¹ Satu hari, Dina, anak Lea dan Yakub keluar untuk lihat-lihat perempuan-perempuan di tempat itu. ² De dapat lihat oleh Sikhem, anak Hamor orang Hewi yang kuasai negri itu. Sikhem bawa Dina dan memperkosanya. ³ Tapi, hati Sikhem begitu suka sekali sama Dina, sampai de jatuh cinta ke cewe itu. Jadi Sikhem de kasih tau de pu perasaan sama cewe itu. ⁴ Sikhem bilang sama de bapa, “Tolong ambil prempuan ini supaya sa nikah deng dia.” ⁵ Yakub de tau kalau Sikhem su perkosa Dina, de anak. Tapi, de pu anak laki-laki smua ada di padang deng dong pu binatang-binatang piaraan, jadi de tra buat apa-apa sampe dong pulang. ⁶ Trus, bapa Sikhem, Hamor, pigi ketemu Yakub untuk bicara soal Dina. ⁷ Waktu anana laki-laki Yakub dong dengar berita soal Dina, dong sgera pulang dari padang dan sangat marah karna Sikhem su bikin malu Israel deng memperkosa anak perempuan Yakub sbab hal itu tra pantas dilakukan. ⁸ Tapi, Hamor bicara sama dong, “Sikhem dia pu hati su terikat deng Dina. Jadi biar Sikhem ambil de jadi de pu maitua. ⁹ Marilah tong baku ipar. Kam kasi kam pu anak perempuan untuk tong dan tong juga nanti kasih tong pu anana perempuan untuk kam. ¹⁰ Jadi, kam dapat tinggal deng tong, dan negri ini terbuka untuk kam. Kam tinggal di dalam, berdagang, dan kumpul kam pu harta darinya. ¹¹ Sikhem juga bicara sama bapa dan sodara-sodara laki-laki Dina, “Kalau sa dapat kam pu kebaikan, sa akan buat smua yang kam mau. ¹² Kam bisa minta mas kawin sebanyak yang kam mau dan sa akan kasi kam sesuai deng yang kam minta. Hanya, kasi cewe itu untuk jadi sa pu maitua.” ¹³ Karna saudari dong tlah diperkosa, anana laki-laki Yakub jawab Sikhem dan Hemor deng tipu daya. ¹⁴ Dong bilang, “Tong tra bisa buat begitu; tong tra bisa kasih tong pu sodari sama seorang laki-laki yang tra bersunat karna hal itu akan buat malu bagi tong. ¹⁵ Tong nanti kasi izin hanya kalau syarat ini ko penuhi: ko harus jadi sama sperti tong deng cara menyunat setiap laki-laki yang ada di antara kam. ¹⁶ Deng begitu, kam bisa kawin prempuan dari tong pu bangsa, dan tong bisa kawin deng prempuan dari ko pu bangsa sehingga tong bisa tinggal sama-sama dan jadi satu bangsa. ¹⁷ Tapi, kalau kam tra mau dapat sunat, tong akan bawa Dina dan pigi.” ¹⁸ Syarat itu diterima baik oleh Hamor dan Sikhem, anaknya. ¹⁹ Orang muda itu, yang adalah orang paling terhormat dalam de bapa pu keluarga, tra tunda-tunda waktu untuk buat itu karena de suka sekali anak prempuan dari Yakub. ²⁰ Jadi, Hamor dan Sikhem pigi ke dorang pu gerbang kota untuk bicara sama laki-laki di kota itu, ²¹ “Orang-orang ini dong ingin jadi tong pu saudara. Karna itu, biarlah dong tinggal di tong pu negeri dan berdagang di sini sbab negeri ini masih cukup luas bagi dong. Biarlah tong ambil dong pu anana prempuan jadi tong pu maitua, dan kasi tong pu anana perempuan untuk dong. ²² Hanya, ini syarat yang dong minta untuk bisa hidup sama-sama deng tong dan jadi satu bangsa: setiap laki-laki di antara tong harus dapa sunat sperti dong. ²³ Bukankah nantinya dong pu ternak, harta, dan hewan-hewan yang lainnya akan jadi tong punya? Jadi, marilah tong setuju deng dong pu syarat spaya dong tetap tinggal deng tong.” ²⁴ Smua laki-laki yang keluar dari gerbang kota itu setuju deng Hamor dan Sikhem, de anak. Jadi, setiap laki-laki di kota itu dapa sunat, smua yang keluar dari gerbang kota itu. ²⁵ Tiga hari kemudian, orang-orang su dapa sunat itu masih sakit. Dua anak dari Yakub, Simeon dan Lewi, tahu kalau dong waktu itu masih tra kuat. Jadi, dong pigi ke kota dan bunuh smua laki-laki di sana. ²⁶ Simeon dan Lewi juga bunuh Hamor dan de anak, Sikhem. Trus, dong bawa Dina keluar dari rumah Sikhem dan pigi. ²⁷ Anak-anak Yakub pergi ke kota dan curi smua yang ada di sana karna apa yang Sikhem su buat untuk dong pu sodari. ²⁸ Jadi, Yakub pu anana bawa dong pu binatang smua dan apa saja yang ada di dalam kota dan di ladang. ²⁹ Dong bawa smua milik orang-orang itu. Juga, dong bawa dong pu istri-istri dan anak-anak. ³⁰ Tapi, Yakub bicara sama Simeon dan Lewi, “Kam su kasi banyak kesulitan sama sa. Smua orang di tempat ini nanti benci sa. Smua orang Kanaan dan orang Feris nanti balik lawan sa. Tong hanya sedikit. Kalau dong di tempat ini gabung untuk lawn tong, sa nanti mati. Dan, tong semua nanti mati.” ³¹ Tapi Simeon dan Lewi bicara, “Apakah tong harus kasi biar dong ini bikin tong pu sodari sperti seorang pelacur? Dong su bikin hal yang salah sama tong pu sodari perempuan!”