¹ Umfweni, mwebana baume, ku mafundisho yakwa shinwe, nokukutika pakuti mwingeshibisha ifyo ukwiluka kwaba. ² Ine ndemipela amafundisho ayasuma; mwisula ukusambilisha kwandi. ³ Ilyo nali umwana mwaume wakwatata, umuteku elyo umo umwana wakwamayo, ⁴ alimfundile kabili atile kuli ine, "leka umutima obe wikatishe ku fyebo fyandi; usunge ukukonkomesha kwandi elyo ukabe no mweo. ⁵ Tola amano no kwiluka; wilaba kabili wisula ifye fya mukanwa kandi; ⁶ Wisangukila amano kabili yakalamona pali iwe; yatemwe na yena yakalakusunga bwino. ⁷ Amano e cintu cimo icikankala, eico nonka amano no kuposa ifyuma fyobe fyonse pakuti ukwate ukwiluka. ⁸ Cindika amano nayo yakakusansabika yakakucindamika ilyo wayafumbatisha. ⁹ Yakakufwika icitebo cabucindami pa mutwe obe; yakakupela icilongwe icayemba." ¹⁰ Umfwa, we mwana mwaume wandi, kabili kutila kufyebo fyandi, elyo ukakwata imyaka iyi mu bwikashi bobe. ¹¹ Ine nakulangilila mu nshila iya mano; nakutungulula munshila iyaololoka. ¹² Ilyo uleenda, takuli nangu umo uwakwiminina mu nshila yobe kabili nga wabutuka, tawakaipunune. ¹³ Ikatilila kwifunde, wileka likushe; lisungilile, pantu lyena e bumi bobe. ¹⁴ Wilakonka inshila yamubifi kabili wilaenda mu nshila sha abo abacita ububi. ¹⁵ Ikane, wiyendamo; fumamo muli yena nokuya munshila imbi. ¹⁶ Pantu bena tabalala mpaka bacita ububi kabili tabamona utulo mpakafye balenga umo kukuipununa. ¹⁷ Pantu bena balya umukate uwabubifi kabili banwa umwangashi wa cimfulunganya. ¹⁸ Lelo inshila yabntu abalungama ili nga ulubuto ulwakubalilapo ulo uluya lule kulilakofye ukubutisha; lwena luyalulelundamo fye ukubaliak mpaka ukwisushiwa kwa kasuba kwafika. ¹⁹ Inshila yababifi yaba nge mfifi-bena tabeshiba icilenga pakuipununa. ²⁰ We mwana mwaume wandi, kutika ku fyebo fyandi; pepeka ukutwi kobe ku kusosa kwandi. ²¹ Wileka fifume ku cinso cobe; ufisunge mu mutima obe. ²² Pantu ifyebo fyandi fya mweo kuli abo abafisanga no bumi ku mibili yabo yonse. ²³ Sunga umweo obe bwino no kuulama namano yonse, pantu kuli yena kufuma ukupongoloka kwa milonga ya mweo. ²⁴ Fumyapo ukulanda ukushili kwa cine kabili bika ukulanda kwabucenjeshi apa tali na iwe. ²⁵ Leka amenso yobe yalelolesha ku ntanshi kabili uletonta apalungeme amenso yobe. ²⁶ Panga inshila iyalingana ku makasa yenu; elyo inshila shenu shonse shikaba isha shininkishiwa. ²⁷ Wila alukila ku kulyo nangu kukuso; talusha amakasa yobe yafume ku fibi.