¹ Jadi,Yusuf kasi jatuh de badan diatas depu bapa baru menangis dan cium depu bapa pu muka ² Yusuf de suruh de pu pembantu yaitu para dokter untuk membalsam de pu bapa pu mayat. Jadi, para dokter itu pun membalsam Yakub pu mayat. ³ Perlu empat puluh hari untuk bikin persiapan itu, karna slama itulah waktu yang dong butuh untuk pembalsam; dan, orang-orang Mesir dong berduka untuk Yakub selama tujuh puluh hari. ⁴ Trus masa duka selesai, Yusuf bilang sama para pejabat Firaun, “kalo sa dapat ko pu kemurahan tolong bilang ke Firaun: ⁵ ‘Sa bapa minta sa sumpah deng bilang: “sa nanti segera mati, karna itu kasi kubur sa di kuburan yang su sa gali sendiri di negeri Kanaan. Di sana kam harus kubur sa” Sbab itu, izinkan sa pigi dan kubur sa bapa , baru sa nanti kembali.’” ⁶ Firaun,jawab “Pigi dan kubur ko pu bapak seperti sumpah yang de minta untuk ko bikin.” ⁷ Jadi, Yusuf pigi untuk kubur de pu bapa dan Smua pelayan Firaun, tua-tua di de istana beserta tua-tua di seluruh tanah Mesir, juga pigi bersama Yusuf. ⁸ Bersama de juga semua orang dalam keluarga Yusuf, de pu keluarga sodara-sodara, dan smua orang dalam de pu bapa pu keluarga smua pergi, kecuali dong pu anak-anak dan kawanan ternak yang dong kas tinggal di tanah Gosyen. ⁹ Sama-sama deng dong juga pasukan berkuda dan kereta perang sampe rombongan itu jadi sangat besar. ¹⁰ Waktu dong sampe ke Goren-Haatad, di seberang Yordan, dong menangis dengan suara keras dan sangat sedih. Di tempat itu, Yusuf bikin duka untuk de pu bapa selama tujuh hari. ¹¹ Waktu orang-orang yang tinggal di Kanaan liat berduka di Goren-Haatad itu, dong bilang “Ini sperti dukacita yang menyedihkan bagi orang-orang Mesir.” Karna itu, tempat di dekat Yordan itu dong kasi nama Abel-Mizraim ¹² Jadi, anak-anak Yakub dong bikin sesuai apa yang su de pesan ke dorang. ¹³ Dong bawa mayat Abraham ke Kanaan dan kasi kubur de di gua yang ada di ladang Makhpela, baku sebela deng Mamre, yang dibeli Abraham jadi tanah kuburan dari Efron, orang Het. ¹⁴ Stelah de kubur de pu bapa , Yusuf kembali ke Mesir deng de pu sodara-sodara dan smua orang yang pigi deng de untuk kasi kubur de pu bapa. ¹⁵ Waktu sodara-sodara Yusuf sadar kalo dong pu bapa su meninggal, dong bilang“ Bagimana kalo Yusuf simpan dendam dan nanti balas smua kejahatan yang su kitong bikin ke de” ¹⁶ Jadi, dong kirim pesan ke Yusuf. dong bilang : “Sebelum mati, ko bapa tinggalkan pesan ini ke ko. ¹⁷ De bilang, ‘kasi tau buat Yusuf, kas ampun ko pu sodara-sodara dong pu salah dan dosa- dosa sbab dorang perna bikin salah sama ko.’ Karna itu, ampuni kesalahan dari hamba-hamba Allah ko bapa ini .” Yusuf menangis waktu de pu sodara- sodara kas tau ini ke de. ¹⁸ Trus, Yusuf pu sodara-sodara datang dan sujud di depan de. dong bilang “Liat, kitong ini ko pu hamba” ¹⁹ Trus, Yusuf kasi tau sama dong, “Jang takut! sa ini Allah ka? ²⁰ Memang benar kalo kam rencana jahat ke sa , tapi Allah bikin akan baik; supaya sa bisa buat apa yang su terjadi sekarang ini,kasi selamat orang banyak pu hidup. ²¹ Jadi, jang takut. sa akan pelihara kam dan kam pu anak-anak.” Demikian Yusuf kasi tenang de pu sodara-sodara dan bilang deng sopan ke dorang. ²² Yusuf tetap tinggal di Mesir sama de pu bapa pu keluarga Masa de hidup adalah seratus sepuluh tahun. ²³ Yusuf masih melihat generasi ketiga dari anak-anak Efraim. Bahkan anak-anak Makhir, anak Manasye, masih sempat di taru di pangkuan Yusuf. ²⁴ Trus, Yusuf bilang sama de pu sodara-sodara, “Sa pu hari kematian hampir datang. Tapi, Allah pasti akan perhatikan kam dan bawa kam keluar dari negeri ini ke tanah yang De janjikan dalam sumpah ke Abraham, Ishak, dan Yakub.” ²⁵ Yusuf minta anak-anak Israel sumpah ke de bilang, “Allah pasti akan perhatikan kam. maka itu, nanti, bawa sa pu tulang-tulang keluar dari sini.” ²⁶ Jadi, Yusuf mati di Mesir waktu umur seratus sepuluh tahun. Dan, setelah dong membalsam de pu mayat, dong taru de di sebuah peti mati di Mesir.