¹ Demi kadatangan Sidin wan karajaan Sidin, bujur-bujur ulun bapasan ka ikam di hadapan Allah wan Yesus Kristus nang pacang manghakimi urang nang hidup wan nang mati: ² Habarakanlah firman, siap sadialah baik atawa kada baik waktunya; tagurlah, nasihatilah, wan doronglah buhannya lawan penuh kasabaran wan pangajaran. ³ Sabab, pacang datang saatnya katika urang-urang kada hakun lagi manarima ajaran nang sehat. Sabaliknya, gasan mamuasakan talinga, buhannya pacang mangumpulakan guru-guru gasan diri buhannya saurang nang sasuai lawan kahandak buhannya. ⁴ Buhannya pacang mamalingakan pandangaran buhannya matan kabanaran wan babulik ka dongeng-dongeng. ⁵ Sedangkan ikam, bahati-hatilah dalam sagala hal, batahanlah dalam kasukaran, gawiakanlah tugas mahabarakan Injil, wan tuntungakanlah palayanan ikam. ⁶ Sabab, ulun sudah dicurahakan kaya cawan parsambahan, wan sudah waktunya ulun tulak. ⁷ Ulun sudah batanding dalam tandingan nang bujur; ulun sudah maakhiri partandingan; ulun sudah mamalihara iman. ⁸ Wayahini, mahkota kabanaran sudah disadiakan gasan ulun. Pada hari nitu, Tuhan, Hakim nang adil, pacang mahadiakannya gasan ulun, wan kada gasan ulun haja, malainkan gasan sabarataan urang nang mangganangi kadatangan Sidin. Pasan Pribadi Paulus gasan Timotius ⁹ Bausahalah gasan mandatangi ulun ¹⁰ karana Demas maninggalakan ulun, sabab inya mancintai dunia ini wan tulak ka Tesalonika. Krekes sudah tulak ka Galatia wan Titus ka Dalmatia. ¹¹ Hanya Lukas nang baimbai ulun. Jamputakan Markus wan bawalah inya baimbai ikam karana inya sangat baguna gasan ulun dalam palayanan. ¹² Ulun sudah mautus Tikhikus ka Efesus. ¹³ Jika ikam datang, bawalah jubah nang kutinggalakan gasan Karpus di Troas wan buku-bukuku jua, tarutama sabarataan perkamen nitu. ¹⁴ Aleksander, si tukang besi nitu, sudah banyak marugiakan ulun. Tuhan pacang mambalas sasuai lawan parbuatannya. ¹⁵ Ikam bahati-hati jua lawan inya karana inya sangat manantang ajaran kita. ¹⁶ Pada pampelaan ulun nang partama, kadada saurang pun nang mandukung ulun karana sabarataan sudah maninggalakan ulun. Mudahan hal ini kada dibalas ka buhannya. ¹⁷ Namun, Tuhan badiri di higa ulun wan manguatakan ulun sahingga habar nitu kawa dihabarakan malalui ulun, wan sabarataan urang salain Yahudi kawa mandangarnya. Dengan demikian, ulun dilapasakan matan mulut Singa. ¹⁸ Tuhan pacang manyalamatakan ulun matan parbuatan nang jahat wan pacang mambawa ulun ka karajaan surgawi Sidin. Gasan Sidinlah kamuliaan sampai salawasan. Amin. Salam Tarakhir ¹⁹ Sampaiakan salam ulun ka Priskila wan Akwila, wan ka saisi rumah Onesiforus. ²⁰ Erastus tatap badiam di Korintus, wan Trofimus ulun tinggalakan dalam kaadaan garing di Miletus. ²¹ Bausahalah datang ka sini sabalum musim dingin. Ebulus, pudes, Linus, Klaudia, wan sabarataan dingsanak saiman mangirim salam gasan ikam. ²² Tuhan manyartai roh ikam. Anugerah manyartai ikam.