¹ Howo tala min hinak wa ja fi belet tuo, wa talamiz tuo ruwa wara Howo. ² Howo derisu fi yom sebit, fi mujama tomon. Nas kutar kan asuma howo wa homon mustagarabiin. homon kelim, " Howo ligu talim de min we?" " De yatu hikma al wodi le howo de?" " De yatu mujezat al Howo gi amulu ma ide tuo?" " ³ Hal de ma yahu najar de, jena ta Mery wa Aku ta Jemis wa Josis wa Judas wa Simon? Hal Akwat tuo ma yahu ma nina hina?" Kan Yesuh koer kore ma homon. ⁴ Biga Yesuah kelimle homon , " Ma bi ihtaramu nebi, ila fi beled wa fi nus ta nas tuo wa ahal wa nas ta bet tuo." ⁵ Howo kan ma bi agder amulu ayi shukul al gowi, ila howo kutu iden le nas besit al ayaniin wa aliju homon. ⁶ 6Howo kan istagarab min adam imaan tomon. biga howo ruwa fi kariyat taniin ashan bi derisu. ⁷ Biga Howo nadi talamiz al itnashar wa bada rasulu homon itiin itniin wa Howo wodi le homon sulta did arwah al sheriira, ⁸ Wa howo arshidu homon ashan keli ma shilu ayi haja fi safar tomon de, ila asaya-Mafi rekef, mafi shinta, wa mafi gurush fi kes tomon- ⁹ Lakin keli intum lebisu shabat wa ma bi lebisu itnii gumas. ¹⁰ Howo kelim le homon, " Kan intum dakalu fi bet, geni takum lahadi intum tala min hinak. ¹¹ Iza kan fi nas ma istagbal intum aw ma asuma le intum, kan intum gi tala min mahal tomon, masa takum turab ta kura takum ze shihada le homon. ¹² Homon ruwa bashiru le nas ashan ashan tuba. ¹³ Homon turuju al arwah al sherira, wa masa nas ketiir al ayaniin be zeat wa aliju homon. ¹⁴ Biga melik Herodus asuma kabara de, Isem ta Yesuah biga arufu shedid. Fi baad min nas gi kelim, " inu howo Yuhana al mamadan min mutu, wa de yahu al sabab ta gowa ta mujesa de gi stakal fi howo." ¹⁵ Fii baad min nas gi kelim, " Inu howo Eliya." wa fii baad min nas kelim, " Inu howo nebi, ze wahid min al anbiya ta zaman." ¹⁶ Lakin zaman Herodus asuma kabara de howo kelim, " Yuhana, al ana gata ras tuo, gum min mutu." ¹⁷ Wa kan Herodus gubudu wa sejenu howo fi kalam Herodias (Mara ta Aku tuo Philip), Leanu howo juwzu mara de. ¹⁸ Ashan Yuhana kelim le Herous, " howo ma ganuni ashan inta bi juwzu mara ta Aku taki." ¹⁹ Lakin Herodus kan zalan min howo wa deir katulu, lakin hiya ma agder. ²⁰ Herodus gi kafu Yuhana; howo arufu inu howo zol kwes wa zol Rohi, wa howo kan gi hafisu howo, wa gi asuma le howo wa tebshir ta Yuhana gi waja gelba tuo shedid, wa lesa howo gi asuma le howo bi farah. ²¹ Biga yom al kwes ja zaman ied melad ta herodus wa howo amulu asha le muazafiin wa nas al kubar ta Galilee. ²² Biniya ta Herodus ja wa alabu gedam nas, wa hiya sibu Herodus wa deyuf tuo tala farhaniin. Al melik kelim le biniya de, "Asalu ayi haja al inta deru ana bi wodi le inta." ²³ Howo halifu le hiya, " Ana bi wodi le inta, ayi haja al inta asalu, wa hata nus ta mamlaka tai." ²⁴ Hiya wa kelim le Uma tuo, " keli ana asalu shunu min howo?" ²⁵ Hiya kelim, " Ras ta Yuhana al mamadan." Be sura keda hiya reja le melik, wa asalu, gali, " Ana deru keli inta wodi le ana, hasa de, ras ta Yuhana al mamadan fi sahan." ²⁶ Hata melik kan zalan shedid, howo ma agder ashan aba talab ta hiya ashan haifa al kan howo amulu wa kaman ashan deyuf ta