Palayanan Buhan Utusan Kristus ¹ Nangkaya inilah saharusnya urang mamperhitungakan kami nang jadi hamba Kristus wan urang-urang nang diparcayaakan rahasia-rahasia Allah. ² Nangkaya itu jua, urang-urang nang diparcayaakan wan hal-hal nang baharga saharusnyalah kawa mammbuktiakan bahwa buhannya kawa diparcaya. ³ Sabab, bagiku kada penting mun dihakimi wan ikam atawa oleh pangadilan manusia. Labih lagi aku sorang kada cagar mahakimi diriku. ⁴ Sabab, aku kada manyadari apa haja gasan diriku sorang. Tatapi, kada lantaran nangitu aku kada basalah, lantaran Tuhanlah nang jadi hakim aku. ⁵ Lantaran itu, jangan mahakimi mun balum wayahnya, yaitu sabalum Tuhan datang. Inya nang cagar manarangi hal-hal nang tasambunyi intang kadap cagar manyataakan maksud-maksud dalam hati. Balalu, satiap urang cagar manarima pujian matan Allah. ⁶ Dinsanak sabarataan, aku sudah manggawi hal-hal ini wan Apolos gasan buhan pian supaya liwat kami, buhan pian kawa balajar supaya kada malabihi apa nang sudah tatulis sahingga kadada saikongnya dari buhan pian nang jadi sombong wan nang lainnya. ⁷ Sabab, siapa garang nang mambida-bidaakan ikam? Apa haja nang ikam ampun, nang kada ikam tarima? Wan, mun ikam manarimanya, kanapa ikam manyombongakan diri saolah-olah kada manarimanya? ⁸ Ikam sudah dikanyangi, ikam sudah jadi urang sugih! wan ikam sudah jadi raja! Aku sangat baharap ikam bujur-bujur sudah jadi raja supaya kami kawa mamarentah wanikam. ⁹ Sabab, manurutku, Allah sudah mamparcayaakan kami para rasul, di wadah panghabisannya, nangkaya urang-urang cagar dihukum mati; lantaran kami diulah tontonan gasan dunia, gasan malikat-malaikat atawa manusia. ¹⁰ Kami bungul lantaran Kristus, Tatapi ikam bijaksana dalam Kristus. Kami lamah, tatapi ikam kuat. Ikam tahormat, tatapi kami hina. ¹¹ Sampai wayahini, kami lapar wan haus, babaju compang camping, dipukuli, wan hidup mangambara. ¹² Kami bauyuh-uyuh, bagawi wan tangan kami sorangan. Rahat kami dihina, kami mamberkahi. Rahat kami disiksa, kami batahan. ¹³ Rahat kami difitnah, kami manyahuti dengan ramah. Bahkan, sampai wayahini, kami diulah nangkaya sampah dunia ini, kotoran matan sabarataannya. ¹⁴ Aku mancatat samua ini kada gasan manyupani ikam, Tapi gasan manasehati ikam nangkaya anak-anak nang kusayangi. ¹⁵ Sabab, biar ikam baisi sapuluh ribu guru dalam Kristus, ikam kada baisi banyak abah. Lantaran dalam Yesus Kristus, akulah nang jadi abah ikam malalui Injil. ¹⁶ Jadi, aku manunjul ikam, supaya manjadi urang nang maumpati teladanku! ¹⁷ Lantaran itulah sababnya, aku sudah mangutus gasan ikam Timotius, anaku nang kusayangi wan nang setia dalam Tuhan. Inya cagar maingatakan ikam nangkaya apa jalan hidupku dalam Tuhan, sama nangkaya aku ajarakan dimana haja, dalam satiap jamaat. ¹⁸ Babarapa dari ikam jadi sombong, saulah-ulah aku kada pacangan mandatangi ikam lagi. ¹⁹ Tatapi, aku cagar lakas mandatangi ikam, mun Tuhan bakahandak, wan aku cagar maminandui kada hinggan panderan urang-urang sombong itu, tatapi jua kuasa buhannya. ²⁰ Sabab, karajaan Allah kada intang panderan, tatapi intang kuasa. ²¹ Apa nang ikam handaki? Apakah aku harus mandatangi ikam wan tongkat atawa wan kasih dan roh nang lemahlembut?