¹ Yesus bapandir yamin lawan buhannya dalam paumpamaan-paumpamaan, ujar Inya, ² "Kerajaan Surga dapat diumpamakan kaya saurang raja nang mangadahakan aruh parnikahan gasan anak lakiannya. ³ Wan, inya manyuruh para ulunnnya gasan mamanggil urang-urang nang imbah disaru ka aruh itu, tapi buhannya kada hakun datang. ⁴ Limpat, raja manyuruh yamin ulun-ulun nang lain, ujarnya, "Padahakanlah lawan urang-urang nang disaru, Janak, aku imbah mapacangakan sasurunganku. Lembu-lembu jantan wan ternak-ternak kalamakan sabarataannya imbah disambelih, wan sabarataannya imbah sadi. Datanglah ka parjamuan kawin naya.' ⁵ Cagar tapi, buhannya mangabaikan wan baisur, nang asa ka pahumaannya, nang lain ka usahany, ⁶ wan nang lainnya manggarit ulun-ulun raja itu, manyiksa, wan mamati'i buhannya. ⁷ Maka, sang raja sarik, wan mangirim tentara-tentaranya, mambinasahakan pamati'i-pamati'i itu, wan mambanamkota buhannya. ⁸ Kamudian, inya bapadah lawan ulun-ulunnya, 'Aruh parnikahan imbah sadi, tapi urang-urang nang disaru itu kada layak. ⁹ Ulih sabab itu, baisurlah ka lalah-lalah raya wan sarulah sabarapa rahat urang nang dapat ikam jumpai ka aruh parnikahan naya.' ¹⁰ Maka, ulun-ulun itu baisur ka lalah-lalah wan mangumpulakan sabarataan urang nang buhannya dapati, nang baik wan nang jahat. Wan, wadah perkawinan itu dihibaki awan para tamu. ¹¹ Cagar tapi, wayah raja babuat gasan badapat lawan para tamunya, inya majanaki sasaurang di sana, nang kada maudak pakaian gasan aruh parnikahan. ¹² Inya bapadah lawan inya, 'Dingsanak, dimapa ikam bisa babuat ka naya tanpa maudak pakaian gasan aruh parnikahan?' Wan, urang itu taranay. ¹³ Kamudian raja itu bapadah lawan ulun-ulunnya, 'Ekatlah tangan wan landaw inya, wan hamputakanlah inya ka dalam kakadapan nang liwar luak. Di sana, pacangan ada tangis wan kertak gigi.' ¹⁴ Sabab, rahat nang dipanggil, tapi sahimpil nang bapalih." Usaha Panuhaan Yahudi gasan Manjebak Yesus ¹⁵ Kamudian, urang-urang Farisi baisur wan bakomplot panyamannya buhannya dapat manjerat Yesus awan pamuntungan Inya. ¹⁶ Wan, buhannya mangutus murid-murid buhannya lawan Yesus, lawan urang-urang Herodian. Buhannya bapadah, "Guru, kami tahu bahwa Engkau jujur wan mangajarkan lalah Allah dalam kabujuran. Engkau kada gair lawan siapa pun sabab Engkau kada majanak rupa. ¹⁷ Kalu damintu, padahakanlah pandapat Pian lawan kami. Napakah dibujurakan gasan mambayar pajak lawan kaisar atawa kada ?" ¹⁸ Cagar tapi, Yesus mangatahui kajahatan buhannya wan bapadah, "Dimapa ikam mancobai Aku, oi munafik? ¹⁹ Hunjukakanlah lawan Aku uang pajak itu." Limpat, buhannya manjulung sakeping dinar lawan Inya. ²⁰ Wan, Inya bapadah lawan buhannya, "Gambar wan tulisan siapakah naya?" ²¹ Buhannya manyinggai, "Kaisar." Kamudian, Yesus bapadah lawan buhannya, 'Ulih sabab itu, bayarlah lawan kaisar idabul-idabul ampun kaisar, wan