah koh Mu'k lua mi'k nya'k mi'k obu nyiapkan bagi Mu'k dua'k Paskah?'' ¹³ Lalu, Diapm ngado'k du bolas murid-Diamp dan nyono'k kanu balo nyo, ''Obulah kanu kota, dan nyo dahi di'k sedakng matn kendi bu bih pikng akan kanumu'k. Ngajeklah diapm, ¹⁴ dan kokiah diapm tamo'k, sano'klah kanu di'k pu'k homing, 'Guru nyono'k: No'k kiahkoh ruangan ahokng Ku'k dopit dua'k Paskah busama balo murid-ku'k?' ¹⁵ Lalu, diapm akan nyono'k kanu mu'k ahokng ruang di'k daeh no'k lotekng di'k jeh buperabot dan siap sedia. siapkanlah pumakatn nya'k yah no'k nyih.'' ¹⁶ Kemudian, balo murid obu dan monik no'k kota. no'k nyih, balo nyo dopit ahokng mah di'k Yesus nyono'k kanu balo nyo han, lalu balo nyo han nyiapkan Paskah. ¹⁷ Libo onu ngohipm, moni'klah Yesus busama du bolas murid, ¹⁸ Dan, libo waktu balo nyo sedakng gohu'k dan dua'k, Yesus nyono'k, '' Ku'k nyono'k di'k omatn kanu mu'k, biatn no'k antara mu'k, di'k sedakng dua'k busama ngan Ku'k, akan hianati-Ku'k.'' ¹⁹ Balo nyo mulai ningado'k sedih dan nyono'k kanu-Ngi nyi'k demi nyi'k, ''Pasti kai ku'k,kan?'' ²⁰ Yesus nyono'k kanu balo nyo, ''Diapm adalah nyi'k so'k du bolas murid, nyo di'k cilip roti busama Ku'k no'k wah mako'k. ²¹ Sobab, Na'k Sio akan obu, mah di'k jeh ninulis tentakng Diapm, tapi culakalah nyo di'k oleh Na'k Sio nihianat! Akan lobiah bai'k bagi nyo han la'k diapm kai suah nilosiat.'' Pungingat akan Wua dan Doyo'k Kristus ²² Libo balo nyo sedakng dua'k, Yesus monu roti dan setelah niberkat, Diapm hoca'k-hocak dan ninyilu'k kanu balo nyo, samial nyono'k, ''Tanulah, tia wua-Ku'k.'' ²³ Dan, Diapm monu cawatn, dan nyucap syukur. Diapm nyilu'k kanu balo nyo , dan balo nyo nyiniap so'k cawatn han. ²⁴ Lalu, Yesus nyono'k kanu balo nyo, '' Tia lah doyo'k-Ku'k, doyo'k pujanjian , di'k ninyilu'k bagi obia nyo. ²⁵ Ku'k nyono'k kanu mu'k di'k omatn, Ku'k kai akan nyiniap agi'k hasel buo'k so'k koyuh anggur, sapai libo onu ku'k nyiniap anggur di'k bauh no'k wah Kerajaan Bai Punopo'k.'' ²⁶ Setelah bunyanyi subuah lagu rohani, Balo nyo pun obu kanu Dohi'k Zaitun. Balo murid Yesus akan Togatnkan-Diapm ²⁷ kemudian, Yesus nyono'k kanu balo nyo, ''Mu'k sumua akan togatn Ku'k, karna biatn ninulis, 'Ku'k akan nyerakng gembala, dan balo domba han akan popar-popar.' ²⁸ Akan tapi, la'k Ku'k jeh nibangkit, Ku'k akan obu kanu Galilea tiatn so'k mu'k.'' ²⁹ Namun, Petrus nyono'k kanu-Diapm, ''La'k sumua balo nyo togatn-Mu'k, tapi ku'k kai.'' ³⁰ Dan, Yesus nyono'k kanu ngi, ''Ku'k nyono'k di'k omatn kanu mu'k, ngohipm tia, sebelum yap jago bukokok du kali, mu'k akan nyangkal ku'k tohuah kali.'' ³¹ Akan tapi, Petrus nyawap, ''sukalipun ku'k harus kobe'k busama Mu'k!'' Dan, balo nyo sumua nyono'k hal di'k