tuo. ²⁷ Biga melik rasulu askeri wa amiru howo ashan bi jibu le howo ras ta Yuhana. al haras ruwa wa gata ras tuo fi sejiin. ²⁸ Howo jibu ras ta Yuhan fi sahan wa wodi le biniya de, wa biniya de wodi le Uma ta tuo. ²⁹ Zaman talamiz tuo asuma kabar de, homon ja wa shelu jesim ta tuo wa dufunu fi turba. ³⁰ Talamiz ja ma baad le Yuhana wa kelim le howo kulu an hajat al homon amulu wa derisu. ³¹ Wa biga howo kelim le homon, " Tal takum le mahal al fadi wa akudu raha shuwiya." nas ketiir gi ja wa gi ruwa, wa homon ma indu zaman le akulu. ³² Yala homon ruwa fi murkab fi mahal al nas mafi fugu. ³³ Lakin homon ainu nas Yesuah gi ruwa, wa homon arufu homon, wa homon jeri hinak ma kuraiin min kulu medina . ³⁴ Zaman homon ja fi taraf bahar, Howo ainu nas ketiir wa Howo hin le homon,leanu homon ze kuruf al ma indu sedu, biga Howobada alimu homon hajat ketiir. ³⁵ Zaman wokit biga mutaakir, talamiz bituo ja le Howo wa kelim," ³⁶ Mahal de khala wa zaman biga mutaakiir. Rasulu ashan bi ruwa fi juwa hela ashan bi biyu hajat ta akulu tomon. ³⁷ Lakin Howo kelim le homon, " wodi takum hajt ta akulu le homon." homon kelim le Howo, " Kef nina bi ruwa biyu ish bi maatiin denar ashan bi wodi le homon wa bi akulu?" ³⁸ Ruwa takum ainu, itakum indu kam ish?" zaman homon ligu homon kelim, "khamsa ish wa itniin samaga." ³⁹ Howo amiru nas kulu ashan bi geni tehet fi gesh fi mujmuat. ⁴⁰ Homon geni tehet fi mujmuat ta meya, wa khamsin, khamsin. ⁴¹ Howo shelu khamsa ish wa itniin samaga, wa Howo bada ainu fi sama wa bariku wa kasuru ish dema samaga de wa bada wodi le talamiz ashan bi waza le nas. wa Howo kaman gesimu samaga de le nas kulu. ⁴² Homon akulu lahadi homon biga sabaniin. ⁴³ Wa bagi ish wa samgat fadulu, guduru itnashar kes. ⁴⁴ Wa nas al kan akulu de adad tomon khamsa alf. ⁴⁵ Biga bi sura keda Howo kelim le talamiz ashan keli arkab fi murkab, wa Howo ruwa gedam fi taraf bahar, fi Betsida, fi wokit Howo fertiku nas. ⁴⁶ Zaman homon ruwa, Howo ruwa fi jebel ashan bi seli. ⁴⁷ Zaman wata biga ashiya, wa kan murkab fi nus ta bahar, wa kan Howo baru fi taraf bahar. ⁴⁸ Howo kan ainu homon tabaniin fi sugu murkab, leanu hawa kan bi ja bi aks.Gerib sabah Howo ja le homon, wa Howo gi doru fi ras moyo wa Howo deru ja ashan bi ruwa jambu homon. ⁴⁹ Lakin zaman homon ainu Howo gi doru fi ras moyo, homon fekiru inu Howo baati wa homon kore bi sut shedid. ⁵⁰ Ashan homon ainu Howo wa homon kan kafu. Biga bi sura keda Howo kelim le homon, " gowi takum gelba! deana! ma takum kafu!" ⁵¹ Howo arkab fi murkab ma homon, wa hawa al kan shedid biga wogif.homon kan istagrab shedid . ⁵² Homon kan ma fahimu kalam ta ish de. Ashan kan, gulub tomon gowi. ⁵³ Zaman homon gata bahar homon fi ard ta Genisarat wa wogif murkab. ⁵⁴ Zaman homon tala bara min murkab, bi sur keda arufu Howo, ⁵⁵ Wa homon bada jere hawili beled kulu ashan bi jebu nas al ayaniin fi sarair tomon min ayi mahal al kan homon asuma Yesua fogu. ⁵⁶ Kulu ma kan Howo bi dakalu kariya, aw fi medina, aw fi beled, homon bi kutu nas al ayaniin fi suk , homon gi asalu asha homon bi lemesu taraf gumas wa nas ketiir kan lemesu, wa homon .kan tala kwes