¹ Yesus mangajar pulang di pinggir danau. Maka bakumpullah urang banyak mangarumuni Yesus sahingga sidin naik kadalam sabuah jukung di atas danau wan duduk disitu. sementara, urang banyak barada di pinggir danau. ² Sidin mangajar buhannya tantang banyak hal malalui parumpamaan-parumpamaan. Dalam pangajaran Sidin, Sidin baucap ka buhannya, ³ "Dangarlah! Ada saurang panabur nang tulak manabur. ⁴ Maka tajadilah, waktu inya haratan manabur, babarapa banih gugur di pinggir jalan, burung burung datang, lalu mamakannya. ⁵ Sabagian gugur di atas tanah babatu nang kada banyak tanahnya. Banih nitu lakas tumbuh lantaran tanahnya kada dalam. ⁶ Waktu matahari samakin panas, tanaman nitu hangus karana kada baisi akar, lalu tanamanya karing. ⁷ Sabagian gugur di tangah-tangah samak duri. Lalu, samak duri tumbuh wan manggapit tanaman nitu sampai mati, wan tanamanya kada babuah. ⁸ Namun, sabagian gugur di tanah nang baik wan mahasilakan buah, batumbuh , wan batambah ganal, mahasilakan tiga puluh kali lipat, anam puluh kali lipat, wan saratus kali lipat." ⁹ Lalu, Yesus baucap, "siapa nang baisi talinga gasan mandangar, biarlah inya mandangar!" ¹⁰ Wayah Yesus saurangan, urang di sekeliling Sidin, basama lawan kadua belas rasul, batakun ka sidin tantang parumpamaan-parumpamaan nitu. ¹¹ Lalu, Sidin manjawan buhannya, "Rahasia Karajaan Allah sudah dijulung gasan ikam. Tapi, ka urang-urang lain, satiap hal di sampaiakan dalam parumpamaan-parumpamaan, ¹² supaya, walaupun kawa maitihi, buhannya maitihi tapi kada mangatahui; walaupun kawa mandangar, buhannya mandangar tapi kada mamahami. Supaya buhannya jangan batobat wan diampuni.'" Panjalasan Tantang Banih dalam Parumpamaan Panabur ¹³ Imbah nitu Yesus baucap ka buhannya, "kada kah ikam paham parumpamaan ini? Kaya apa ikam kawa paham sabarataan parumpamaan nitu? ¹⁴ Panabur nitu manaburakan firman. ¹⁵ Buhannya adalah urang-urang nang gugur di pinggir jalan, wadah firman ditaburakan. Saat buhannya mandangar, hancap setan datang wan marabut firman nang ditaburakan ka buhannya ¹⁶ Kaya itu jua, buhan nang ditabur di tanah babatu adalah urang-urang nang mandangar firman wan hancap manarimanya awan sukacita. ¹⁷ Tapi, buhannya kada baakar di dalam dirinya saurang wan hanya batahan satumat. Imbah nitu, pas datang kasulitan wan panganiayaan karana firman nitu, buhannya lakas jatuh. ¹⁸ Wan, lainnya adalah nang gugur di tangah-tangah samak duri. Buhannya adalah urang-urang nang mandangar firman, ¹⁹ tapi kakhawatiran dunia, wan hawa nafsu akan kasugihan, wan kahandakan akan hal-hal lain masuk diantara firman nitu wan manggapitnya sahingga inya kada mahasilakan buah. ²⁰ Namun, buhan nang di tabur di tanah nang baik adalah buhan nang mandangar firman, manarimanya, wan mahasilakan buah, tiga puluh kali lipat, anam puluh kali lipat, wan saratus kali lipat." Parumpamaan Tantang Palita ²¹ Lalu, Yesus baucap ka buhannya, " bukankah palita kada dibawa gasan diandak di bawah sabuah gantang atawa di bawah sabuah wadah guring? Bukankah palita nitu saharusnya diandak di atas kaki palita? ²² Sabab, kadada nang tasambunyi nang kada diungkapakan. kaya nitu jua, kadada rahasia apa pun karana hal nitu cagar dinyataakan. ²³ Jika ada urang nang baisi talinga gasan mandangar, biarakan inya mandangar!" ²⁴ Lalu, Yesus baucap ka buhannya, "Parhatiakanlah apa nang ikam dangar. Ukuran nang ikam pakai cagar diukurakan ka ikam, wan masih ada nang cagar ditambahakan ka ikam. ²⁵ Karana siapa nang baisi, inya cagar dibari pulang, tapi siapa nang kada baisi, apa pun nang ada lawan inya cagar diambil." Parumpamaan tantang Banih ²⁶ Imbah nitu, Yesus baucap, "Karajaan Allah kaya saurang nang manabur banih di tanah. ²⁷ Panabur nitu guring wan bangun siang wan malam, banih mangaluarakan tunas wan batumbuh. Panabur kada tahu kaya apa kajadiannya. ²⁸ Tanah mahasilakan buah saurangan. Awalnya tunas, lalu bulirnya, lalu biji-biji gandum di dalam bulir nitu. ²⁹ Imbah biji gandung masak, urang hancap manyabitnya karana sudah musim panen." Parumpamaan tantang Biji Sesawi ³⁰ Imbah nitu, Yesus baucap, "Lawan apakah kita kawa mambandingkan karajaan Allah? Atawa, lawan parumpamaan apakah kita kawa mambandingkannya? ³¹ Karajaan Allah kaya biji sesawi nang ditabur di tanah, walaupun bijinya adalah biji nang paling halus diantara sabarataan biji di bumi, ³² tatapi imbah ditabur, biji nitu cagar tumbuh wan manjadi labih ganal dari sabarataan tanaman kabun, wan mangaluarakan cabang-cabang ganal sahingga burung-burung di udara kawa maulah sarang di atasnya." ³³ Lawan parumpamaan nang banyak kaya nitu, Yesus mahabarakan firman ka buhannya, sasuai lawan apa nang kawa buhannya pahami. ³⁴ Sidin kada suah bapander ka buhannya tanpa suatu parumpamaan, tatapi Sidin manjalasakan sabarataan saurangan ka murid-murid Sidin. Yesus Maradakan Angin Topan ³⁵ Pada hari nitu, katika sudah sore Yesus baucap ka murid-murid Sidin, " Ayu kita tulak ka sabarang danau." ³⁶ Imbah maninggalakan urang banyak, buhannya mambawa Yesus basama masuk ka jukung wadah Yesus barada. Wan, jukung-jukung nang lainnya basama lawan Sidin. ³⁷ Lalu, tajadilah angin topan nang dasyat wan ombak ganal mahampasakan jukung sahingga jukung hibak lawan banyu. ³⁸ Namun, Yesus ada di buritan jukung, guring di atas bantal. Maka, buhannya mambangunakan Sidin wan baucap ka Sidin,"Guru, apakah Pian kada paduli kalu kita binasa?" ³⁹ Lalu, Yesus bangun wan membentak angin, lalu baucap ka laut, "Diam! Tananglah!" Maka, angin nitu ampih wan manjadi tanang. ⁴⁰ Lalu, Sidin baucap ka buhannya, "Mangapa ikam katakutan? Apakah ikam balum baisi iman?" ⁴¹ Buhannya jadi takutan banar wan bapander satu sama lain, "Siapa garang Sidin ni? bahkan angin kancang wan laut taat lawan Sidin!"