¹ Hai dingsanak-dingsanak, jika ada urang nang kadapatan manggawi suatu palanggaran, ikam nang rohani harus mambulikakan urang nangkaya nitu lawan roh kalambutan. Bajaga-jagalah supaya ikam saurang jangan umpat tagoda. ² Saling manolonglah dalam mananggung beban supaya ikam manaati hukum Kristus. ³ Jika ada urang nang manganggap dirinya panting, padahal kada kaya itu, inya manipu dirinya saurang. ⁴ Marilah satiap urang manguji parbuatannya saurang. Imbah nitu, inya kawa bangga malihat kaadaannya saurang wan bukan karena mambadingkannya lawan urang lain. ⁵ Sabab, satiap urang harus mananggung bebannya saurang. Tataplah Manggawi Hal nang Baik ⁶ Siapa nang mandapat pangajaran dari firman Allah haruslah inya mambagikan sabarataan hal nang baik nitu ka urang nang mangajarnya. ⁷ Jangan tatipu. Allah kada kawa diparmainkan karena urang pacang manuai apa nang inya tabur. ⁸ Urang nang manabur dari nafsu kadagingan pacang manuai kabusukan dari kadagingannya. Akan tatapi, urang nang manabur dari Roh pacanf manuai hidup nang kekal dari Roh. ⁹ Jangan kita uyuh babuat baik. Jika musimnya tiba, kita pacang manuai asalkan kita kada manyarah. ¹⁰ Karena nitu, jika kita mandapat kasampatan, marilah kita babuat baik ka sabarataan urang, khususnya ka dingsanak saiman. Paulus Maakhiri Suratnya ¹¹ Lihatlah ganal banar huruf-huruf nang ulun tulis gasan ikam lawan tangan ulun saurang. ¹² Buhannya nang handak mamamerkan kabaikan dari hal-hal nang lahiriah pacang mamaksa ikam ba sunat. Buhannya manggawi hal nitu supaya kada dianiaya demi salib Kristus. ¹³ Buhan nang disunat pun kada manaati Hukum Taurat, tatapi buhannya handak ikam disunat supaya buhannya kawa mamegahkan diri atas sunat ikam. ¹⁴ Mudahan ulun kada suah mamegahkan diri kacuali dalam salib Tuhan kita, Yesus Kristus. Malalui salib Sidin, dunia sudah disalibakan gasan ulun, wan ulun gasan dunia. ¹⁵ Disunat atawa kada disunat apalah artinya. Nang panting adalah manjadi ciptaan hanyar. ¹⁶ Gasan sabarataan urang nang manjalanakan aturan ini, biarlah damai sejahterah dan rahmat turun atas buhannya wan atas Israel ampun Allah. ¹⁷ Akhirnya, jangan ada urang nang mamparsulit ulun karena ulun mambawa tanda-tanda Yesus dalam awak ulun. ¹⁸ Dingsanak-dingsanak, kiranya anugerah Tuhan Yesus Kristus ada basama lawan roh ikam. Amin.