sama. Yesus no'k Taman Getsemani ³² Kemudian, moniklah balo nyo no'k suatu ahokng bunama Getsemani, dan Diapm nyono'k kanu balo murid-Diapm, ''Guhu'k lah no'k tia sementara Ku'k budoa.'' ³³ Dan, Diapm matn serta Petrus, dan Yakobus, dan Yohanes busama-Diapm, dan mulai jodi sangat gola'k. ³⁴ Lalu, kuatn-Nya kanu balo nyo, ''jiwa-Ku'k mah sodih, bahkan sapai ho'k kobe'k. Totaplah ponai no'k tia dan bujaga-jagalah.'' ³⁵ Maka, setelah oju'k ci'k, Diapm busujud no'k somu poyo'k dan budoa, la'k mungkin, saat han bulalu so'k kanungi. ³⁶ Dan, Diapm nyono'k, '',Pak, sumua sesuatu mungkin bagi-Mu'k. Tanulah cawatn tia so'k-Ku'k. Namun, kai owa Ku'k nikehendak, melaikngkan oniah di'k mu'k kehendaki.'' ³⁷ Kemudian, Diapm moni'k agi'k dan honong balo murid-Diapm sedakng bis, dan Diapm nyono'k kanu Petrus,''Simon, ngoniah mu'k bis? kitau'k koh mu'k bujaga-jaga sulama nyi'k jamp? ³⁸ Bujaga-jagalah dan budoa supaya mu'k kai hobu'k kanu wah pencobaan. Roh memang penurut, tapi dagikng lomah.'' ³⁹ Dan agi'k, Diapm obu dan budoa ngan nyono'k hal di'k samah. ⁴⁰ Dan agi'k, Diapm moni'k dan honong balo nyo sedakng bis karna motih balo nyo ngatua'k, dan balo nyo kai tau'k harus nyawab oniah kanu-Diapm. ⁴¹ Sesudah han, Yesus moni'k kutohuah kalingi dan nyono'k kanu balo nyo, ''Mu'k agi'k bis dan buistirahat? cukup, saatnya jeh moni'k. Honong, Nak sio ninyilu'k kanu tongan nyo-nyo budosa . ⁴² Mokatlah, boh yah obu. Honong, di'k nyilu'k Ku'k jeh soma'k.'' Yesus Nidokiap ⁴³ Segera sesudah han, sementara Yesus agi'k ngomong, Yudas,nyi'k so'k du bolas murid, moni'k busama nyo obia ngan podakng dan tameng, niutus imam-imam kupala'k, balo ahli Taurat, dan balo tua bangsa Yahudi. ⁴⁴ Diapm di'k nyerahkan jeh nyilu'k balo nyo suatu tana, kuat'n, ''Nyo di'k akan ku'k cium, Diapmlah nyo ngi. Dokiap Diapm dan tibat'n Diapm obu so'k pungawas.'' ⁴⁵ Dan, libo Yudas moni'k, diapm segera nyoma'k Yesus dan nyono'k, ''Rabi!'' Lalu, diapm ciupm Yesus. ⁴⁶ Kemudian, Balo nyo migit'n Yesus dan dokiap-Diapm. ⁴⁷ Namun, Nyi'k so'k balo nyo tokit, monu podakng diapm dan nyerang pulayan Imam Daeh , lalu nokokng koping ngi. ⁴⁸ Dan, Yesus nyono'k kanu balo nyo, ''Oniah mu'k moni'k ngan podakng dan tameng nya'k doliap Ku'k mah nyo punoku? ⁴⁹ Tiap onu, Ku'k busama ngan mu'k no'k Bait Bai Punopo'k samel ngajar, tapi mu'k kai nokiap Ku'k. Namun, hal tia terjodi supaya Kitab Suci dopit nigenapi.'' ⁵⁰ Kemudian, balo nyo sumua togat'n-Diapm dan obu. ⁵¹ Odiah nyo pemuda di'k ngaje'k Yesus, hanya ngonya'k kaikng lenan no'k wua ngi. Dan, balo nyo dokiap diapm, ⁵² tapi diapm togatn kaikng lenan han dan obu ngan lanyau. Yesus Nihakimi Pumipin Yahudi ⁵³ Kemudian, balo nyo matn Yesus kanu Imam