lawan Allah idabul-idabul nang adalah ampun Allah.'' ²² Wayah mandangarnya, buhannya tahiran-hiran, wan maninggalakan Inya wan baisur. Usaha Urang Saduki gasan Manjebak Yesus ²³ Wan hari nang sama, urang-urang Saduki, nang bapadah bahwa kadada kabangkitan, datang lawan Yesus wan batakun lawan Inya. ²⁴ "Guru, Musa bapadah bahwa amun saurang lalakian mati wan kada baampun anak, dingsanak lalakiannya baur mangawini bininya wan manarusakan katurunan hagan dingsanaknya nang maninggal itu. ²⁵ Wayahini, ada tujuh badingsanak di antara kami. Nang partama maneikah, wan mati tanpa baampun anak, wan maninggalakan bininya hagan dingsanaknya. ²⁶ Damikian jua awan nang kedua, nang ketiga, hinggan nang ketujuh. ²⁷ Eher matan sabarataannya, bibinian itu jua mati. ²⁸ Wayah hari kabangkitan, bibinian itu manjadi bini siapa matan ketujuh badingsanak itu? Sabab, buhannya sabarataan imbah mangawininya." ²⁹ Cagar tapi, Yesus manyinggai wan bapadah lawan buhannya, 'Ikam tasasat, kada tahu Kitab Suci atawa pun kuasa Allah. ³⁰ Sabab, wayah hari kabangkitan, buhannya kada kawin atawa pun dikawini, tapi kaya malaikat-malaikat di surga. ³¹ Namun, mangenai kabangkitan urang-urang mati, balumkah ikam mambaca napa nang dipadahakan lawan ikam ulih Allah, ³² 'Akulah Allah Abraham, Allah Ishak, wan Allah Yakub'? Inya bukan Allah urang mati, malainakan Allah urang hidup." ³³ Wayah urang rahat mandangar idabul naya, buhannya tahiran-hiran tahadap pangajaran Inya. Hukum Manakah nang Liwar Panting? ³⁴ Namun, wayah urang-urang Farisi mandangar bahwa Yesus imbah maulah urang-urang Saduki taranay, bakumpullah buhannya. ³⁵ Kamudian, asa matan buhannya, saurang ahli Hukum Taurat, batakun lawan Yesus gasan mauji Inya, ³⁶ "Guru, parintah manakah nang terpanting dalam Hukum Taurat?'' ³⁷ Wan, Yesus bapadah lawan inya, 'Ikam baur mangasihi Tuhan AllahMu awan saganap hatimu, wan awan saganap jiwamu, wan awan saganap pikiranmu. ³⁸ Naya adalah parintah nang taganal wan nang partama. ³⁹ Nang kedua adalah kaya naya, 'Ikam baur mangasihi sesamamu kaya awakmu saurang.' ⁴⁰ Dalam kedua parintah naya, taantuy sabarataan Hukum Taurat wan kitab para nabi." Patakunan tentang Mesias. ⁴¹ Wayahini, pahadangan urang-urang Farisi bakumpul baimbay, Yesus batakun lawan buhannya, ⁴² "Dimapa pandapat ikam tentang Kristus? Anak siapakah Inya?" Buhannya bapadah lawan Inya, Anak Daud." ⁴³ Inya bapadah lawan buhannya, ''Kalu damintu, dimapakah Daud, dalam Roh, mamanggil Inya 'Tuan', ujarnya, ⁴⁴ Tuhan berfirman lawan Tuanku, "Duduklah di sabalah kanan-Ku, hinggan Aku maandakakan musuh-musuh-Mu di bawah landaw-Mu'? ⁴⁵ Amun Daud mamanggil Kristus sabagai 'Tuan', dimapa magun Inya adalah anak Daud?" ⁴⁶ Kada saurang pun nang dapat manyinggai asa ujar pun lawan Inya. Wan, wayah hari itu, kadada urang nang wani manakunakan patakunan-patakunan yamin lawan Inya.