¹ Achino, ichakutalika, nkhulenga ivyakuwakomya, amapepo, ukupepelana, nu kusalifya vyachitwa kuyanthu wonsi, ² kuli ya mwene na wonsi yano yali pa vifulo, umwakuti twayikala mumutende nuwumi uwa mya muwuleza wonsi nu mwata wuzima. ³ Chii ichizima nupya ichakuzumilizika pamanso yakwe Leza katula witu. ⁴ Weni akalonda ukuti ayanthu wonsi yize yapusuke nukwizamanya uwumolimo. ⁵ Pakuti kwaya Leza wenga, nupya kwaya umufusya wenga wakwe Leza nu munthu, umunthu Kilisitu Yesu. ⁶ Wayipile ukuya umupususi wakwe wonsi, ngati uwukamboni pansita yakuyana. ⁷ Pamulandu na chii nasozilwe ukuya ne kakosola nu mupositoli-nkhuvwanga uwumolimo, inthakuyipa uwufi-nukuya ne musambilizi wa yanthu yano yatamanya Leza mwisuwilo nuwumolimo. ⁸ Nomba, inkhulonda awonsi mumasyo wonsi pakupepa nukwimika mupela amakasa ayaswepe ukwawula ukusoka pamwi ukususya. ⁹ Munzila iyiliyimwi ayanachi yalingine ukuzwala ivizwalo ivyakuyanana, ninsonyi, nukuyilema, yataluka inyele zyawo mumilolechele yamwalwe pamwi navwakwe golide namawukasi pamwi ukuyizwika ivizwalo ivyamitengo ya papela, ¹⁰ kwene ku vyakuyanana na yanachi yano yakapepa Leza ukupitila mumilimo iyizima. ¹¹ Umwanachi alingine amyalala pano akusambilila nukuyisya konsi. ¹² Insikuzumilizya ukuti umwanachi asambilizya pamwi ukulamula ukuya papela pa monsi, kwene ukwikala sile mya. ¹³ Pakuti Adamu awuno watalichile pakwelewulwa apano Eva. ¹⁴ Adamu atayifilwe uwufi, kwene umwanachi awino wayifilwe uwufi nukuya umuyembu. ¹⁵ Napano wuli, umwanachi alipusuchila ukupitila pakupapa ayana, ndi yakupitilila mwisuwilo nu lukundo nu kuyiswefya nukuyichindika mukelenganyizizye.