¹ Apakah kami mulai mamuji diri kami saurang ? Atawa, kaya babarapa urang, apakah kami mamarluakan surat pujian gasan ikam atawa dari ikam? ² Ikamlah surat kami, nang tatulis dalam hati kami, nang dikatahui, wan dibaca oleh sabarataan urang. ³ Ikam manunjukakan bahwa ikam adalah surat Kristus nang dilayani oleh kami, nang ditulis bukan lawan tinta, malainkan lawan Roh Allah nang hidup, bukan di atas loh-loh batu, malainkan di loh-loh hati manusia. ⁴ Kayakinan kaya ini nang kami punya tahadap Allah lewat Kristus. ⁵ Bukan berarti kami, lawan diri kami saurang, mampu manganggap sasuatu baasal dari diri kami saurang, tapi kamampuan kami baasal dari Allah, ⁶ nang sudah maolah kami mampu manjadi palayan-palayan parjanjian hanyar, bukan manurut huruf, tapi dari Roh. Sabab, huruf itu mamatiakan, tapi Roh mahidupakan. Kamuliaan Besar dari Palayanan Roh ⁷ Namun, jika palayanan nang mambawa ka kamatian, lawan huruf-huruf ditulis pada loh batu nitu datang lawan kamuliaan, sampai-sampai bangsa Israel kada kawa manatap muha Musa karana kamuliaan nitu, padahal waktu nitu kamuliaannya sudah mamudar, ⁸ bukankah palayanan Roh baisi kamuliaan nang labih ganal lagi? ⁹ Sabab, jika palayanan nang mambawa hukuman baisi kamuliaan, talabih lagi palayanan kabanaran nitu malimpah dalam kamuliaan. ¹⁰ Sabujurnya, apa nang dahulu dianggap mulia, dalam hal ini kada lagi dimuliakan karana kamuliaan nang malimpah nitu. ¹¹ Sabab, jika nang mamudar nitu datang lawan kamuliaan, talabih lagi nang kekal nitu dalam kamuliaan. ¹² Karana baisi pangharapan nang kaya ini, kami manggunakan kabaranian besar, ¹³ wan kada kaya Musa, nang maandak salubung di muhanya supaya kakanakan Israel kada kawa malihat akhir dari apa nang mamudar nitu. ¹⁴ Namun, pikiran buhannya sudah dikarasakan. Sampai hari ini, dalam pambacaan parjanjian nang lawas, tatap kada diangkat karana hanya di dalam Kristus salubung nitu kawa diangkat. ¹⁵ Bahkan sampai hari ini, waktu kitab Musa dibaca, sabuah salubung manutupi hati buhannya. ¹⁶ Namun, waktu saikung urang babulik ka Tuhan, salubung nitu pacang diangkat. ¹⁷ Tuhan adalah Roh wan di wadah Roh Tuhan hadir, di sana ada kamardekaan. ¹⁸ Wan, kita sabarataan, lawan muha kada tasalubung mancerminkan kamuliaan Tuhan, rahatan diubah ka gambar nang sama dari kamuliaan ka kamuliaan, sama kaya Tuhan, nang adalah Roh nitu.