¹ Umwanakashi wamano akuula inganda yakwe, lelo umwanakashi icipumbu alayonawila ne minwe yakwe. ² Uyo uwendela mubulungami atina Yawe, lelo uyu ushaba nacishinka mu nshila shakwe alamulekelesha. ³ Ukufuma ku kanwa ka cipumbu kwiisa ubwembya bwa kunuma kwakwe, lelo imilomo ya mano ilafisungilila. ⁴ Uko ukushili ingombe, umwakulila mubafye umwabusaka, lelo ubwingi bwacilimwa bwishila ukufuma mumaka ya ngombe shakuliminako ⁵ Kambone wa cishinka tabepa, lelo kambone wa bufi apema ubufi. ⁶ Uupumya akabilisha amano kabili takuba kantu, lelo ubwishibilo bwisa mukwanguka kuli uyo uulingulula. ⁷ Fumako ku muntu icipumbu, pantu iwe tawakasangemo ubwishibilo pa milomo yakwe. ⁸ Amano ya muntu wacenjela ku mfwikisha inshila shakwe ukubwatauka kwa fipumbu kulufya. ⁹ Ifipumbu filapumya ilyo icabupe cakubelelwa uluse cilepelwa, lelo pa balungami ububile bulakanishiwa. ¹⁰ Umutima uleshiba ukukalipwa kwabuko kabili takuli mweni wakanako insansa shauko. ¹¹ Inganda ya bantu ababifi ikonaulwa, lelo itenti lya mololoke likakula. ¹² Kwaliba inshila isho shimoneka ishaololoka ku muntu, lelo impela yabuko itwalafye ku mfwa. ¹³ Umutima kuti waseka lelo ucili mu mubukali ne nsansa shilekelesha ukuba mubulanda. ¹⁴ Uyo uushili wacishinka akapoka ifya inshila shamb ela shakwe, lelo umuntu umusuma alinokupoka ifili ifyakwe. ¹⁵ Imbulwamano isumina na fyonse, lelo umuntu uwacenjela atontokanya palwa ntampulo shakwe. ¹⁶ Umuntu wa mano alatina no kupilibuka ukufuma ku fibi, lelo icipumbu mukupama cikana ukusokwa. ¹⁷ Uyo uwangufyanya ukufulwa acita ifintu ifyabupumbu, no muntu uyo uucita amapange alapatwa. ¹⁸ Imbulwamano ipyano ubupumbu, lelo abantu abacenjela balafwikwa ubwishibilo. ¹⁹ Abantu ababi bakakontamina panshi pacinso ca basuma naba bifi bakakontamina panshi pa mpongolo sha muntu umulungami. ²⁰ Umuntu umulanda alipatwa nangufye kubatemwikwa bakwe bene, lelo umuntu umukankala alikwata ifibusa ifingi. ²¹ Uyo uulangisha ukususha ku mwina mupalamano alabembuka, lelo uyo uulangisha ububile ku mulanda alipalwa. ²² Bushe abapangila abanabo ifyabipa tabalufyanya? Lelo abo aba pangila ukucita icisuma bakapokelela ukutemwa kwapwililila ne cishinka. ²³ Mukubombesha konse mwisa ubukumu, lelo ilyo kulifye ukulanda, ciutwala ku bubusu. ²⁴ Icilongwe ca bantu ba mano e fyuma fyabo, lelo ubuwelewele bwa cipumbu buletafye ubuwelewele nabumbi. ²⁵ Kambone wa cishinka apususha imyeo, lelo kambonbe wabufi apema ubufi. ²⁶ Ilyo umo atina Yawe, alakwata icicetekelo muli ena ifyo fintu fikaba nincende iyakosa iya cingililwa ku bana ba uyo muntu. ²⁷ Akatina kakwa Yawe e kamfukumfuku ka mweo, ukuto umuntu apilibuke ukufuma ku fiteyo fya mfwa. ²⁸ Ubukata bwa mfumu busangwa mu mpendwa ya bantu bakwe, lelo ukwabula abantu umwana wa mfumu umwaume alonaulwa. ²⁹ Umuntu uulolela alikwata ukumfwikisha ukukalamba lelo umuntu uwacipyu emya ubuwelewele. ³⁰ Umutima waisulamo icebo ebumi bwa mubili lhelo akalumwa kabosha amafupa. ³¹ Uyo uutitikisha ababusu atipwila uwa mupangile, lelo uyo ulangisha ububile ku balekabila alamucindika. ³² Umuntu mubi abweshiwa panshi mu micitile yakwe iyabipa, lelo umuntu umulungami alikwata icubo nangu mu mfwa. ³³ Amano yacifyalilwa yekalilila mu mutima uulingulula, lelo nangu pa fipumbu ena alekelela umwine ukwishibikwa. ³⁴ Ukucita ifya lungama kusumbula icalo, lelo isambi camusebanya ku muntu uuli onse. ³⁵ Ububile nwa mfumu bwaba no mubomfi uyo uwa cenjela mumicitile, lelo ubukali bwakwe bwakuli uyo uwamicitile yansoni.