¹ Tani mara kan fi ayam dak, nas ketiriin, wa homon ma indu haja al homon bi akulu, Yesuah nadi talamiz tuo wa keli le homon, ² " Ana indu rahman le nas al ketir de leanu homon geni ma ana le fetera talata ayam wa homon ma indu haja ta akulu. ³ Iza kan ana rasulu homon le beyut tomon bidun akil, homon bi waga fi sika. baad min homon ja min mahal beyid." ⁴ Talamiz tuo asalu Howo, " Nina bi ligoish kefaya min wen ashan bi akilu nas de?" ⁵ Howo asalu homon, " Intum indu kam ish?" homon kelim, " sabaa." ⁶ Howo kelimu le nas ashan bi geni tehet. Howo shilu ish al sabaa, howo shukuru, Rabuna, wa kasuru. Howo wodi le talamiz tuo ashan bi sarafu, wa homon .sarafu le nas ⁷ Homon kaman kan indu haba samak, wa baad Howo wodi shukuran, Howo kelim le talamiz ashan bi wodi le nas. ⁸ Homon akulu wa homon sabaniin, wa bagi al fadulu, kan sabaa gufa al kubariin. ⁹ Nas de kan gerib le arba alf Yala Howo rasulu homon ashan bi ruwa. ¹⁰ Be sura keda Howo arkab murkab ma talamiz tuo, wa homon ruwa fi iklim ta Dalmanutha. ¹¹ Biga phariseen ja wa bada gi nakishu ma Howo, homon salu aya min sama ashan bi jeribu Howo. ¹² Howo juru nefes fi Roho tuo , wa kelim, " leh jeel de gi asalu aya? Al hagiga ana gi kelim le intum, mafi aya bi wodi le jeel de." ¹³ Biga Howo sibu homon, wa arkab fi murkab tani mara, wa ruwa le taraf bahar hinak. ¹⁴ Hasa talamiz nesitu ashan bi shilu ish ma homon, homon indu ma aktar min wahid ish fi murkab. ¹⁵ Howo arshidu homon gali, " Amulu hisab takum min kemira ta Phariseen wa kemira ta Herodus." ¹⁶ Talamiz bada fekiru wa wonusu fi baad tomon, "Ashan nina ma indu ish." ¹⁷ Yesuah kan arufu wa kelim, "le homon, leh intum gi fekiru inu intum ma indu ish? Hal intum ma gi fahim? Hal intum ma gi ashur? Hal gulup takum biga gowi? ¹⁸ Intum indu uyon, hal intum ma gi ainu? intum indu adana? hal intum ma gi asuma? hal intum ma gi zekiru? ¹⁹ Zaman ana kasuru kamsa ish le kamsa alf nefar, intum shilu kam min gufa al fadulu be ish al kasuru kasuru?" homon kelimu le Howo, "Itnashar" ²⁰ " Zaman ana kasuru saba gita ta ish le arba alf min nas, intum shilu kam min gufa al fadulu be ish al kasuru kasuru? " homon kelim le Howo, " saba." ²¹ Howo "?kelim, " hal intum lesa ma gi fahim ²² Homon ja fi bethsaida. Nas al hinak jibu le Howo zol al amiyan wa asal Howo ashan bi lemesu Howo. ²³ Yesuah gobudu zol de fi iden wa shilu howo bara min kariya, wa zaman Howo tufu buzak fi ina tuo wa kutu iden fi jesim tuo, Yesuah asalu howo," hal inta gi ainu haja?" ²⁴ Howo ainu fok, wa kelimu, " Ana gi ainu nas gi duwuru ze shejerat." ²⁵ Biga Yesuah tani mara kutu iden tuo fi ina ta zol de, wa ina tuo fata, wa howo gi ainu kulu hajat tamam. ²⁶ Yesuah rasulu howo fi bet wa kelim, " Ma keli inta dakalu fi medina." ²⁷ Yesuah ruwa ma talamiz tuo fi kariyat ta CaesareaPhilippi. Fi sika Howo asalu talamiz tuo, " Nas gi kelim gal ana munu?" ²⁸ Homon juwabu Howo wa kelimu, Yuhana al mamadan, baad min al nas gi kelim Eliah, wa baad gi kelimu inu inta wahid min al anbiya. ²⁹ Howo asalu homon, " Lakin intum gi kelim gali ana munu? Pitar kelimu le Howo, " Inta Howo al Mesi." ³⁰ Yesuah anziru homon ashan keli homon ma wori le ayi zol an Howo. ³¹ Howo bada alimu homon inu ibin al insan lazim bi ligo taab shedid wa bi abau Howo be Sheyuk wa Ruwasa ta kahiin wa al kataba, wa bi katulu wa bi gum baad talata ayam. ³² Howo wori kabara de wadih. biga pitar shilu Howo bara wa bada gi kor kore ma Howo. ³³ Lakin Yesuah lefu wa ainu le talamiz tuo, wa biga Howo kore kore ma pitar, " Ruwa bara min jambu ana, ya shetan! Inta ma gi kutu afkar taki fi hajat ta Rabuna, lakin fi hajat ta nas, ³⁴ Biga Howo nadi nas wa talamiz tuo ma baad, wa Howo kelim le homon, " Iza kan ayi zol deir duwuru wara tai, howo bi ankuru nefsa tuo, wa arufa selib tuo wa bi duwuru wara tai. ³⁵ Le kulu zol al deir kalisu haya tuo bi kasiranu, wa kulu zol al kasiranu haya tuo min ajil ana wa injil bi ligo kulasa. ³⁶ Sunu yahu insan bi ligo iza kan howo rebeh al alam de kulu wa howo kasran haya tuo? ³⁷ Shunu yahu insan bi agdeir bedalu ma haya tuo? ³⁸ Kulu zol al ma bi kun indu fadiya ashan ana wa kelimat tai fi jeel ta zena wa katiya, Ibin al insan bi kun indu fadiya le howo fi zaman al kan ".howo gi ja fi majid ta tuo wa malikat al kudus