¹ Ngasi muntu akayunva abarhegesi bamukulire,bulya nta burhegesi burharhenga emwa Nnamahanga.N'amarhegesi goshi ganahaba Nnamahanga yene wagajiraga. ² Nyola ngasi ogomera omurhegesi erhi irhegeko lya Nnamahanga agomire,n'abagoma bone bacilerera obuhane. ³ Abarhegesi barhali bakuyobohwa n'abajira aminja, ci abajira amabi, bo bakwanine okuyoboha,k'olonzize okurhayoboha abarhegesi? okajira aminja,bakusima, ⁴ bulya abo barhegesi Nnamahanga wabarhumaga mpu bakujirire aminja.Ci erhi wankakola amabi,oyobohe bulyala arhali busha bahekera engorho.Bali ntumwa za Nnamahanga na baganda b'obukunizi bwage balyuza abakola amabi. ⁵ Kusiga okwanine okabayunva,arhali boba bone burhumire,ci n'izu ly'omurhima lirhumire. ⁶ Kwo kunarhuma mwavurha okwo.Bulya abarhegesi kwo banali nka baganda ba Nnamahanga bajira omukolo gwabo. ⁷ Mukaha ngasi muguma ebi anakwanine:Omuvurhisa,mumuvurhire,omuhoza,mumuhe ihoro,owokurhinya mumurhinye,n'okwanine oku kuzibwa,mumukuze. ⁸ Murhaberaga omu mwenda g'omuntu aha nyuma ly'omwenda gw'obuzigire.Bulya ozigire ababo erhi ayunjuzize amarhegeko goshi. ⁹ Kwo binali aga marhegeko: "Orhagonaga,orhanigaga,orhazibaga,orhayemeraga enyifinjo mbi,"n'agandi marhegeko gali muli eci cinwa: Ozigire abinyu nk'oku ocizigira wene." ¹⁰ Ahali obuzigire harhankabonekana obubi oku bundi;Kusiga obuzigire lyo ishwinjiro ly'amarhegeko. ¹¹ Caba murhahabiri mango mahi gano rhulimwo,kakala kashanzi k'okuzuka.Obucire bukola burhuli hofi kulusha amango rhwa rhonderaga okuyemera. ¹² Obudufu bwalingigera,n'obuce bwayirhuka.Kusiga rhulekage ebijiro by'omwizizi,rhurhole amatumu g'obulangashane. ¹³ Rhucikenge omu lugendo lwirhu nk'oku kukwanine okujira izuba lyabasha,rhuleke obugonyi obudabye n'edalwe na nta bunvu,nta kujira ubumaguza,na nta nnongwe. ¹⁴ Mucihundikire Nnahano Yesu Kristu,na murhanacikig'irhogoza omubiri omu kushimba enyifinjo zagwo.