¹ Oleh karana nitu, ulun, urang nang dipanjarakan karana Tuhan, manunjul ikam gasan hidup sapadan lawan panggilan nang sudah ikam sambut. ² Lawan sagala karandahan hati wan kalambutan, lawan kasabaran, saling mananggung beban dalam kasih, ³ bausahalah sakuat tanaga gasan mamalihara kasatuan Roh dalam ikatan damai sejahtera. ⁴ Cuma ada satu awak wan satu Roh, sama halnya waktu ikam dikiau gasan satu harapan matan kiau ikam, ⁵ Satu Tuhan, satu iman, wan satu baptisan, ⁶ satu Allah wan Bapa matan sabarataan, nang di atas sabarataannya, malalui sabarataan, wan dalam sabarataannya. ⁷ Akan tetapi, gasan kita masing-masing dijulung anugerah sasuai lawan ukuran karunia Kristus. ⁸ Nitulah sababnya, dipadahakan, "Katika Sidin naik ka wadang nang tinggi, Sidin manangkap urang-urang nang ditawan, wan manjulung karunia ka manusia." ⁹ Katika dipadahakan, "Sidin naik," kadakah artinya Sidin jua sudah turun kabagian bawah bumi? ¹⁰ Sidin, nang turun, Sidin jualah nang naik labih tinggi supaya Sidin mamanuhi sagala sasuatu. ¹¹ Sidinlah nang manjulung, baik rasul-sarul, nabi-nabi, pemberita-pemberita Injil, gembala-gembala, maupun pengajar-pengajar, ¹² gasan mamparlangkapi urang-urang kudus dalam gawian palayanan gasan pembangunan tubuh Kristus, ¹³ sampai kita sabarataan mancapai kasatuan iman wan pangatahuan akan Anak Allah, yaitu manusia dewasa, manurut ukuran tingkat partumbuhan nang sasuai lawan kepenuhan Kristus. ¹⁴ Dengan demikian, kita bukan lagi kakanakan nang diombang-ambingkan oleh ombak wan dibawa kasana kamasi oleh berbagai angin pangajaran,oleh tipu daya manusia, oleh kapintaran dari panipuan nang licik. ¹⁵ Sabaliknya, pandirakan nang bujur dalam kasih, kita pacang batumbuh dalam sagala hal lawan Sidin, nang adalah Kapala, yaitu Kristus. ¹⁶ Dari pada Sidin sabarataan awak tasusun wan dijarat manjadi satu malalui topangan setiap sendi. Jika masing-masing manggawi bagiannya, awak pacang batumbuh sahingga mambangun dirinya saurang dalam kasih. Cara Hidup nang Bujur dalam Kristus ¹⁷ Karena nitu, ulun padahakan wan tagasakan dalam Tuhan, jangan lagi ikam hidup nangkaya urang-urang nang kada parcaya, nang hidup lawan pikiran nang sia-sia. ¹⁸ Pangartian buhannya manjadi kadap wan tapisah matan kahidupan Allah karena kabodohan nang ada dalam diri buhannya nang disababakan oleh kakarasan hati. ¹⁹ Parasaan buhannya sudah manjadi tumpul wan buhannya manjulung diri ka hawa nafsu gasan manggawi sagala macam kacamaran lawan kasarakahan. ²⁰ Akan tatapi, kada lawan cara nitu ikam balajar manganai Kristus. ²¹ Saumpama ikam memang sudah mandangar manganai Sidin wan diajar dalam Sidin, sabagaimana kabanaran nang ada dalam Yesus, ²² buanglah manusia lawas ikam nang ikam dapat matan cara hidup ikam nang lawas, nang dirusaki oleh hawa nafsu nang manipu. ²³ Parbaharuilah roh pikiran ikam. ²⁴ Pakailah manusia nang hanyar, nang diciptakan dalam rupa Allah dalam kaadilan wan kakudusan nang sejati. ²⁵ Oleh karana nitu, dengan mambuang kapalsuan, marilah satiap ikam bapandir manganai kabanaran ka sasama ikam karana kita sama-sama anggota matan saikung awak. ²⁶ Sarikilah wan jangan babuat dosa. Jangan sampai matahari tanggalam dalam panyarikan ikam. ²⁷ Jangan manjulung kasampatan lawan setan. ²⁸ Urang nang sudah mancuntan, jangan mancuntan pulang. Lebih baik kalau inya bagawi wan manggawi gawian nang bujur lawan tangannya saurang sahingga inya baisi sasuatu gasan dijulung ka urang nang mambutuhakan. ²⁹ Jangan biarakan pandiran kotor kaluar dari muntung ikam, tapi hanya pandiran bujur nang mambangun urang nang mambutuhakan sahingga pandiran ikam nitu mambari berkat gasan buhannya nang mandangarnya. ³⁰ Jangan mendukakan Roh Kudus Allah, sabab oleh karena Sidin ikam di mataraikan gasan hari panabusan. ³¹ Buanglah sagala macam kapahitan, kegemaran, kamarahan, partikaian, wan pandiran fitnah, jua sabarataan kajahatan, jauhakanlah nitu dari ikam. ³² Basikaplah ramah satu lawan nang lainnya, baisilah hati nang lembut, wan saling mangampuni, sebagaimana Allah dalam Kristus jua mangampuni ikam.