¹ Pantu twaishiba ukweba ai ngayawishiwa ing'anda yesu tuli ne Tempele ilyafuma kuli Lesa. Ing'anda iyakulwa neminwe yabantu, lelo ing'anda iya muyayaya mumulu. ² Eico muli iyi iyema emotwisha, pakufuluka tufwikwa icakwikalamo cesu ica mumulu. ³ Ukutila ai ngatwafwikwa tatwabe ubwamba. ⁴ Pantu icine cine elo twali mwi hema, twafwile, twafwikilwe ifisendo. Lelo tufwile ukuba abafwala pakweba ai icakufwa bacimine ku mweo. ⁵ Eico uwatu pekanishishe kuli ifi fintu ni Lesa uwatupela umupashi ukuba ecishibilo, kafili no kwisa. ⁶ Eico tuli abateke imitima inshita yonse, kabili twaishibo kweba ai ulo tuli pa ng'anda mui bumubili ninshi tuli abakutaluka kuli shikulu. ⁷ Pantu twendela mukucetekela temukumona. ⁸ Awe ico twateke mitima kabili tutila icawamako kukanaba pamo nomubili no kuba ku mwesu kuli shikulu. ⁹ Kanshi tubikepo imitima yesu nangu line tuli pa ng'anda nangula kumbi tube abakumusansamusha. ¹⁰ Eico ifwe bonse tuli nokwisa moneka ku cipuna cabupingushi icakwa Kristu ukuti umuntu onse umo umo akopokelela ifya bombelwe ku mubili wakwe umwabela ifyo abomele napamo icisuma atemwa ifibi. ¹¹ Eco, pakwishabo kutina kwakwa shikulu, tusembeleka abantu. Lelo kuli Lesa natulengwa ukumoneka, kabili ndecetekela ndetila tuli abalengwa ukumoneka nakuli bakampingu benu. ¹² Eco tatuleitakishisha nakabili kuli imwe lelo tulepela kuli imwe apakututakishishapo, ukutila ai mukwate umwakwasukila abatakisha fimoneka lelo ififishili fya mumutima . ¹³ Eco nelo ifwe tuli abapena, ni kuli Lesa; nalimo tuli abamano nipamulandu wamwebo. ¹⁴ Pantu icitemwiko cakwa Lesa eco ecitutungulula, pakupingula ai, ukutila umo afwilile bonse ninshi bonse balifwile. ¹⁵ Eco afwilile bonse ukutila abali no mweo beikalila abene, lelo ukutila ai bekalile umwabela uwaba fwilile, nokubuka pamulandu wabo. ¹⁶ Emulandu wine ifwe ukufuma pali lelo tatwaishiba muntu nelo umo umwalola ubuntunse, nelo twaishiba Kristu umwalola ubuntunse. Lelo nomba tatwamwishiba fyo kabili iyo. ¹⁷ Eico ngo muntu ali cilengo cipya. Ifya kale nafiya. Mona fyayaluka ifipya. ¹⁸ Ifintu fe fyonse fyafuma kuli Lesa uwatupalamika ku mwine muli Yesu nokutupela bukapyunga bwakuwikishanya. ¹⁹ Mukweba ai, Lesa ali muli Kristu alewikishisha abapano calo ku mwine, nokukana penda kuli bena amampulu yabo. Kabili apele kuli ifwe icebo ca kuwikishanya. ²⁰ Eco twabela injiminishi shakwa Kristu kwai ni Lesa eulepapatila fwebo. Tumulombele kuli Kristu; ai shimuwikishiwe kuli Lesa!" ²¹ Ushakwete isambi nelo limo, lelo amulengele ukuba uwa masambi, pamulandu wesu fwebo, pakweba ai tube abalungami kuli Lesa.