¹ Dan, libo balo nyo ho'k moni'k no'k Yerusalem, nyoma'k Betfage dan Betania, no'k dohi'k Zaitun, Yesus ngado'k du bolas murid-Diapm, ² dan nyono'k kanu balo nyo, ''obulah kanu opi'k no'k jowi mu'k, dan la'k jeh mu'k tamo'k wah'a , mu'k akan dopit 1 golo'k keledai di'k gi'k mungutn di'k ni ngisiat, di'k guatn suah ni ngosia'k nyo. Lopaskanlah keledai han dan tibatn kotu'k. ³ La'k biatn nyo misia'k kanu mu'k, 'Ngoniah mu'k hijang'i?', sano'k ngan, ' Punopo'k nginya'k keledai han dan akan copat ngirim agi'k kotu'k.''' ⁴ Lalu, balo nyo obu dan dopit keledai di'k gi'k mungutn di'k ningisiat no'k mitn, no'k ahokng sopo'k, no'k johatn, lalu balo nyo lopaskan. ⁵ Balo nyo tokit no'k nyih misia'k kanu balo nyo han, ''oniah nya'k mu'k lopas keledai han?'' ⁶ Balo nyo han nyawab mah di'k jeh Yesus nyono'k kanu balo nyo han, an balo nyo han kai nohuh balo nyo han obu. ⁷ Lalu, balo nyo matn keledai han kanu Yesus, ningono'k bojuh datn no'k somu keledai han, dan Yesus ghu'k no'k somu'ngi. ⁸ Dan, obia nyo mitar bujuh datn no'k johatn, dan di'k laikng mitar balo rantikng di'k datn dopit so'k mih. ⁹ Balo nyo obia di'k bujalatn no'k jowi dan di'k ngaje'k nyono'k, '' Hosana ! Niberkatilah Diapm di'k moni'k wah odatn Punopo'k. ¹⁰ Niberkatilah di'k moni'k kuhajaan Daud, ne'k moyang yah! Hosana, no'k ahokng di'k tingi'k!'' ¹¹ Kemudian, Yesus tamo'k kanu Yerusalem dan obu kanu Bai'k Bai Punopo'k . Dan, setelah honokng sukulilikng, Diapm kanu Betania busama du bolas murid-Diapm karna onu jeh lamat. Yesus Ngutu'k Koyuh Ara ¹² Dan, onu babut, libo datn obu so'k Betania, Yesus nginapm bihia'k. ¹³ Setelah honong bota koyuh ara di'k jeh bu dount so'k oju'k, Diapm obu nyak honong la'k biant sesuatu di'k tau'k diapm dopit no'k bota koyuh han. Libo Diapm moni'k no'k bota kuyuh han, Diapm kai dopit oniah-oniah kecuali daunt-daunt sobab libo han kai musim buok ara. ¹⁴ karna han, Yesus nyono'k kanu bota kuyuh han, ''yo'k odiah agi'k nyo di'k suah dua'k buo'k so'k mu'k nya'k sulamanya.'' Dan, balo murid-Diapm ngopikng. Yesus Obu kanu Bait Bai Punopo'k ¹⁵ Kemudian, balo nyo moni'k no'k Yerusalem. Dan, Yesus masok kanu Bait Bai Punopo'k dan mulai kobu balo nyo di'k sedakng bujual no'k Bait Bai Punopo'k. Diapm moliakkan balo meja punukar duet dan balo bangku nyo di'k nyual balo monua'k merpati , ¹⁶ dan Diapm kai agi'k ngijinkan nyo matn balo barakng lalu Bait Bai Punopo'k. ¹⁷ Kemudian, Yesus ngajar balo nyo dan nyono'k , ''kaikoh ninulis, 'homing mu'k akan ninyono'k homing doa bagi sumua bangsa' ? Akan tapi, mu'k jeh ngubah jodi ahokng punoku .'' ¹⁸ Dan, balo imam kupala'k dam balo ahli Taurat ngopikng diapm dan balo nyo mogau ca'ra makiah kome'k-E. Sobab, balo nyo gola'k kanu-ngu karena nyo obia han kagum akan pungajar. ¹⁹ Dan, libo onu ho'k ngohipm, Yesus dan balo murid-Diapm togatn kota han. Dopitlah Imam nok Wah Bai Punopo'k ²⁰ Lalu, libo maji onu libo balo nyo lalu, balo nyo honong bota koyuh ara dik jeh hakai kanu wat a. ²¹ Petrus sinyiant dan nyono'k kanu Yesus, ''Rabi, hononglah! bota kuyuh ara di'k mu'k kutuk jeh jodi hakai!'' ²² Dan, Yesus nyawab balonyo, ''pu'k lah iman no'k wah Bai Punopo'k . ²³ Ku'k nyono'k di'k omant kanu mu'k, osiah nyono'k ngado'k kanu gunung tia, 'mokatlah dan nimoraknglah kanu wah lawuat,' dan kadiah keraguan no'k wah otingi, tapi caya'k bahwa oniah di'k ni nyono'k akan jodi, maka hal han akan jodi kanungi. ²⁴ Sobab han, Ku'k nyono'k kanu mu'k, oniah di'k mu'k doakan damn mito'k, pucayaklah bahwa mu'k jeh himo'k o, maka hal han akan ninyilu'k kanu mu'k. ²⁵ Dan, apabila mu'k tokit dan budoa, ampunilah la'k mu'k ngono'k suatu nya'k nyo, supaya Pa'k mu'k di'k odiah no'k surga akan ngampunt sugala kusalahan mu'k. ²⁶ Namun, la'k mu'k kai ngampunt, Pa'k mu'k di'k no'k surga gi'k i akan ngamputn sumua kusalahn mu'k.'' Pumimpint Yahudi Misia'k tentakng Kuasa Yesus ²⁷ Kemudiant, balo nyo moni'k agi'k kanu Yerusalem. Sementara Yesus bujalant no'k Bait Bai Punopo'k, balo imam kupala'k, balo ahli Taurat, dan balo nyo mutuih Yahudi moni'k kanu-ngi. ²⁸ Dan, balo nyo ,''Ngan kuasa oniah Mu'k hijakan balohal han, atau osiah di'k nyilu'k-Mu'k kuasa nya'k hijangi?'' ²⁹ Yesus nyono'k kanu balo nyo, ''Ku'k akan misia'k kanu mu'k. Nyawablah Ku'k, bauh Ku'k akan nyono'k lanu mu'k ngan kuasa oniah Ku'k hija balo hal han. ³⁰ Oniahkoh babtisan Yohanes buasal so'k Surga atau na'k sio? Nyawablah Ku'k!'' ³¹ Balo nyo bupokat nyi'k ngan di'k laikng nyono'k, ''La'k yah nyawab, 'So'k surga,' Diapm akan nyono'k, 'Lalu, ngoniah mu'k kai pucaya'k kanungi?' ³² Akan tapi, la'k yah nyawab, 'So'k na'k sio'?'' Para pumimpint han gola'k kanu nyo obia karna balo nyo sumua ngangap bahwa Yohanes omant nyo nabi. ³³ Karna han, balo nyo, nyawab Yesus, ''Mi'k kadiah tau'k.''