¹ Asuma, ya Israel; intum gerib bi ruwa gata Nahr Ordon, bi ruwa turujo shuob aazam wa akbar min itakum, wa mudon tumon kobar gofulo be aswar tawil lahadi sama, ² nas kubar wa tuwal, de iyal ta Anakien, intumbi arufu humon, wa intum asuma nas bi wonoso ann humon gali,' Munu bi akider wogif gidam ta iyal ta Anakien?' ³ Kede intum arufu alela Yahuwa Allah takum bi dawru gidam takum ze nar al bi akila; huwo bi demiro humon, wa huwo bi taabo humon fi gidam takum; biga intum bi turudo humon bara wa kutu humon bi woduro min duniya be sura, ze ma Yahuwa kelimo le intum. ⁴ Matakum kelimo fi gulob takum baad Yahuwa Allah takum demiro humon bara min gidam takum,' ashan enna kowaisin yao Yahuwa jibo enn ashan bi imtalik ard de,' lakin ashan khataya tumon al ketir yao Yahuwa bi turudo humon min gidam takum. ⁵ De ma ashan kowais aw shokol addel takum yoa intum bi ruwa imtalik ard tumon, lakin be sabab khataya tumonyao Allah takum bi turudo humon min gidam takum, wa ashan huwo bi timo wwad tou al huwo halifo le abuhat takum, Ebraheem, Ishak, wa Yacob. ⁶ Kede intum arufo, Yahuwa Allah takum ma bi wodi ard al tama de le intum ashan bi imtaliko ashan intum kowaisin, leano intum shaab aneed. ⁷ Zekir wa matakum nisito kef intum kutu Yahuwa Allah tala zalan fi sahra; min zaman al intum tala min ard Masir lahadi intum ja fi maka de, intum kan bi itmerid did Yahuwa. ⁸ Kaman fi Jebel Hurib intum sibo Yahuwa zalan, wa Yahuwa kan zalan lahadi huwo azo demiro intum. ⁹ Zaman ana tala fok fi jebel ashan istalim loh ta hajer ta ahad al Yahuwa amolo ma intum, Ana geni fi jebel arbaiin nahar wa arbaiin leil; Ana ma akulu ash wele ashrab moyo. ¹⁰ Yahuwa wodi le ana itnen loh ta hajer maktub be asbaa tou; katib fugu kulu haja, kulu kelimat al Yahuwa alino le intum fi jebel min juwa naar fi yon ta ijtima. ¹¹ Fi nihaya ta arbaiin nahar wa arbaiin leil Yahuwa wodi le ana itnen loh ta hajer, loh ta ahad. ¹² Yahuwa kelimo le ana, 'Gum, ruwa wa nenzil be sura, ashan shab taki, al ita tala humon min Masir, humon wodoro. Humon be sura tala bara min sika al ana amiro humo. Humon sala le nefsa tomon timsal.' ¹³ Kaman Yahuwa wonoso gali,' ana geni aino shab de; humon shab aned. ¹⁴ Sibo ana barao, ashan demiro humon wa masa isim tumon min tehet sama, wa ana bi tala min ita shab aazam wa akbar min humon.' ¹⁵ Fa ana aglibo wa nenzil tehe min jebel, wa jebel kan lisa bi wala nar. Itnen loh ta adah kan fi iden tai. ¹⁶ Ana aino, wa sadma kan gobudu ana zaman ana iyno intum amolo katiya did Yahuwa Allah takum. Intum amolo le nefsa takum ijel ashan abido. Intum tala be sura min sika al Yahuwa amiro intum. ¹⁷ Ana shilo itnen loh de wa jadao humon min iden tai. wa kasuro humon fi gidam iyon takum. ¹⁸ Ana waga tani fi gidam ta Yahuwa fatra ta arbaiin nahar wa arbaiin leil; bido akil wa la moyo, shan katiya al intum kulu kan amolo, be amolo haja al batal fi gidam ta Yahuwa, al bi sibo huwo tala zalan. ¹⁹ Leano ana kafo min zalan wa nar ta gadab al bi sibo Yahuwa demiro intum. Lakin Yahuwa asoma le ana le marra tani. ²⁰ Yahuwa kan zalan shedid min Haron huwo kan gerib bi demiro huwo; ana kaman seli le Haron, huwo asoma le ana. ²¹ Ana shilo katiy takum, wa harago ijel al intum kan amolo, degigo, wa atano hata biga khafif ze gubar. Ana kubo turab tou fi nahar al gi nenzil min jebel. ²² Ajdad taukm kman kutu Yahuwa tala zalan shedid fi Tabera, fi Massa, wa fi Gabrot Hatawah. ²³ Wakid Yahuwa rasulo intum min Gadish Barne wa kelimo,' Ruwa tala takum wa imteliko ard al ana wodi le intum,' intum ka itmerid did awamir ta Yahuwa Allah takum, wa intum kan ma amin aw asuma le sout tou. ²⁴ Intum mutameriden did Yahuwa min yom al ana arufo intum. ²⁵ Fa, ana dengir wosa tai gidam ta Yahuwa fatra ta arbaiin nahar wa arbaiin liel, ashan huwo kelimo ino huwo bi demiro intum. ²⁶ Ana seli le Yahuwa wa kelimo,' Ya Rabana Yahuwa, mata demiro shab taki wa miras taki al ita inkizo be guwa al azim, wa ita tala humon min Masir be be gudra al foto kulu. ²⁷ Zekiro khudam taki Ebraheem, Ishac, wa Yacob; mata iyno le shokol ras gowi ta shaab de, wala le sharr tumon, wala le katiya tumon, ²⁸ ashan shab ta Masir ma bi kelimo," Yahuwa tala humon ashan katulo humon fi sahra, leano huwo ma akider dakalo humon fi ard al huwo waado le humon, wa ashan huwo ga akrah humon." ²⁹ Humon shaab taki wa miras taki, al ita tala humon '.be gudra taki al fut wa be guwa taki al azim