Daeh. Dan, sumua kutua imam, dan balo nyo mutuh, dan balo ahli Taurat bupulua busama. ⁵⁴ Dan, Petrus ngajek Yesus so'k oju'k, sapai kanu halaman homing Imam Daeh. No'k nyih, diapm guhu'k busama balo pungawal samel nyinuah no'k opi. ⁵⁵ Balo ba'k Imam dan sumua Mahkamah Agama terus mogau kesaksian nya'k lawatn Yesus supaya balo nyo dopit kome'k-Diapm, tapi balo nyo kai dopit oniah-oniha. ⁵⁶ Sobab, obia nyo lakar nya'k lawatn-Diapm, tapi kesaksian balo nyo kai susuai nyi'k ngan di'k laikng. ⁵⁷ Kemudian, biatn nyo tokit dan nyilu'k kesaksian lakar Yesus, kuatn, ⁵⁸ ''Mi'k ngopikng Diapm nyono'k, 'Ku'k akan huhuah Bait Bai Punopo'k nih nyo moki, dan tohuah onu , Ku'k akan moki'ngi di'k laikng, di'k kai ni moki ngan tongan. '' ⁵⁹ Namun, nya'k hal tia pun kesaksian balo nyo kai susuai nyi'k ngan laikng. ⁶⁰ Lalu, Imam daeh tokit no'k tudo'k-tudo'k balo nyo dan misia'k kanu Yesus, ''Kadiah koh Mu'k nyilu'k jawaban kanu balo nyo di'k busaksi lawatn-Mu'k?'' ⁶¹ Akan tetapi, Diapm totap ponai dan kai nyawab. Imam daeh misia'k agi'k kanu Yesus dan nyono'k, ''Omatn koh Mu'k Mesias , Na'k Bai Punopo'k di'k Nimuji?'' ⁶² Dan, Yesus nyono'k, ''Ku'k lah Diapm, dan mu'k akan honong Nak Sio guhu'k no'k supia'k touh Di'k Mahakuasa dan moni'k busama ngan awan-awan no'k honyiatn.'' ⁶³ Lalu, samel ngujat jubah'ha, Imam daeh nyono'k, ''Ngoniah yah agi'k nginya'k saksi agi'k? ⁶⁴ Mu'k jeh ngopikng pungolo'k. Oniah keputusan mu'k?'' Dan, balo nyo sumua hukum-Diapm ngan hukuman kobe'k. ⁶⁵ Balo nyo mulai hucuah Diapm, dan nitiap jowi-Diapm, dan napar-Diapm, dan nyono'k kanu-Diapm, ''Bunubuatlah !'' Balo pungawal himo'k-Diapm ngan ninapar-Diapm. Petrus Kai Ngaku'k Yesus ⁶⁶ Dan, sementara Petrus agi'k ponai no'k sigatn jowi homing Imam Daeh, biatn na'k buah di'k dayua Imam Daeh moni'k. ⁶⁷ Dan, honong Petrus sedakng nyinuah, na'k buah han honong diapm dan nyono'k, ''Mu'k busama Yesus, Nyo Nazaret han.'' ⁶⁸ Namun, Petrus kai ngaku'k samial nyono'k, ''Ku'k kai tau'k dan kai tau'k oniah di'k mu'k nyono'k.'' Lalu, diapm obu kanu mitn, dan yap jago bukokok. ⁶⁹ Na'k buah di'k dayua han honong Petrus sukali agi'k dan mulai nyono'k agi'k kanu balo nyo di'k tokit, ''Nyo tia adalah nyi'k so'k balo nyo han.'' ⁷⁰ Akan tetapi, Diapm kai ngaku'k agi'k. Dan, kai oteh so'k han, balo nyo tokit nyono'k agi'k kanu Petrus, ''Mu'k pasti nyi'k so'k balo nyo han karena mu'k nyo Galilea.'' ⁷¹ Namun, Diapm mulai ngutu'k dan busupah, ''Ku'k kai kinal nyo di'k mu'k nyono'k!'' ⁷² Mosi'k so'k han, yap jago bukokok du kali dan Petrus sinyiatn akan oniah di'k jeh Yesus nyono'k kanu diapm, ''Guatn yap jago bukokok du kali, mu'k akan kai ngaku'k Ku'k tohuah kali.'' Lalu, Petrus kai dopit nahan tongis.