¹ Kemudian, Yusuf de bilang sama de pu hamba, de bilang“Isilah karung dong itu deng gandum sebanyak yang bisa dong bawa. Lalu, masukkan uang dong ke dalam dong pu karung masing-masing. ² Kam kasi masuk sa pu gelas perak ke dalam karung sodara yang paling muda itu sama-sama de pu uang untuk bayar de pu gandum juga.” lalu dong buat seperti yang Yusuf bilang. ³ waktu su pagi hari, terang tanah dorang kasih lepas dong sama sama deng dong pu keledai. ⁴ Tapi dong baru saja pergi tinggalkan kota itu dan belum terlalu jauh, Yusuf bilang sama de pu hamba, “Pergi dan kejar orang-orang itu. Saat kam su sampe di dong, bilang sama dong, ‘kenapa kam balas kebaikan deng kejahatan? ⁵ bukankah ini gelas yang sa pu tuan pake untuk minum dan di pakai untuk menelaah ? kam bikin begini itu sama saja kam su buat jahat ’” ⁶ waktu hamba itu, su sampe sama Yusuf de pu sodara-sodara, de bilang sama dong apa yang Yusuf bilang. ⁷ Tapi dong bilang sama hamba itu, “kenapa Tuanku kasih keluar kata kata yang begitu ? kitorang tra mungkin buat hal hal yang sperti begitu! ⁸ Lihat sudah, bahkan uang yang tong dapat di dalam karung, kitong su kasih kembali sama ko dari tanah Kanaan. Bagemana mungkin kitong curi perak atau emas dari ko pu tuan pu rumah? ⁹ jadi siapa yang sampe kedapatan ambil gelas itu, biar sudah de yang mati, dan kitorang siap jadi ko pu tuan pu budak. ¹⁰ Hamba itu de jawab, “Sa setuju. Hanya orang yang kedapatan bawa sa pu tuan pu gelas perak yang akan jadi sa pu budak, kam yang lain tu akan bebas dari salah.” ¹¹ Trus, dong masing-masing kasi turun dong pu karung ke tanah dan dong buka karung. ¹² Hamba itu mulai memeriksa, dimulai dari saudara yang tertua dan berakhir pada saudara yang bungsu. De ketemu gelas itu dalam Benyamin pu karung. ¹³ jadi, dong buka dong pu jubah dan masing masing angkat dong pu barang ke atas keledai, trus dong kembali ke kota. ¹⁴ Ketika Yehuda dan depu sodara dong kembali Yusuf pu rumah, Yusuf de masih di sana. Sodara-sodara itu rebah ke tanah dan sujud di depan Yusup. ¹⁵ Yusuf de bilang sama dong, “kenapa kam buat begini? Apakah kam tra tahu bahwa orang seperti sa ni pasti dapat menelaah ?” ¹⁶ Yehuda bilang, “Jawaban apa yang harus kitong kasi tau sama Tuanku? Apa yang harus tong jawab? dan bagemana tong bisa benarkan tong pu diri kalo tong ni tra bersalah ? Allah su tunjuk ko pu hamba-hamba pu kesalahan ini. jadi kitong ini, ko pu budak baik kitorang maupun de yang kedapatan bawa ko pu gelas itu.” ¹⁷ Akan tetapi, Yusuf berkata, “Sa tra akan bikin kalian smua hamba. Hanya orang yang kedapatan mencuri gelas itu yang akan menjadi sa pu hamba. Yang lain boleh pigi dalam damai sama kam pu bapa ” ¹⁸ Trus, Yehuda de mendekati Yusuf dan de bilang,"Tuan, biarkanlah hamba kasi tau sesuatu samaTuan ko. Tolong jang marah sama hamba ini, karna ko itu seperti Firaun sendiri ¹⁹ Tuan ko pernah bertanya sama hamba-hamba ini : Apakah kamorang ada punya bapa atau sodara?’ ²⁰ Dan kitong kase tau sama ko, ‘kitong punya bapa — de su tua. Dan kitong punya sodara bungsu. yang lahir pada saat bapa de sudah tua : de pu kaka su mati dari dong dua yang satu mama, hanya de sendiri yang tinggal. karna itu de bapa sangat mengasihi dia. ²¹ trus ko bilang sama torang, ‘kam bawa kampu sodara ketemu sa, supaya sa pu mata ini bisa lihat dia. ²² Dan kitong bilang sama ko, ‘Anak muda itu tra bisa datang. De tra bisa tinggalkan bapa Jika bapa kehilangan de, bapa sangat sedih dan de akan mati.’ ²³ tapi ko bilang sama tong ‘Kam harus bawa kam pu sodara bungsu kalo kam tra bawa, kam tra boleh lihat sa pu muka lagi. ²⁴ Jadi setelah kitong kembali sama tong pu bapa dan bilang sama de sesuai yang ko bilang ²⁵ habis itu, Tong pu Bapa de bilang : kam Kembali dan beli lagi makanan untuk kitong. ²⁶ kitong bilang sama tong pu bapa : kitong tra bisa pergi kesana tanpa tong pu sodara bungsu. karna kitong tra boleh lihat orang itu pu muka lagi, apabila ade yang bungsu tra ikut kitong sama sama. ²⁷ Lalu sa pu bapa bilang sama kitong, ‘Kam tahu bahwa sa pu bini Rahel melahirkan dua anak untuk sa. ²⁸ Sa kase biar satu orang anak pergi, dan sa su bilang kalo de itu di terkam binatang buas. Dan sampe sekarang tra lihat de kembali. ²⁹ Jika kam membawa anak yang satu lagi dari sa, dan sesuatu terjadi sama de, sa akan menjadi sedih skali sampe sa mati. ³⁰ Sekarang, bayangkan apa yang akan terjadi kalo kitong pulang tanpa bawa tong pu ade bungsu — kitong pu bapa tra bisa hidup tanpa dia! ³¹ tentulah akan terjadi, jadi sekarang kalo sa datang tanpa tong ade bungsu, kitong pu bapa yang rambut putih itu akan mati kalau de lihat anak itu tra sama-sama deng kitong. ³² tapi ko pu hamba ini sudah tanggung jawab anak itu dengan bilang sa pu bapa : kalo sa tra bawa de kembali sama bapa, jadi sa ini sudah yang berdosa sama bapa sampe selama lamanya. ³³ jadi karna itu sa mohon dengan sungguh sungguh biar ko pu hamba ini tinggal disini jadi ko pu budak gantikan anak itu biar anak itu de pulang sama sama deng de pu sodara sodara dorang. ³⁴ jadi kalo sa pulang sama sa pu bapa, trus anak itu tra sama sama deng sa ? sa tra sanggup lihat nasib celaka yang menimpa sa pu bapa”