¹ Zaman Ephraim wonusu, kan fi rijfa. Huwo arfa nefsu fi Israel, lakin biga galtan ashan abidu Baal, wa huwo mat. ² Hasa humon amulu khatiya ketir wa ketir. Humon bi amulu shikil ta hadid min fidah, asnam al sanau tamam, humon kulu shokol ta zol sinai. Shab bi kelim an humon, 'nas del bi amulu gubla le abgar(sanam ta abgar).' ³ Yala humon bikun ze sihaf ta sabah, ze nada al bi nasif sabah bedri, ze wasaka al shilu be hawa min ardi bi dugu fogo dura, wa ze dukhan al min tahuna(sherka). ⁴ Lakin ana Yahwa Allah takum min ardi ta Masir. Kede Intum ma abidu Allah tani geir ana; intum lazim bi abidu ana bes, Mafi mukhalis tani. ⁵ Ana arufu intum fi beriya, Fii ardi al yabis . ⁶ Zaman kan indakum akil, intum biga sabanin; wa zaman intum sabanin, Gulub takum biga fok. be sabab dak intum nesitu ana. ⁷ Ana bikun ze ased le humon; Ana bi ainu fi sika ze nimir. ⁸ Ana bi hajimu humon ze morfoin al iyal tou shilu. Ana bi fatau dush tomon, wa ana bi akulu humon ze ased, ze haiwan al kaab(wais) bi seretu humon heta heta. ⁹ Israel, Ana bi demiru inta; munu bi agder ashan saidu inta? ¹⁰ Hasa wenu melik taki, Ashan huwo bi ankizu inta fi mudum taki? Wenu ruasa taki, al inta kelimu le ana, 'Wodi le ana melik wa amra'? ¹¹ Ana wodi le inta melik be zel, wa ana shilu huwo bara be zel. ¹² khazinu Khatiya ta Ephaim fok; khatiya tou khazinu fok. ¹³ Waja ta weleda bi ja le inta, lakin huwo weled al ma negit, kan wokit ta weleda wosulu, huwo ma bi tala min rihim. ¹⁴ Hal ana bi ankizu humon min Sheol? Hal ana bi ankizu humon min mutu? Mutu, wenu, darbad taki? Sheol, wenu, dimar taki? dusu rahma min uyun tai." ¹⁵ Hata lo Ephraim ghani beinu akwana tou, hawa ta sherik bi ja; hawa ta Yahwa bi tala min beriya. Nabt ta Ephraim bi yabiz, wa biir tou ma bi endu moya. Adu tou bi nahabu kulu hajat al kwes min makzan. ¹⁶ Samaria bikun galtan, hiya itmarad did Allah tou. Humon bi waga fi harb; bi sheretu .iyal tomon al sukerin heta heta. bi fatau batnat ta nusuwan tomon al hamilanin